Matayo 28
28
1Peŋka'po, pakusila'kasuŵa kasabata, pakutatiko'kuca uŵusiku bwakasuŵa kakutatiko'muluŋgu, kwaliisile Maliya uwakuMagadala naMaliya uyo umbi mukuŵone'cilende. 2Lomba caliŵele icitulika icikulu; pakuti iŋkalamba yaŵaSikulu yaliselucile kwiulu, nekwisa nekwalamuna-ko ibwe, nekwikalapo. 3Yalibwenekele koti kampesimpesi, nefyakufwala fyaiyo fyalituŵile tuu koti candwa. 4Peŋka, pakuti pakwitina, aŵalukulama ŵalitutumine, nekuŵa koti ŵafwile.
5Lomba iŋkalamba yaliasucile nekulaŵila kuŵanakasi ati: Mweŵo mwitina: pakuti ndiisi ati mulukufwaya ŵaYesu aŵatalicilwe. 6Taŵa-po pano; pakuti ŵaŵuka, koti nifyopele'fyo ifi ŵalaŵile. Iseni, muŵone apo ŵalele ŵaSikulu. 7Aŋgufyeni lomba, muwawule aŵasambile ŵaŵo ati: Ŵaŵuka paŵafwile; pano ŵalukumutanjilileni kuGalili; kopele uko mukaŵaŵona. Umfweni, namuŵuleni! 8Peŋka'po ŵalifumine-ko uluŵilo kucilende nekutina nekutemwa ukwakuti, nekuŵutuka mukuŵaŵula aŵasambile ŵaŵo. 9Lomba, ili ŵalukuya mukuŵaŵula aŵasambile ŵaŵo, lomba ŵaYesu ŵaliŵakumenye, nekulaŵila ati: Mitende! Naŵo ŵalipalamine, nekuwe kata pamakasa, nekuŵalambila. 10Peŋka ŵaYesu ŵalilaŵile kuli ŵo ati: Mwitina! Kaŵuleni aŵakwasu ati ŵakaye kuGalili, kopele uko ŵakambona.
11Ili ŵalukuya ŵo, lomba ŵambi aŵo aŵalukulama ŵaliinjile mumusi, nekuwawula aŵapapatilisi aŵakulu fyonse' fyo ifyacitilwe. 12Naŵo ili ŵaŵuŋgene pamo neŵakulu, nekufundana, ŵalifipele indalama isinji ifita, 13nekufifunda ati: Mukalaŵile ati aŵasambile ŵakwe ŵaliisile uŵusiku, nekumwiwa, ili tucili mutulo. 14Kani iceŵo ici cakufika mumatwi amwikalicisi twakumutekenesya, nekumupulusyeni. 15Naŵo ŵalipokele indalama, nekucita fyopele'fyo ifi ŵafundilwe: popele iceŵo ico calitulicile pakati kaŵaJuda, ukufika nakukasuŵa kalelo.
16Lomba aŵasambile aŵo ikumi naumo ŵaliile kuGalili, kulupili ulo ulwaŵalaile ŵaYesu. 17Popele apo, ili ŵaŵabwene, ŵaliŵalambile, sombi ŵambi ŵalikanicile. 18Peŋka ŵaYesu ŵaliisile kuli ŵo, nekulaŵila kuli wo ati: Uŵukulu ŵonse ŵulipelwe kuli neŵo, ubwakwiulu nebwapacalo capansi. 19Kamuyeni lomba, mukalukusambisya imisyoŵo yonse yaŵantu, nekuŵaŵatisya mwisina lyaŵaTata nelyaMwana nelyaMupasi Uswetelele; 20ili muŵasambisya ati ŵakalukulonda fyonse'fyo ifi namufundileni; lomba ŵoneni, ndi nenu insiku syonse, ukufika nakukusila kwampindi. Ameni.
Currently Selected:
Matayo 28: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
