Mako 8

1Isyo-nsiku, pakuwuŋgana liŵili iŵumba ilikulu, apakuwula neli kantu akakulya, ŵaYesu ŵaliŵetile aŵasambile ŵaŵo, nekulaŵila kuli ŵo ati: 2Neŵo umutima wanji ulukupopomenwa peŵumbe'li, pakuti ŵukumo silikumene insiku sitatu ili ŵalukwikala naneŵo, naŵo taŵakwete neli kakulya. 3Kaŵili kani nakuŵatuma kwaŵo ili ŵomfwile insala, ŵakulesuka munsila; pakuti ŵambi ŵaliisile ukufuma ukutali. 4Peŋka neŵasambile ŵaŵo ŵaliŵaasucile ati: Mbaakafumya kulipi umuntu siŋkwa uwakuŵakumanya ukwikuta aŵa-ŵantu pano pampaŋga? 5Naŵo nekuŵepusya ati: Mbawasiŋkwa muli naŵo ŵaŋga? Naŵo ati: Ŵasanu naŵaŵili. 6Lomba ŵaliliŵulile iŵumba ati: Ikaleni pansi. Naŵo nekuŵula ŵasiŋka aŵo ŵasanu naŵaŵili; peŋka, ili ŵatotele, ŵalikumawile, nekupela aŵasambile ŵaŵo ati ŵataŵataŵile aŵantu; naŵo nekuliteŵeta iŵumba. 7Netusaŵi tunini ŵali nato utuce; peŋka, ili ŵacindicile, ŵaliŵaŵulile ati: Nalili ŋgamuŵateŵete. 8Naŵo ŵalilile nekwikuta; lomba ŵalifitolele ifyasyele-po ifyakumacile-ko ututundu tusanu natuŵili. 9Aŵo ŵali koti masausande ane. Naŵo nekuŵatuma, 10nekwinjila bwaŋgu mubwato pamo neŵasambile ŵaŵo, nekufika kumitala iyakuDalemanuta.

11Lomba aŵaFalisi ŵaliisile kuli ŵo, nekutatika ukupicisya naŵo, ili ŵafwaya kuli ŵo akesiŵilo akakufuma kwiulu mukuŵesya. 12Naŵo ŵalisisimucile mumutima waŵo nekulaŵila ati: Mbanindo icitentekwa cino cilukufwaila akesiŵilo? Ieinenene ndukumuŵuleni ati tapakapelwa-po akesiŵilo neli kamo kucitentekwa cino. 13Peŋka'po ŵaliŵasile, nekwinjila liŵili mubwato, nekukumbuluka ukuya bwisilya.

14Naŵo aŵasambile ŵaliluŵile-ko ukupinta nasiŋkwa, taŵakwete-po mubwato sombi cimpwampwa cimo ceŋka. 15Naŵo ŵaliŵafundile ati: Cenjeleni! Mucenjele umusuŋga waŵaFalisi, nemusuŋga wakwe Elode. 16Naŵo nekwipusyansyanya pakuti tawakwete-po ŵasiŋkwa, 17Sombi ŵaYesu ŵalifiisiŵile' fyo, nekulaŵila kuli ŵo ati: Mbanindo mulukwipusyansyanya pakuti tamukwete-po wasiŋkwa? Tamuŋgawona-po, neli kwisiŵa? Kani imitima yenu icikosele? 18Amenso muli nao, tamulukuŵona? Nematwi muli nao, tamulukumfwa? Nakaŵili tamulukulaŋguluka? 19Ili nakumawilile aŵantu amasausande asanu wasiŋkwa aŵo ŵasanu, ututundu utwafyakumacile-ko mwalitolele tuŋga? Naŵo ŵaliŵaasucile ati: Ikumi natuŵili. 20Nakaŵili fyopele'fyo aŵo ŵasanu naŵaŵili kuŵantu amasausande ane, ututundu utwafyakumacile-ko mwalitolele tuŋga? Naŵo ati: Tusanu natuŵili. 21Naŵo nekuŵepusya ati: Tamuŋgesiŵa?

