Mako 2

1Pakwinjila ŵo liŵili muKapanaumi, ili syapitile simbi insiku, lomba kwaliumfwanicile ati ŵali muŋanda; 2neŵantu aŵenji nekuwuŋgana, fyopele'fyo tapali-po apatapakumene neli nipamulyaŋgo, naŵo ŵalilaŵile lsiwi kuli ŵo. 3Lomba ŵaliisile kuli ŵo aŵaletele icilema icikonaicile icipintilwe kuŵantu ŵane. 4Peŋka, pakuwakaŋga ukupalamina kuli ŵo pakuti peŵumba ilikulu, ŵalifimbwile-po peulu pamutenje apo ŵali; peŋka, pakutiŵula, ŵaliselusisye neŵulo ubwalukulala-po uyo uwakonaicile. 5Naŵo ŵaYesu, pakuŵona ukucetekela kwaŵo, ŵalilaŵile kuli woyo uwakonaicile ati: Wemwana wanji, ifyakuŵifya fyoŵe fyafitulucilwa.

6Sombi ŵambi aŵalembesi aŵalukukwikalo'ko, ŵalukwalakanya mumitima yaŵo ati: 7Uyu-muntu mbanindo alukulaŵilile'fyo? Alaŵilo'mucobwe! Mbaninani uwisi-po ukufifitulucila ifyakuŵifya, sombi ŵamo ŵeŋka, eŵaLesa? 8Lomba ŵaYesu ŵalipulilile ukwisiŵa mumutima waŵo ati ŵalukwalakanye'fyo, nekulaŵila kuli ŵo ati: Mbanindo mulukwalakanisisye'fyo mumitima yenu? 9Cise'capepi icakucila, kani kulaŵila kuli wuyu ukonaicile ati: Ifyakuŵifya fyoŵe fyafitulucilwa! kani ati: Ŵuka, uŵule neŵulo ŵoŵe, ulukwenda? 10Sombi ati mwisiŵe ati Umwana waMuntunsi ali neŵukulu pano pansi ubwakufitulucila ifyakuwifya (peŋka ŵalilaŵile kuli woyo uwakonaicile ati:) 11Ndukukuŵula ati: Ŵuka, upinte neŵulo ŵoŵe, ulukuya kunanda yoŵe. 12Naye alipulilile ukuŵuka, nekupinta neŵulo bwakwe, nekufuma-mo pamenso aŵo ŵonse; fyopele'fyo ŵonse ŵalikaŋkamene lukoso, nekulukuŵalemya ŵaLesa ukulaŵila ati: Tatwafibwene-po akale ifyakuŵe'fi neli limo!

13Peŋka'po ŵa Yesu ŵalifumine nekupita liŵili mumusesyo wacisiŵa, neŵumba lyonse lyaliisile kuli ŵo, naŵo nekulukuŵasambisya. 14Popele, ili ŵalukupita, ŵalimubwene Lefai, umwana wakwe Alifayo, aliikele pamupunda uwamusoŋko, peŋka ŵalimweŵele ati: Undonde neŵo. Naye aliimine, nekulukuŵalonda. 15Lomba paliŵele ati ŵaYesu ŵalisamine ukulukulya muŋanda yakwe, newasoŋkesi aŵenji nembifi nasyo syaliikele pamo naŵaYesu neŵasambile ŵaŵo; pakuti ŵali ŵenji, naŵo ŵaliŵalondele.

16Peŋka aŵalembesi ŵaŵaFalisi, pakuŵona ati ŵalukulya pamo nembifi newasoŋkesi, ŵalilaŵile kuŵasambile ŵaŵo ati: A! Ŵalukulya pamo neŵasoŋkesi nembifi! 17Sombi ŵaYesu, pakumfwe'fyo, ŵalilaŵile kuli ŵo ati: A ŵo aŵakosele taŵafwaya-po umulaye, sombi aŵo aŵalukutenda eŵafwayo'mulaye: nsinaisile neŵo mukuŵeta awaluŋgeme, sombi ŵakuŵifya.

18Lomba aŵasambile ŵakwe Yoane neŵaŵaFalisi ŵalukulikanya ukulya: peŋka ŵaliisile ŵambi kuli ŵo, nekulaŵila ati: Mbaŵasambile ŵakwe Yoane neŵaŵaFalisi nindo ŵalukulikanisya ukulya, sombi aŵasambile ŵenu ukulikanya, ŵaŵa? 19ŴaYesu naŵo ŵalilaŵile kuli ŵo ati: A ŵetilwe kuŵuufi kani ŵaliisi ukulikanya ukulya, ili acili naŵo uwakuupa? Ili acili naŵo uwakuupa taŵesi ukulikanya. 20Sombi insiku sikesa isyo uwakuupa ŵakamufumya kuli ŵo; eli ŵakalikanya pansiku isyo. 21Tapali-po umuntu uŵambika-po iciŵambi icaŵukumo pacakufwala icacifusya; ŋgecociŵambi ciiŋgesa mukondoŵoka-po pacakufwala icakale, peŋka nekuŵa necipense icakucila. 22Kaŵili tapali-po umuntu uŵika-mo imfaina isyaŵukumo mufikoko ifyakale, siiŋgesa imfaina mukupandula ifikoko, lomba nemfaina nekwitika, nefikoko nekonaika: sombi imfaina isyaŵukumo ŋgasiloŋgelwe mufikoko ifyaŵukumo.

23Paliŵele ati ŵaYesu ŵalukupita mumaŵala atiligu pakasuŵa kasabata; neŵasambile ŵaŵo, ili ŵalukuya, ŵalitaticile ukulukukonona ifikola fyatiligu. 24Peŋka aŵaFalisi ŵalilaŵile kuli ŵo ati: Woneni! Mbanindo aŵa ŵalukucitile'fi ifitafyelelwe pakasuŵa kasabata? 25Naŵo ŵalilaŵile kuli ŵo ati: Kansi tamuŋgapenda-po neli limo ifyafyefyo ifi acitile Dafidi pakulukupeŋga nekumfwe' nsala, ye umwine naŵaŵo aŵo ali naŵo, 26ati aliinjile muŋanda yaŵaLesa pansiku syakwe Abayata, umupapatilisi umukulu, nekulya wasiŋkwa ŵaŵumboni aŵo taŵelelwe ukulya, sombi nikuŵapapatilisi weŋka, nekuŵapela naŵaŵo aŵo ali naŵo? 27Nakaŵili ŵaYesu ŵalilaŵile kuli ŵo ati: Sabata alileŋgelwe pakuti paŵantunsi, tewantunsi waleŋgelwe pakuti pali sabata, koku, 28Ifyo Umwana waMuntunsi eMwine wasabata.

Currently Selected:

Mako 2: AAL59

Highlight

Copy

Compare