Matayo 10

1Peŋka ŵaliŵetile aŵasambile ŵaŵo aŵo ikumi naŵaŵili, nekuŵapelo'ŵukulu bwapamipasi iŵipile, ubwakwitamfya-mo, nebwakuŵaŵusya aŵamyalo namyalo, neŵamalwele namalwele.

2Amasina antanjisi isyo ikumi nasiŵili niaya: Uwakutaŋga ni Simoni uwailicilwe ati niPetilo, naAndaleya umukwaŵo; naJakobo umwana wakwe Sebedai, naYoane umukwaŵo; 3naFilipo naBatolomayo; naTomasi, naMatayo umusoŋkesi, naJakobo umwana wakwe Alifayo, naTadayo; 4na Simoni umuKanani, naJuda lsikaliote, uyo wopele uwaŵaloŵele. 5Aŵo-ŵantu ikumi naŵaŵili ŵaYesu ŵaliŵatumine, nekuŵacenjesya ukuŵaŵula ati:

Tekwenda munsila syonse isyaŵenafyalo, neli kwinjila mumisi yonse iyaŵaSamalya neli umo; 6sombi tanje cine muye kumbelele isiluŵile isyacikoto caŵaIsilaeli. 7Peŋka, pakulukuya, mulukusimika, ili mulaŵila ati: Uŵufumu bwaKwiulu bwapalamina. 8Mulukuŵaŵusya aŵalwele, neŵafwile naŵo mulukuŵaŵusya, nekufiposya ifyamanata, nekutamfya-mo ifiŵanda: mwalukupoka lukoso, kamulukupela lukoso. 9Tekupinte'golide neli lisilifa neli luŵemba mufikwama fyenu; 10neli mukopa wapalwendo, neli minjila iŵili, neli niŋkwaŵilo, neli kasako: pakuti uwamilimo alielelwe ifyakulya fyakwe.

11Kaŵili mumisi yonse ikulu namuli tumisi tonse utu mukenjila-mo, mukafwaya-fwaye-mo umuntu uwelelwe, nekulukwikele nakwe, ili tamuŋgafuma, 12Pakwinjila muŋanda, mukaisekele. 13Peŋka kani iŋanda iyo ilielelwe, uŵutende bwenu ŵukese pali yo; sombi kani tayelelwe, uŵutende bwenu ŵukabwelele kuli mweŵo. 14Peŋka aŵantu ŵonse utakamupokeleleni, neli kumfwa amasiwi enu, pakufuma muŋanda iyo neli nimumusi uyo, mukakunte-mo ikuŋgu mumakasa enu. 15Icinenene ndukumuŵuleni ati pakasuŵa kakusololole'milandu, fikaŵa fyansuminino kucalo caSodoma naGomola ukucila napali woyomusi.

16Ŵoneni, ndukumutumeni koti nimbelele mukati mumimbulu: pakuti pali fyefyo, kamucenjela koti ninsoka nekutekanya koti niŵaciŵa.

17Sombi cenjeleni kuŵantu: pakuti ŵakamuloŵeleni kumawuŋgano, nekumupumineni mumasunagoge aŵo; 18icine, mukatwalwa pamenso ampemba nemfumu pakuti pali neŵo, ŵumboni kuli syo nakuŵenafyalo. 19Sombi pakumuloweleni ŵo, tekuŵamba mumitima yenu ati: Mbatukalaŵila syani? pakuti impindi iyo yopele fikapelwa kuli mweŵo ifyo ifi mukalaŵila. 20Pakuti tamuli nimweŵo mukalukulaŵila, sombi Mupasi waŵaWisinwe ulaŵilila muli mweŵo. 21Popele umuntu akaloŵela umukwaŵo kulufu, naŵawisi naŵo ŵakaloŵelo'mwana waŵo: neŵana naŵo ŵakaŵaŵucila aŵaŵafyele, nekuŵaloŵela mukuŵepaya. 22Kaŵili aŵantu ŵonse ŵakamufitilweni pakuti pesina lyanji: sombi uyo ukekala nemuŋkonsya ukufika nakumpindi yakupela-ko, uyo eukapuluka. 23Sombi pakumupensyenimumusi uyo, mukaŵutucile kumusi umbi uŵambakene nawo; pakuti cinenene ndukumuŵuleni ati tamukapitana pamisi yonse iyaŵaIsilaeli, ili taaŋgesa Umwana waMuntunsi.

