Mika 4
4
1Sombi pansiku syakupela-ko pakaŵa ati ulupili lwananda yaŵaYawe lukekalikwa peulu pamapili, nekusuntulwa peulu patupili; lomba imikoka yaŵantu ikalukwendela-ko. 2Popele imisyoŵo yaŵantu iyinji ikaya nekulaŵila ati, Iseni, twendeni tunine kulupili lwaŵaYawe, nakunanda yaŵaLesa ŵakwe Yakobi; eli ŵakatusambisya ifyansila syaŵo, nafweŵo eli tukenda ukulukuŵalondelela; pakuti ifunde likafuma kuSayoni, nesiwi lyaŵaYawe kuJelusalemi. 3Peŋka ŵakasololola ifyeŵo fyaŵantu aŵamikoka iyinji, nekwilunjika imisyoŵo yaŵantu ikosele iyakutali; popele ŵakakanda impoko syaŵo ati syaluke mase, namafumo aŵo ati aaluke fiŵesi ifyamwiŵala; umbi umusyoŵo waŵantu taukasuntwila umusyoŵo uŵyakwe impoko, neli kusambile'ŋkondo liŵili, ŵaŵa. 4Sombi ŵonse umo umo ŵakalukwikala munsi yamifaina yaŵo namunsi yamikuyu yaŵo; tapakalukuli-po neli umo uwakuŵatinisya; pakuti akanwa kaŵaYawe ŵamaŵumba ekalaŵile'fyo. 5Pakuti aŵantu ŵamikoka yonse ŵakalukwenda mwisina lyaŵalesa ŵaŵo aŵene umo umo; sombi fweŵo tukalukwendelela mwisina lyaŵaYawe Lesa wesu insiku syamuyayaya.
6Pakasuŵa ako, efilukulaŵila ŵaYawe, ŋkawuŋganya aŵalukusunta, nekuloŋganya aŵatamfisiwe naŵaŵo aŵa nakululwisye; 7peŋka ŋkawaalula aŵalukusunta ati ŵaŵe ŵakusyala-po, naŵaŵo aŵaposelwe ukutali ati ŵaŵe musyoŵo waŵantu ukosele; lomba ŵaYawe ŵakaŵekalika palupili lwaSayoni ukufuma pano napansiku syamuyayaya.
8Lomba weŵo, wenanda yetaŋga itali ikosele, wekapili kamwana umwanakasi wakuSayoni, nikuli weŵo eko fikafika; icine, uŵufumu bwakale ŵukafika, uŵufumu bwamwana umwanakasi wakujelusalemi. 9Mbanindo lomba ulukulila nekuŵilicisya? Kani tamuli muli weŵo neli nimfumu? Kani alifwile umufundisi woŵe, pakuti ukusomenwa kwakwikata koti nikoko kwamwanakasi ulukupotwa? 10Kolukumfwa ukusomenwa, ulukupotwa mukufyala, wemwana umwanakasi wakuSayoni, koti mwanakasi ili asema; pakuti ŵukumo wakufuma mumusi, nekwikala mumpaŋga: ukafika nakuBabiloni; kopelo'ko ukapulusiwa; kopelo'ko ŵaYawe ŵakakuluŵula muminwe yatupondo toŵe.
11Lomba pano palikuwuŋganine imisyoŵo yaŵantu iyinji, ilukulaŵila ati, Ŋgaaŵifiwe, amenso esu ŋgaamulole Sayoni, 12Sombi taŵaesi amalaŋgulusi aŵa Yawe, neli kusilala ukufunda kwaŵo; pakuti ŵaŵaloŋganya koti mipo kuciŵansa cakupuma. 13Ima, ulukupuma, wemwana umwanakasi wakuSayoni; pakuti ŋkaalula uluseŋgo loŵe nimfitwe, nekwalula amaŵondo oŵe luŵemba; peŋka ukakanda imikoka yaŵantu iyinji ukwisansala; popele ukaŵapele ŵaYawe uŵunonsi bwaiyo, nekuŵapela ŵaSikulu ŵapacalo conse icapansi amakweŵo aiyo.
Currently Selected:
Mika 4: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