22Peŋka'po ŵalificile kuBesaida. Lomba ŵaliletele kuli ŵo impofu, nekuŵakombetela ati ŵaitintile-po. 23Naŵo ŵaliikete iyo-mpofu kuminwe, nekwikulika posonde pamusi; peŋka, ili ŵaisipile mumenso, nekutintila-po pali yo iminwe yaŵo, ŵaliipwisye ati: Kani ulukuŵonapo akantu? 24Nayo nekuceŵuka, nekulaŵila ati: Ndukuŵaŵona aŵantu koti miti ilukwenda. 25Naliŵili ŵalitintile-po iminwe yakwe pamenso aiyo, lomba yalitontomekesye twii, nekukosa, nekulukufiŵona bwino ifintu fyonse. 26Peŋka ŵalimutumine kwakwe kunanda, nekulaŵila ati: Tekwinjila-mo, neli nimumusi.

27Peŋka'po ŵaYesu neŵasambile ŵaŵo ŵalifumine-po ukulukuya kumisi iyakuKaisalia uwakuli Filipo. Popele pansila ŵaliŵepwisye aŵasambile ŵaŵo ati: Mbaŵantu walukuŋgewa ati ninenani? 28Naŵo nekuwaasuka ati: NiYoane uwakuŵatisya; naŵambi ati: NiElaija; sombi ŵambi naŵo ati: Wakusimika umbi naye. 29Kaŵili ŵaliŵepwisye ati: Sombi mbamweŵo, mulukuŋgewa ati ninenani? Lomba Petilo aliŵaasucile ati: Nimweŵa Klistu. 30Naŵo ŵaliŵafundile ati: Tekuŵaŵula aŵantu ŵonse neli umo ifyakuli neŵo.

31Peŋka'po ŵalitaticile ukuŵasambisya ati: Ukumwelelwa Umwana waMuntunsi ukusomenwa kufintu ifinji, nekukanwa kuŵakulu, nakuŵapapatilisi aŵakulu, nakuŵalembesi, nekwipaiwa, nekuŵuka liŵili pakupita insiku sitatu. 32Ayo-masiwi ŵalilaŵilile apaswetele. Lomba Petilo aliŵatwite kumpelo, nekutatika ukuŵakanya. 33Sombi ŵalisyolokele nekuŵona ati nikuŵasambile ŵaŵo eli waŋgamukanya Petilo, ati: Pitila kunuma kwanji, weSatana! pakuti tawalakanya-po ifintu fyaŵaLesa, sombi fyaŵantu.

34Peŋka ŵaliliitile iŵumba pamo neŵasambile ŵaŵo nekulaŵila kuli ŵo ati: Aŵantu ŵonse, ulukufwaya ukundonda neŵo, ŋgaalikanye, akemye umutaliko wakwe, akalukundonda. 35Pakuti aŵantu ŵonse ulukufwayo'kupulusya umweo wakwe, akaulufya; sombi aŵantu ŵonse ukaulufya umweo wakwe pakuti pali neŵo napakuti paCeŵo leiweme, uyo wopele eukaupulusya. 36Pakuti mbomuntu alukusyuka syani, kani alukunoŋkela-po icalo conse icapansi, nekuuposa umweo wakwe? 37Pakuti mbacisa-cintu ici esi umuntu ukuposa mukuula umweo wakwe? 38Pakuti aŵantu ŵonse ukaŵa nensoni pakuti pali neŵo nemasiwi anji pacitentekwa cino icaŵucende icakuŵifya, neMwana waMuntunsi naye akaŵa nensoni pakuti pali woyo, ili akesa ye pamo neŋkalamba isiswetelele muŵuleme bwaŵaWisi.

Currently Selected:

Mako 8: AAL59

Highlight

Copy

Compare