24Umusambile taacilile pamusambisi wakwe, neli muntu wamilimo taacilile pali wisikulu. 25Filikumene umusambile ukupelelwa pamo nemusambisi wakwe, nemuntu wamilimo naye pamo nawisikulu. Kani ŵaliilicile umwine wananda ati niBalasebubi, tanje cine ŵakalukuŵelika neŵantu awamuŋanda yakwe! 26Pakuti pali fyefyo mwilukuŵatina: pakuti tapali-po icintu iciifunicilwe, icitacikefununwa; neli cifisilwe icitacikesibwa. 27Ifyo ifi muŵuleni mumfinsi mukafilaŵilile apaswetele: nafyefyo ifi mumfwa ukumutepeteleni pakutwi, mukafitulisisye kumitenje yamananda. 28Nakaŵili mwilukutina aŵo aŵepaya umuŵili, sombi taŵesi ukwipaya nemupasi: sombi tanje cine mulukuŵatina Aŵo aŵesi ukwipaya nemupasi nemuŵili muGeena.

29Utuseŵa tuŵili kansi tatulolwa akakobili? naŋgawe'fyo tonse tatukaponena pansi neli kamo apakuŵula ŵaWisinwe. 30Sombi nemisisi yonse iyamumitwi yenu ilipendelwe. 31Pakuti pali fyefyo mwilukususwa; mweŵo muli ŵamakweŵo akucila napatuseŵa utwinji.

32Peŋka aŵantu ŵonse ukansumina pamenso aŵantu, uyo-ye naneŵo ŋkamusumina pamenso aŵaTata aŵaKwiulu. 33Sombi aŵantu ŵonse ukaŋkana pamenso aŵantu, uyo naneŵo ŋkamukana pamenso aŵaTata aŵaKwiulu.

34Mwilukulaŋguluka ati ndiisile mukuleto'ŵutende pacalo capansi: nsiisile mukuleto'ŵutende, sombi nimpoko! 35Pakuti ndiisile mukupatanya umuntu naŵawisi, nemwana umwanakasi naye naŵanyina, nemulokasi naye naŵanyina-fyala; 36nemuntu awamuŋanda yakwe ŵakaŵa ŵapate ŵakwe. 37Aŵantu ŵonse utemwa ŵawisi neli niŵanyina ukucila napali neŵo, uyo telelwe neŵo; nawoyo naye utemwa umwana wakwe umwalalume neli mwanakasi ukucila napali neŵo, uyo telelwe neŵo. 38Nakaŵili uyo utaapinta umutaliko wakwe nekulukundonda neŵo, uyo telelwe neŵo. 39Uyo uwakuuŵona umweo wakwe akaulufya; nawoyo ukaulufya umweo wakwe pakuti pali neŵo akauŵona.

40Uwakumupokeleleni alampokelela naneŵo; kaŵili uyo umpokelela neŵo alaŵapokelela naWaŵo aŵantumine. 41Uyo uwakupokelela uwakusimika mwisina lyawakusimika, uyo akalambulwa ifyawakusimika; uyo naye uwakupokelela umuntu uluŋgeme mwisina lyauluŋgeme, uyo akalambulwa ifyamuntu uluŋgeme, 42Kaŵili aŵantu ŵonse ukapela umwanice umo uwakuŵe'fi iŋkomeci yamenda lukoso atontwele, mwisina lyamusambile, icinenene ndukumuŵuleni ati uyo taakaposa ukulambulwa kwakwe neli panini.

Currently Selected:

Matayo 10: AAL59

Highlight

Copy

Compare