Matayo 9

1Peŋka'po ŵaliicile mubwato, nekwaŵuka, nekufika nakumusi kwaŵo. 2Lomba ŵaliletele kuli ŵo icilema icikonaicile, icalele paŵulo: pakuŵona ukucetekela kwaŵo, ŵalilaŵile ŵaYesu kucilema ati: Wemwana wanji, saŋgalala, ifyakuŵifya fyoŵe fyafitulucilwa. 3Lomba aŵalembesi ŵambi ŵalilaŵile mumitima yaŵo ati: Uyu-muntu alaŵilo' mucobwe! 4Sombi ŵaYesu ŵaliisiŵile ukulaŋguluka kwaŵo, nekulaŵila ati: Mbanindo mulukulaŋgulucile'fiwipile mumitima yenu? 5Pakuti mbacise'capepi icakucila, kani kulaŵila ati—Ifyakuŵifya fyoŵe fyafitulucilwa, kani ati—Ŵuka, ulukwenda? 6Sombi ati mwisiŵe ati Umwana waMuntunsi ali nemakosa pano pansi akufitulucile'fyakuŵifya (peŋka nekweŵe'cilema ati:) Ima, upinte neŵulo ŵoŵe, ulukuya kunanda yoŵe! 7Naco caliimine, nekuya kunanda yacico. 8Sombi amaŵumba aŵantu, pakuŵone'fyo, alitinine, nekulukulemya ŵaLesa, aŵaŵapele aŵantu amakosa akuŵe'fyo.

9Peŋka pakupita ukufumo'ko, ŵaYesu ŵalibwene umbi umuntu uwailicilwe ati niMatayo, uwaikele pamupunda wamusoŋko; nekumweŵa'ti: Undonde neŵo. Naye aliimine, nekulukuŵalonda.

10Ili ŵasamine ukulukulya muŋanda, lomba awasoŋkesi nembifi isinji syaliisile, nekulukusamina pamo naŵaYesu neŵasambile ŵaŵo. 11Pakuŵone'fyo aŵaFalisi, ŵalilaŵile kuŵasambile ŵaŵo ati: Mbanindo aŵasambisi ŵenu ŵalukulila pamo newasoŋkesi nembifi? 12Sombi ŵo, pakumfwe'fyo, ŵalilaŵile ati: Aŵakosele taŵafwayo'mulaye, sombi aŵo aŵalukutenda eŵafwayo'mulaye. 13Sombi kamuyeni, mukasambile iceŵo ici ati: Ndukutwaye'ŋkumbu: nsilukufwaye'milambu! pakuti nsiisile mukwita awaluŋgeme, sombi aŵakuŵifya.

14Peŋka'po ŵaliisile kuli ŵo aŵasambile ŵakwe Yoane, nekulaŵila ati: Mbanindo tukanino'kulya liŵili liŵili fweŵo neŵaFalisi; sombi aŵasambile wenu ŵo ukukana ŵaŵa? 15ŴaYesu ŵalilaŵile kuli ŵo ati: Aŵana ŵakuŵuufi ŵaliisi ukuŵombomana, ili acili naŵo uwakuupa? Sombi insiku sikesa isyo uwakuupa ŵakamufumya kuli ŵo; elyo ŵakakano'kulya. 16Kaŵili tapali-po umuntu uŵambika-po iciŵambi icaŵukumo pacakufwala icacifusya; pakuti ico, icelelwe ukusiŋka-po, cilondowokapo pacakufwala, peŋka nekuŵa necipense icakucila. 17Nakaŵili aŵantu taŵetila-mo imfaina syaŵukumo mufikoko ifyakale; fiiŋgesa-kupandika ifikoko, nemfaina nekwituluka, nefikoko ifyo nekufwa: sombi ŵaletila imfaina syaŵukumo mufikoko fyaŵukumo, ifyo, fyoŵilo nekulukwikala bwino.

