Mako 3

1Peŋka ŵaYesu ŵaliinjile liŵili mwisunagoge; lomba mopele umo emwali umbi umuntu, uwali nekuŵoko ukupapile. 2Peŋka ŵalukuŵaceta lukoso ati kani ŵakumuŵusya pakasuŵa kasabata; tuŵapinde umulandu. 3Naŵo ŵalilaŵile kuli woyo-muntu uwapapile ukuŵoko ati: Ima, wimakane pakati! 4Peŋka ŵalilaŵile nakuli ŵaŵo ati: Pakasuŵa kasabata kani ukwelelwa ukucite'fiweme, kani kucite'fiŵipile? Kani kupulusyo'mweo, kani kuwonala? Sombi ŵo ŵaliikele lukoso celele. 5Peŋka pakuŵatontomekesya twii, nekufitwa pakuti pakumfwo'wuŋkumbwa, pakuti imitima yaŵo yaliumine, ŵalilaŵile kumuntu uyo ati: Tambika ukuŵoko koŵe! Naye nekukutambika, nako ukuŵoko kwakwe nekukosa. 6Peŋka'po aŵaFalisi ŵalifumine-mo, nekupulilila ukufundana neŵena-Elode umwakuŵonawila.

7Sombi ŵaYesu neŵasambile ŵaŵo ŵalikumbulucile ukuya kwisiŵa; neŵumba lyaŵantu ilikulu lyaliŵalondele ilyafumine kucalo caGalili; nakaŵili aŵafumine kucalo cawena-Juda, 8nakuJelusalemi, nakucalo caldumea, nakufyalo ifyapesilya lyaJodeni, nakumitala yaTulo naSidono, iŵumba ilikulu, pakumfwa ifyafintu ifyo ifikulu ifi ŵacitile, ŵaliisile kuli ŵo.

9Peŋka ŵaliŵeŵele aŵasambile ŵaŵo ati ubwato ŵunini ŋgaŵumpembelele pakuti peŵumba lyaŵantu ati ŵensinincisya. 10Pakuti ŵaliŵaŵusisye aŵenji, ifyo, ati aŵo ŵonse aŵali nemyalo ŵaliŵasinincisye mukuŵakuma-ko. 11Nemipasi iŵipile nayo, impindi syonse pakuŵaŵona, yalukwinamisya pamenso aŵo, nekuŵilicisya ati: Mweŵo muli ŵana ŵaŵaLesa! 12Sombi ŵo ŵaliicenjesye ukwakuti ati tekuntulisya.

13Peŋka'po ŵalininine kulupili, nekuŵeta ŵopele aŵo aŵa ŵalukufwaya; naŵo nekuya kuli ŵo. 14Lomba ŵaliŵasalulwile ikumi naŵaŵili, nekuŵelika ati nintanjisi, ati silukwikala naŵo; nakaŵili ati ŵakalukusituma mukusimika: 15nakaŵili ati ŵalukwikala neŵukulu bwakufitamfya-mo ifiŵanda.

16Peŋka ŵaliŵasalulwile aŵo ikumi naŵaŵili, naye Simoni ŵalimwilicile ilyakumulundila-po ati niPetilo; 17najakobo, umwana wakwe Sebedai, naYoane umukwaŵo Jakobo, aliŵelicile akuwalundila-po ati niŵaBoanage, ilyakwaluka ati Ŵana ŵakululuma: 18naAndaleya, naFilipo, naBatolomayo, naMatayo, naTomasi naJakobo umwana wakwe Alifayo, naTadayo, naSimoni umuKanani, 19naJuda Isikaliote, wopele uwaŵaloŵele.

Peŋka ŵaliinjile namuŋanda. 20Nekuwuŋgana liŵili iŵumba ilikulu; lomba ŵo taŵabwene-po neli nindilo. 21Peŋka pakumfwe'fyo aŵaŵyaŵo, ŵalifumine mukuŵekata, pakuti ŵo ŵalukweŵa ati kusiluka ŵasiluka!

22Neŵalembesi, aŵo aŵafumine kuJelusalemi, ŵalilaŵile ati: Ali naBalasebubi! Kaŵili ati: Alafitamfya-mo ifiŵanda kuŵukulu bwamfumu yafiŵanda! 23Naŵo ŵaliŵetile, nekulaŵila kuli ŵo ukwakupalanya ati: MbaSatana aliisi syani ukulitamfya umwine? 24Nakaŵili kani uŵufumu ŵuli nemupaka uwakulukulwa, uŵo-ŵufumu tesi bwikale-po. 25Nakaŵili kani iŋanda ili nemupaka uwakulukulwa, iyo-nanda tesi iikale-po. 26Fyopele'fyo kani Satana nekuliŵucila umwine, nekuŵa nemupaka, tesi ekalepo, sombi kusililila. 27Sombi aŵantu ŵonse tapali-po uwisi ukwinjila muŋanda yamuntu wamakosa, nekutape'fintu fyakwe, ili taaŋgataŋga ukumukaka uyowamakosa; lomba eli aŋgesiwa ukufitapa ifyamuŋanda yakwe.

28Icinenene ndukumuŵuleni ati ifyakuŵifya fyaŵo fyonse fikaŵapupucila aŵana ŵaŵantunsi, pamo nefyamicobwe fyaŵo fyonse'fyo ifi ŵakalukucoŵola; 29sombi aŵantu ŵonse ukacoŵola Umupasi Uswetelele taakaŵa-po nekupupuka insiku syonse lukoso, sombi akaŵa nemulandu wakuŵifya uwakulukuyayaya. 30Ifyo pakuti aŵo ŵalilaŵile ati: Ali nemupasi uŵipile!

31Lomba ŵaliisile ŵanyinaŵo neŵakwawo; naŵo, ili ŵaimakeneposonde, ŵalitumine amasiwi kuli ŵo mukuŵeta. 32Neŵumba lyalukwikala ukuwasiŋguluka; naŵo nekulaŵila kuli ŵo ati: Woneni! Ŵanyinenwe neŵakwanu ŵalukumufwayeni, ŵali posonde! 33Naŵo nekuŵaasuka ati: Mbaŵo niŵanani ŵamama neŵakwasu? 34Peŋka, ili ŵalukuŵacentanya aŵo aŵaikele ukuŵasiŋguluka, ŵalilaŵile ati: Ŵoneni! Ŵamama neŵakwasu mba! 35Pakuti aŵantu ŵonse ukalukucita ukufwaya kŵaŵaLesa, uyo mukwasu, niŋkasi yanji, niŵamama!

Currently Selected:

Mako 3: AAL59

Highlight

Copy

Compare