Mika 1
1
1Ili lisiwi lyaŵaYawe ilyaisile kuli Mika umuMolasiti, pansiku syakwe Jotami naEyasi naEsikaya, imfumu syakuJuda, ilyo abwene ilyakuSamalya nakuJelusalemi.
2Umfweni mweŵantu mwense; ukutike wecalo capansi, nafyo fyonse ifilimo; ŵaSikulu Yawe ŋgaŵaŵe nimboni yakumusinineni, ŵaSikulu ukufuma kwitempuli lyaŵo iliswetelele. 3Pakuti, ŵoneni, ŵaYawe ŵalukufuma pantu paŵo; ŵakaseluka nekunyanta-po pantu apasuntucile pacalo. 4Popele amapili akasuŋguluka pansi pali ŵo, nemikolo nayo nekupandulwa, koti cipopo kumulilo, nakoti menda akwitulwilwa mumukolo.
5Fyonse'fyo nipakuti pakusilulula kwakwe Yakobi, napakuti pafyakuŵifya fyaŋanda yakuIsilaeli. Ukusilulula kwakwe Yakobi kundo? Kansi takuli niSamalya? Kaŵili pantu apasuntucile pakuJuda pando? Kansi tapali niJusalemi? 6Pakuti pali fyefyo ŋkaleŋgesya ati Samalya aŵe koti mupili mwiŵala nakoti milala mwiŵala lyamifaina; kaŵili ŋketulwila mumukolo amabwe akuko, nekufisulula ifyapansi fyakuko. 7Kaŵili ifiŵumbwaŵumbwa fyakwe ifyakuŵaswa fikasansalwa fyonse; nemalambulo akwe nao nekociwa onse kumulilo; netuluwi twakwe nato ŋkatonala tonse; pakuti afiwuŋganya kumalambulo amwanakasi umucencemesi; lomba nikumalambulo amwanakasi umucencemesi eko fikabwelela.
8Pakuti pali fyefyo ŋkalila nekukuwa; ŋkalukwenda ili mfulile nekulukulondwa; ŋkalukulila koti niŵamumbwe, nekupama-mo nemisowa koti nimpye. 9Pakuti ifiŵeŋga fyakwe tekuti fikapole; pakuti caisa nakuJuda; cafika nakumusiko wakuŵantu ŵanji, ekuJelusalemi.
10Tekucitulisya muGati, neli kulila neli panini. KuBetile-afila nalialaŋgene mwifukutu, 11Kamupita lukoso ukulukulondwa nensoni, mwenjikale syakuSyafili. Injikale syakuSayanani tasifumine, Ukulila ukwakuBeta-yeseli kukafumya kuli mweŵo injimino yakuko, 12Pakuti injikale syakuMaloti silukulikutula ili sipembelela ukuwama; pakuti ukuŵifya kwaseluka kuli ŵaYawe ukufika nakumusiko uwakuJelusalemi.
13Kamukaka ŵakafwalo ŵaluŵilo kuŋgolofwana, mwenjikale syakuLacisi; ye kutatika kwafyakuŵifya kumwana umwanakasi wakuSayoni; pakuti ukusilulula kwakuIsilaeli kwalibwenwe muli mweŵo. 14Pakuti pali fyefyo mukapela impese yakulekana kuli Molesyeti-gati. Amananda akuAcisibi akaŵa cakusitumpaika imfumu syakuIsilaeli. 15Mwenjikale syakuMalesya, ŋkamuleteleni liŵili uwakumukomekeni; uŵuleme bwakuIsilaeli ŵukafika nakuAdulami. 16Mulileŋgesye mapala, muŵeye nemisisi pakuti paŵana ŵakusemba kwenu; kamukusya amapala koti Iyuni; pakuti ŵakafuma kuli mweŵo mukuya muli ŵukaili.
Currently Selected:
Mika 1: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
