Matayo 8

1Peŋka, ili waselucile kulupili, amaŵumba aŵantu akulu aliŵalondele. 2Lomba aliisile kuli ŵo uwamanata, nekuŵalambila ati: MweŵaSikulu, kani mulukufwaya, muliisi ukumposye'filonda. 3Popele ŵalitambicile ukuŵoko kwaŵo, nekumutintila ati: Ndukufwaya, fipole! Impindi iyo yopele amanata akwe alipolele. 4WaYesu nekumweŵa'ti: Tekuŵula aŵantu ŵonse neli umo; sombi uve, ulilanjisye kumupapatilisi, upelo'mulambu uwalaile Mose, akesiŵilo kuli ŵo.

5Peŋka ili ŵainjile muKapanaumi, caliisile kuli ŵo icilolo cimbi icapafito' mwanda, nekuŵakombetela, 6ukulaŵila ati: MweŵaSikulu, umuntu wanji alilele lukoso muŋanda mulwele, alikonaicile nekusomenwo'kwakuti. 7Naŵo ŵalilaŵile kuli co ati: Nakwisa mukumuŵusya. 8Sombi icilolo caliŵaasucile ati: MweŵaSikulu, neŵo nsielelwe mweŵo ukwinjila muŋanda yanji: sombi mulaŵile lukoso isi wi, akuŵuka umuntu wanji. 9Pakuti naneŵo ndi muntu ukomekelwe kuŵukulu, nekulukwikalika aŵasilikani neŵo; peŋka ndalaŵilakuli umbi ati, Koya! naye nekuya; nakuli umbi naye ati, Isa! naye nekwisa; nakumuntu wanji ati, Cite'fi! naye nekuficita. 10Pakumfwe'fyo ŵaYesu, walikaŋkamene, nekulaŵila kuli ŵaŵo aŵalukuŵalonda ati: Cinenene ndukumuŵuleni ati, Nsiŋgawona-po ukucetekela ukukulu ukwakuŵe'fi, koku neli nimuŵaIsilaeli. 11Kaŵili ndukumuŵuleni ati aŵenji ŵakafuma kumutulesuŵa nakumbonsi, nekwikala pamo naAblaamu nalsaci naYakobi muŴufumu bwaKwiulu; 12sombi aŵana ŵaŴufumu ŵakaposwa kumfinsi posonde; apo pakaŵa nemisowa, nekulukusumanya ameno. 13Eli ŵaŋgalawila ŵaYesu kucilolo ati: Koya! Ficitwe kuli weŵo koti kucetekela koŵe. Lomba nemuntu uyo aliŵucile impindi iyo yopele.

14Peŋka ŵaYesu, pakwinjila muŋanda yakwe Petilo, ŵalisanjile ŵanyinafyala Petilo ŵalilele, ŵalukutenda mumuŵili impepo. 15Peŋka ŵaliŵatintile pakuŵoko, lomba neŵulwele nekuŵaleka; eli ŵaŵucile, nekulukuŵataŵataŵila imiteŵeto. 16Pakufike'ciŋgulo, ŵaliŵaletele kuli ŵo aŵantu aŵenji aŵaiketwe kufiŵanda: naŵo ŵalitamfisye-mo imipasi kwisiwi Iyeŋka, nekuŵaŵusya ŵonse aŵalukutenda; 17ati fipelelwe pamo nafyefyo ifyalaŵilwe kuli Yisaya uwakusimika ati: Ye umwine alipokele uku naka kwesu, nekupinta'malwele esu.

18Peŋka'po ŵaYesu, pakuŵona amaŵumba akulu alukunsiŋguluka, ŵaliŵaŵulile aŵasambile ŵaŵo ati katuyeni bwisilya. 19Peŋka waliisile umulembesi, nekulaŵila kuli ŵo ati: MweŴasambisi, nakulukumulondeni konse uko uku mulukuya. 20ŴaYesu ŵalilaŵile kuli ye ati: Ŵamumbwe ŵali nemicembo, nefyuni fyamwiulu nafyo fili nefinsa; sombi Umwana waMuntu nsi taakwete apakusamiko'mutwi, 21Naumbi umusambile walilaŵile kuli ŵo ati: MweŵaSikulu musumine ntaŋge'nje mukusika ŵaTata. 22Sombi ŵaYesu ŵalilaŵile kuli ye ati: Undonde neŵo; uleke aŵafwile, ŵalisike aŵafwile weŋka aŵene naŵene.

23Peŋka'po ŵaliinjile mubwato, neŵasambile ŵaŵo naŵo ŵaliŵalondele. 24Lomba kwaliŵucile icitulika icikulu pacisiŵa, fyopele'fyo nebwato bwalukusempacilwa amenda kumaŋkapa: sombi ŵaYesu ŵalilele lukoso mutulo. 25Peŋka ŵaliisile kuli ŵo, nekuŵaŵusya, ati: Mutupulusye, mweŵaSikulu, tulukufwa! 26Naŵo ati: Mbanindo mulukutina, mweŵakucetekela kunini? Peŋka'po ŵaliimine, nekufikanya ifipupu necisiŵa; popele paliŵele iciŵombe icakuti. 27Aŵantu ŵalikaŋkamene, ati: Mbaawa-wantu ŵasyani? pakuti nefipupu necisiŵa fyonse filaŵomfwa.

28Ili ŵaficile pesilya kucalo caŵaGadala, ŵaliŵakumenye aŵantu ŵaŵili aŵaiketwe kufiŵanda, aŵafumine kufilende, aŵakali ukwakuti, fyopele'fyo papo'muntu uŋgapita-po pansila iyo. 29Lomba ŵaliŵilicisye ati: Mbasyani ciŵele nafweŵo namweŵo, mweŵana ŵaŵaLesa? Kani mwaisa mukutupensya, ili taiŋgafika impindi? 30Pali netaŋga lyaŋkumba isinji, syalukulya ukutali. 31Peŋka ifiŵanda fyaliŵakombetele ati: Kani mulukututamfya-mo fweŵo, mututume twinjile mwitaŋga lyaŋkumba. 32Naŵo nekulaŵila kuli fyo ati: Kamuyeni! Peŋka fyalifumine-mo, nekwinjila muŋkumba: lomba itaŋga lyonse lyalikuŋkulucile uluŵilo mumukolo mwisiŵa, nekufwa mumenda. 33Naŵaŵo aŵalukusyembela, ŵaliŵutucile nekuya kumusi, nekulaŵila fyonse, nefyacitilwe kuli ŵaŵo aŵaiketwe kufiŵanda. 34Lomba aŵamumusi ŵonse ŵalifumine mukukumana nawa. Yesu: popele, pakuŵaŵona, ŵalukuŵapapatilaati: Fumenimo mumitala yesu.

Currently Selected:

Matayo 8: AAL59

Highlight

Copy

Compare