Mako 1

1Ukutaŋga ukwaCeŵo leiweme icakuli ŵaYesu Klistu, Umwana waŵaLesa. 2Koti nifyopele'fyo ifyalembelwe mwibuku lyakwe Yisaya uwakusimika, ati:

Ŵona! Ndukutuma iŋkalamba yanji iyakukutanjilila,

Eikaansika insila yoŵe;

3Isiwi lyaulukuŵilicisya mumpaŋga ati:

Ansikeni umwakupita ŵaSikulu,

Mulukusilunjika insila syaŵo.

4Yoane aliisile nekulukuŵatisya aŵantu mumpaŋga, nekulukusimika ukuŵatisya ukwakwaluluka ukwakufitulucilwo'kuŵifya. 5Lomba ŵaliile kuli ye ŵonse aŵamucalo caŵena-Juda, naŵaŵo ŵonse aŵakuJelusalemi; nekuŵatisiwa kuli ye munika yaJodeni, ili ŵatulisya ifyakuŵifya fyaŵo. 6Uyo-Yoane alukufwala nemasako aŋgamela nemukwandala muluŵunda, nekulukulya insye neŵuci. 7Naye alukusimika ati: Panuma panji palukwisa uncilile neŵo uŵukulu, uyo insiŋga isyaŋkwaŵilo syakwe nsielelwe neŵo ukwinama ukusikakulula. 8Neŵo namuŵatisyeni mumenda, sombi uyo akamuŵatisyeni muMupasi Uswetelele.

9Lomba pansiku isyo paliŵele ati ŵaYesu ŵalifumine kuNasaleti mucalo caGalili, nekuŵatisiwa kuli Yoane muJodeni. 10Peŋka ili ŵaiŵucile mumenda, ŵalipulilile ukuŵona kwiulu kwapanduka, neMupasi koti niciŵa ulukuŵaselucila; 11nesiwi ilyafumine kwiulu ati: Weŵo uli mwana wanji untemenwe; muli weŵo emo ndukusaŋgalala.

12Peŋka'po Umupasi walipulilile ukuŵatwala mumpaŋga; 13mopele umo mumpaŋga ŵaliikele insiku amakumi ane, nekulukwesiwa kuli Satana; kaŵili ŵaliikele nefilwani; neŋkalamba nasyo nekulukuŵataŵataŵila.

14Peŋka, pakwikatwa Yoane, ŵaYesu ŵaliisile kucalo caGalili, ili ŵatulisya leeŵo leiweme icaŵaLesa, 15nekulukulaŵila ati: Impindi ilikumene, neŴufumu bwaŵaLesa bwapalamina: alulukeni, mucetekele leeŵo leiweme.

16Peŋka, ili ŵalukusesya kumbali yacisiŵa caGalili, ŵalibwene Simoni naAndaleya umukwaŵo ŵalukwicisya akombe mucisiŵa, pakuti ŵo ŵakwikasye' saŵi. 17Lomba ŵaYesu ŵalilaŵile kuli ŵo ati: Mundonde neŵo, eli ŋkamwaluleni ŵakwikasya aŵantu. 18Naŵo ŵalipulilile ukutuleka utombe twaŵo, nekuŵalonda. 19Peŋka'po, pakulukuya kuntanjile panini ŵalimubwene Jakobo, umwana wakwe Sebedai naYoane umukwaŵo; naŵo kaŵili ŵali mubwato, ŵalukusosola utombe. 20Naŵo ŵalipulilile ukuŵeta; naŵo ŵalimulekele wisiŵo Sebedai mubwato pamo neŵantu aŵalambulwa, nekulukuŵalonda.

21Peŋka'po ŵaliile nekwinjila namuKapanaumi; lomba pakasuŵa kasabata ŵalipulilile ukwinjila mwisunagoge, nekusambisya. 22Naŵo aŵantu ŵalikaŋkamene pakuti pakusambisya kwaŵo: pakuti ŵo ŵaliŵasambisye koti ŵaŵukulu, tekoti ŵalembesi, koku. 23Impindi iyo, mwisunagoge lyaŵo emwali umuntu uwali nemupasi uŵipile; peŋka naye nekuŵilicisya 24ati: Mbasyani ciŵele pali fweŵo namweŵo, mweŵaYesu ŵakuNasaleti? Kani muliisile mukutonala? Ndimwisini mweŵo, muli Ŵaŵo Aŵaswetelele ŵaŵaLesa!

