Mako 7

1Lomba waliwuŋgene kuli ŵo aŵaFalisi pamo neŵalembesi ŵambi aŵafumine kuJelusalemi, 2aŵabwene ati aŵasambile ŵakwe ŵambi ŵalukulya ifyakulya kuminwe iŵipile, iyakuŵulo'kusamba-ko, 3Pakuti aŵaFalisi neŵaJuda ŵonse taŵalya-po aŵakuŵulo'kusamba kuminwe, pakuti pakulukulondesya ukwakuti ifyakutantaka fyaŵakulu. 4Nakaŵili, pakufuma kuluŵansa ulwakuulila-po, taŵalya-po, aŵakuŵulo'kusamba; nafimbi ifintu ifinji eko fili, ifi ŵapokele ukulukulama, ifyakusamfya iŋkomeci, nemanoŋgo nembale isyaluŵemba. 5Peŋka aŵaFalisi neŵalembesi ŵaliŵepwisye ati: Mbanindo aŵasambile ŵenu taŵendela-po koti nifyopele'fyo ifyakutantaka fyaŵakulu, sombi ŵalalya ifyakulya fyaŵo kuminwe iŵipile?

6Naŵo ŵaliŵaasucile ati: Cine, Yisaya alisimicile bwino ifyakuli mweŵo, mweŵakutumpaika, koti nifyopele'fyo ifyalembelwe ati:

Aŵantu aŵa ŵalandemya neŵo kumilomo,

Sombi imitima yaŵo ili apatali pali neŵo.

7Sombi uko ukundemya neŵo kwalukoso,

Ili ŵafisambisya koti mafunde ifyakutantaka fyaŵantu.

8Mulaleka'mafunde aŵaLesa, nekwikatisya ifyakutantaka fyaŵantu. 9Nakaŵili ŵalilaŵile kuli ŵo ati: Icine mulaleka amafunde aŵaLesa, ati mwisiŵe ukulonda ifyakutantaka fyenu mweŵene. 10Pakuti Mose alilaŵile ati: Utote ŵawiso naŵanoko. Nakaŵili ati: Uyo ukawatoŋgala ŵawisi neli niŵanyina ŋgaakafwe icine! 11Sombi mweŵo mulalaŵila ati: Kani umuntu nekulaŵila kuli ŵawisi neli nikuli ŵanyina ati—lfyo ifi nati mupeleni niKobani (ilyakwaluka ati mulambu wakuli ŵaLesa); 12lomba ŵukumo tamulukumusuminisya ukuŵacitila neli kantu ŵawisi neli niŵanyina: 13pakucite'fyo mulaalula amasiwi aŵaLesa finaŋgwa pakuti pafyakutantaka fyenu ifi mwaŵatantasisye; nafimbi ifintu ifinji ifyakuŵe'fyo mulaficita.

14Naŵo ŵaliliitile liŵili iŵumba, nekulaŵila kuli ŵo ati: Ŋumfweni mwense, mwisiŵe ati, 15tapali-po icintu icaposonde pamuntu iciisi ukumuŵifya pakwinjila muli ye; sombi ifyo-fintu ififuma mumuntu efiŵifyo'muntu. 16Uyo uli nematwi akumfwa, ŋgaomfwe!

17Peŋka'po, pakwinjila muŋanda, ili ŵafumine kwiŵumba, aŵasambile ŵaŵo ŵaliŵepwisye ifyakupalanya uko. 18Naŵo ŵaliŵaasucile ati: Namweŵo kansi tamukwete-po kalaŋgo? Tamulukwisiŵa-po ati ifintu fyonse ifyaposonde ifiinjila mumuntu tafiisi neli cimo ukumuŵifya; 19pakuti tafiinjila mumutima wakwe, sombi nimucifulu, nekufuma pakuya kumpaŋga? (Efyo waeŵele ifyakulya fyonse ati filiswetele.) 20Kumfwa naŵo ati: Ifyo ififuma-mo mumuntu efiŵifyo'muntu. 21Pakuti mukati mumitima yaŵantu mulafuma ukulaŋguluko'kuwipile, naŵumensomenso, 22nefyakwiŵa, nefyakwipaya' ŵantu, nefyaŵucende, nefyaluŋkumbwa, neŵupupa, nefyakutumpaika, nefyawucencemesi, nemenso aŵukali, nefyaŵusensesi, nefyakulitota, nefyakutumpa fyonse; 23fyonse'fyo ifiŵipile filafuma mukati, nekulukuŵifyo'muntu.

24Peŋka'po ŵaliimine, nekulukuya kumitala iyakuTulo nakuSidono. Naŵo, ili ŵainjile muŋanda, ŵalifwaile ati ŵonse tekufiisiŵa neli umo, sombi taŵaisiŵile-po ukufisama. 25Pakuti umbi umwanakasi, uwali nemwana umwanice umwanakasi uwaiketwe nemupasi uŵipile, ili aumfwile ifyaŵo, alipulilile ukwisa nekuwila pansi muceni caŵo. 26Uyomwanakasi muEla, umukoka wakwe waSilya-poinike. Naye aliŵakombetele ati ŵacitamfye iciŵanda mumwana wakwe. 27Naŵo kaŵalaŵila kuli ye ati: Sombi, tanje aŵana ŋgawekute: pakuti tekwelelwa ukuŵula ifyakulya fyaŵana, nekutuposo'tubwa. 28Sombi naye nekuŵaasuka ati: Cine, Sikulu, netubwa utwikala mwifuŋgu Iyetebulu, tulalya ulusekentwa lwatwana. 29Naŵo kaŵalaŵila kuli ye ati: Pakuti pamasiwi ayo, koya: iciŵanda kale cafuma-mo mumwana woŵe. 30Peŋka naye alikumbulucile ukulukuya kunanda yakwe, nekumusaŋgana umwana alilele paŵulo, neciŵanda kale cafuma.

31Naŵo ŵaYesu ŵalifumine-ko kumitala iyakuTulo nakuSidono, nekuya kucisiŵa caGalili, ili ŵapitile pakati pamitala iyakuDekapoli. 32Lomba ŵaliletele kuli ŵo umbi uwasincile amatwi, kaŵili ali nikaputa; naŵo nekuŵakombetela ati ŵatintile-po iminwe yaŵo pali ye. 33Peŋka ŵalimukumbulwile mwiŵumba, nekumutwala kumpelo, nekumuŵika neminwe yaŵo mumatwi, nekusipa, nekumutintila-po palumini; 34lomba, ili ŵatontomekele kwiulu, ŵalisisimucile, nekulaŵila kuli ye ati: Efata—ilyakwaluka ati: Siŋkuka-mo! 35Peŋka nematwi akwe nekusiŋkuka, necakacile kulumini nekukakuluka, naye nekulukulaŵila bwino. 36Sombi ŵaYesu ŵaliŵafundile ati: Tekuŵaŵula-po aŵantu neli umo! Sombi ili ŵalukukosya amasiwi akuŵacenjesya, naŵo ŵalukukosya amasiwi aŵo akufitulisya ukwakuti ukucila. 37Naŵo ŵalikaŋkamene ukwakuti lukoso, nekulaŵila ati: Fyonse ifintu ŵalukuficita bwino: walawasiŋkula neŵasincile amatwi ati ŵalukumfwa; naŵakaputa ati ŵalukulaŵila.

Currently Selected:

Mako 7: AAL59

Highlight

Copy

Compare