18Ili ŵacambale'fyo-fintu, lomba yaliisile kuli ŵo impemba, nekuŵalambila, nekulaŵilaati: Umwana wanji umwanakasi wafwa ŵukumo; sombi mwise, mukamutintile-po iminwe yenu pali ye; akaŵa nemweo. 19Peŋka ŵaYesu ŵaliimine, nekwilonda, newasambile ŵaŵo pamo. 20Lomba umbi umwanakasi, uwali neŵulwele ubwakuswe'milopa imyaka ikumi naiŵili, aliisile kunuma yaŵo nekukuma-ko kumpelo yacakufwala caŵo: 21pakuti alukwalakanya ukucetekela ati kani nakukuma-ko lukoso kucakufwala caŵo, nakupuluka. 22Sombi ŵaYesu ili ŵasyolokele, nekumuŵona, ŵalilaŵile ati: Wemwana wanji, saŋgalala: ukucetekela koŵe kwakupulusya. Peŋka uyo-mwanakasi alipulucile impindi iyo yopele. 23Peŋka'po, pakwinjila muŋanda yampemba, ŵaYesu nekuŵona aŵalukulisye'misembe, neŵumba lyaŵantu aŵalukucite'cipupa, 24ŵalilaŵile ati: Fumeni-po, pakuti umwanice uyu taafwile, woyu, alilele lukoso! Naŵo ŵaliŵasekele ukuŵapufya. 25Sombi ili lyafumine iŵumba, ŵaliinjile-mo, nekumwikata kuminwe, naye umulindu aliŵucile. 26Peŋka impupo syafyefyo syalitulicile monse mucalo ico.

27Pakupita ŵaYesu ukufumo'ko aŵantu ŵaŵili impofu syaliŵalondele, ili siŵilicisya ati: Mutucitile'ŋkumbu, mweŵana ŵakwe Dafidi! 28Ili ŵainjile muŋanda, impofu isyo syaliisile kuli ŵo. Peŋka ŵalilaŵile ŵaYesu kuli syo ati: Mulukucetekela ati ndi nemakosa akucite'fi? Nasyo syaliŵaasucile ati: Inya mweŵaSikulu. 29Peŋka'po ŵalisitintile pamenso, ati: Ŋgaficitwe kuli mweŵo koti kucetekela kwenu! 30Peŋka amenso asisyo nekusiŵuka. Popele ŵaYesu walisicenjesye ati: Aŵantu ŵonse neli umo ŵefiisiŵe'fi! 31Sombi syalifumine, nekutulisya impupo syaŵo monse mucalo ico.

32Ili syafumine, aŵantu ŵambi ŵaliletele kuli ŵo umuntu usincileisiwi, uwaiketwe kuciŵanda. 33Peŋka, pakucitamfya iciŵanda, uyo uwasincile isi wi walilaŵile. Peŋka alikaŋkamene amaŵumba aŵantu ati: Tafyabwenekele-po neli limo ifyakuŵe'fi mucalo caŵaIsilaeli. 34Sombi aŵaFalisi ŵo ati: Kuŵukulu bwamfumu yafiŵanda alukufitamfya ifiŵanda.

35Peŋka ŵa Yesu ŵalukupitana pamisi ikulu napali tumisi tonse, ili ŵasambisya mumasunagoge aŵo, nekutulisya leeŵo Iciweme ica Ŵufumu, nekuŵaŵusya aŵamyalo namyalo, neŵamalwele namalwele. 36Sombi ili ŵabwene amaŵumba aŵantu, umutima waŵo walipopomenwe pali ŵo, pakuti ŵalukukatasiwa nekupalaŋgana koti nimbelele isitasikwete-mwembesi. 37Peŋka ŵalilaŵile kuŵasambile ŵaŵo ati: Ukuteŵula cine kukulu, sombi aŵamilimo ŵace. 38Pakuti pali fyefyo, kamutembela kuŴene ŵaKuteŵula ati ŵatume aŵamilimo mukuteŵula kwaŵo.

Currently Selected:

Matayo 9: AAL59

Highlight

Copy

Compare