25Naŵo ŵaYesu ŵaliukenye, nekulaŵila ati: Celele, fuma-mo muli ye! 26Peŋka umupasi uŵipile, ili wamupandwile nekwauka nesiwi'likulu, walifumine-mo muli ye. 27Naŵaŵo ŵonse ŵalikaŋkamene lukoso, fyopele'fyo ŵalukwipusyansyanya ati: Mbeci cindo? Ŵusambisi ubwaŵukumo! Injo'ŵukulu bwakufunda imipasi iŵipile, nayo nekuŵasumina! 28Peŋka'po impupo syaŵo syalipulilile ukutulika monse monse mucalo caGalili icasiŋgulucile.

29Lomba, ili ŵafumine mwisunagoge, ŵalipulilile ukwinjila muŋanda yakwe Simoni naAndaleya, pamo naJakobo naYoane. 30Naŵanyina-fyala Simoni ŵalilele, ŵalukutenda uŵulwele ubwampepo; naŵo ŵalipulilile ukuŵaŵula ŵaYesu ifyakuli ŵo. 31Naŵo ŵalipalamine, nekuŵekata kukuŵoko, nekuŵaŵusya; popele neŵulwele nekuŵaleka; naŵo nekulukuŵataŵataŵila.

32Lomba iciŋgulo, ili kawile akasuŵa, ŵaliŵaletele kuli ŵo ŵonse aŵo aŵalukutenda, naŵaŵo aŵaiketwe kufiŵanda; 33neŵamumusi ŵonse ŵaliŵuŋgene pamo kumulyaŋgo. 34Peŋka ŵaliŵaŵusisye aŵenji aŵalukutenda amalwele namalwele, nekulukufitamfya-mo ifiŵanda ifinji; kaŵili taŵasumine-po ati ifiŵande'fyo filaŵile, pakuti fyaliŵesiŵile.

35Peŋka ŋgamailo, lomba tawuŋgapalamina ukuca, ŵa Yesu ŵaliŵucile, nekufuma ukulukuya mumpaŋga, nekulukutembela kopele uko. 36Lomba Simoni naŵaŵo aŵo ali naŵo ŵaliŵalondelesye. 37Pakuŵaŵona, ŵalilaŵile kuli ŵo ati: Ŵonse aŵantu ŵalukumufwayeni. 38Peŋka ŵalilaŵile kuli ŵo ati: Katuyeni kumisi iŵambakene nakukuno, ati ŋkalukutulisya nakoko; pakuti nalifumine pakuti pali fyefyo. 39Lomba ŵalukwinjila mumasunagoge aŵo monse mucalo caGalili, nekulukusimika, nekulukufitamfya-mo ifiŵanda.

40Peŋka waliisile kuli ŵo uwamanata, nekuŵakombetela ubwifukeme, ukuŵeŵa ati: Kani mulukufwaya, muliisi ukumpossya ifilonda. 41Lomba ŵaliumfwile iŋkumbu ŵaYesu, nekutambika ukuŵoko kwaŵo, nekumutintila, nekulaŵila kuli ye ati: Ndukufwaya; fipole! 42Impindi iyo yopele nemanata nekupulilila ukufuma-mo muli ye, naye aliswetele.

43Lomba ŵalimucenjesye ukwakuti, nekupulilila ukumutuma, 44nekulaŵila kuli ye ati: Umfwa! Tekulaŵila-po akantu kuŵantu ŵonse neli nikuli umo; sombi uye, ulilanjisye kumupapatilisi, ukapeleifyamulambu, pakuti pakuposiwa koŵe, ifyo-fintu, ifi afundile Mose, ifyaŵumboni kuli ŵo. 45Sombi ye alifumine, nekutatika ukucitulisya ukwakuti, nekuciputisya iceŵo monse, fyopele'fyo ŵaYesu taŵaisiŵile-po ukwinjila liŵili mumisi apabwenekele; sombi ŵalukwikala kwisonde kumpaŋga; neŵantu nekulukwisa kuli ŵo aŵafumine monse monse.

Currently Selected:

Mako 1: AAL59

Highlight

Copy

Compare