Matayo 27

1Pakweŵa'ti lucelo, aŵapapatilisi aŵakulu ŵonse neŵakulu ŵaŵantu ŵalifundene mukuŵepaya ŵa Yesu; 2peŋka ŵaliŵakacile nekuwakulika, nekuŵatulila kuli Pontyo Pilati, umwikalicisi.

3Lomba Juda, uwaŵaloŵele, pakuŵona ati ŵaYesu ŵasininwa, alilapile, nekuŵabwesesya aŵapapatilisi aŵakulu neŵakulu ŵaŵantu indalame'syo amakumi atatu, 4nekulaŵila ati: Naŵifya pakuti naloŵela imilopa iyakuŵulo'mulandu. Sombi naŵo ati: Tauli mulandu wesu, mulandu woŵe! 5Naye alisiposele pansi indalame'syo mwitempuli, nekufuma, nekuya mukulikulicila, nekufwa. 6Peŋka'po aŵapapatilisi aŵakulu ŵaliŵulile indalame'syo, nekulaŵila ati: Tekwelelwa ukusiŵika mumupawo, pakuti syakulambulwa kwamilopa. 7Peŋka ŵalifundene, nekusyula iŵala lyamuŵumfi, ukulukusika-mo aŵensu. 8Pakuti pali fyefyo iŵale'lyo lyaliilicilwe liŵala lyamilopa, ukufika nakukasuŵa kalelo. 9Peŋka'po fyalipelelwe pamo nafyefyo ifyalaŵilwe kuli Jelemiya uwakusimika ati: Naŵo ŵaliŵulile isyesilifa isyo amakumi atatu, umuulo wawoyo uwesesiwe uŵaesesye ŵambi aŵaIsilaeli, 10nekusyula iŵala lyamuŵumfi, koti nifyopele'fyo ifi ŵambulile ŵaSikulu.

11Lomba ŵa Yesu ŵaliimakene pamenso amwikalicisi; peŋka umwikalicisi waliŵepwisye ati: Kani uli nimfumu yaŵaJuda? Naŵo ŵaYesu kaŵamwasuka ati: Mwafilaŵila! 12Peŋka ili ŵaŵasinine aŵapapatilisi aŵakulu neŵakulu, taŵaasucile-po neli kantu. 13Kumfwa Pilati kaalaŵila kuli ŵo ati: Tolukumfwa ifi-fintu ifinji ifi ŵalukukusimicila? 14Sombi taŵamwasucile-po neli lisiwi limo: fyopele'fyo umwikalicisi ŵalikaŋkamene ukwakuti.

15Lomba pampindi yacitenje icamuciluko, umwikalicisi walukulikakulwila iŵumba lyaŵantu kaili umo, uyu lyalukufwaya, 16Lomba ŵali nakaili umbi uwampupo, isina lyakwe niBalaba. 17Lomba, ili ŵaŵuŋgene pamo, Pilati alilaŵile kuli ŵo ati: Mbaninani mulukufwaya ati mukakulwileni? Kani niBalaba, kani niYesu uwilicilwe ati niKlistu? 18Pakuti aliisiŵile ati ŵaliŵaloŵele pakuti pacikani. 19Peŋka, ili aciikele peteŵe lyamilandu, umukasi wakwe walitumine amasiwi kuli ye ati: Wimucita-kantu uyo-muntu uluŋgeme: pakuti lelo nakatasiwa mumuloto kufintu ifinji pakuti pali ye.

20Sombi aŵapapatilisi aŵakulu neŵakulu walitekenesye amaŵumba aŵantu ati ŵalombe Balaba, ŵaŵonale ŵaYesu. 21Sombi umwikalicisi waliŵaasucile ati: Aŵa ŵaŵili mbaninani uyu mulukufwaya ati mukakulwileni neŵo? Naŵo ŵalilaŵile ati: NiBalaba! 22Peŋka Pilati alilaŵile kuli ŵo ati: Mbamucite syani Yesu uwilicilwe ati niKlistu? Naŵo ŵonse nekulaŵila ati: Ŋgaatalikwe! 23Kumfwa ye ati: Mbanindo? Mbafisa-fyakuŵifya ifi acitile? Sombi ŵo ŵaliŵilicisye ukwakuti ukucila ati: Ŋgaatalikwe! 24Peŋka Pilati, pakuŵona ati nsiisi ukuŵatekenesya neli panini, sombi ati tanje cine icipupa caŵuka, aliŵulile amenda nekusamba kuminwe pamenso amaŵumba aŵantu nekulaŵila ati: Neŵo ndiswetele kumilopa yamuntu uyu uluŋgeme; mulandu wenu! 25Naŵo ŵaliasucile ŵonse aŵantu ati: Imilopa yakwe iikale pali fweŵo napaŵana ŵesu! 26Peŋka'po aliŵakakulwilile Balaba; ŵaYesu aliŵapamine kumembya, nekumuposa mukutalikwa.

27Lomba ifita fyamwikalicisi fyaliŵatwite ŵaYesu kuPilaitolyo, nekuŵuŋganya kuli ŵo iŵumba lyonse lyafita. 28Peŋka fyaliŵafulile, nekuŵafwika nemwinjila ukasicile. 29Kaŵili fyalipyatile umuntinya wamvuŋga, nekuŵaŵika mumutwi, nekuŵapela netete muminwe yaŵo iyakulwine; popele fyalifukeme kuli ŵo, nekuŵaseka, nekulaŵila ati: Mitende, mwemfumu syaŵaJuda! 30Nafyo fyaliŵasipile nemate, nekuŵule'tete ilyo, nekuŵapama mumutwi. 31Lomba, ili fyaŵasekele, fyaliŵafulile nemwinjila uyo, nekuŵafwika ifyakufwala fyaŵo aŵene, nekuŵakulika mukuŵatalika.

32Peŋka, pakufuma, fyalisanjile umuntu umbi uwakuKulene, isina lyakwe ni Simoni; popele fyalimupanjile ukuya nafyo ati apinte umutaliko waŵo. 33Lomba, ili fyaficile uko ukwailicilwe ati niGolagota, ilyakwaluka ati, Pantu pekowoŋgo, 34fyaliŵapele ukunwa imfaina isyakusaŋkanisiwa nendulwe; sombi pakusyesa, ŵalikene ukunwa. 35Peŋka, ili fyaŵatalicile, fyaliaŵene ifyakufwala fyaŵo, ili fipose'fipa; ati fipelelwe pamo nafyefyo ifyalaŵilwe kuwakusimika ati: Waliaŵene ifyakufwala fyanji, napamwinjila wanji napo ŵaliposele ifi pa. 36Lomba fyaliikele nekuŵapembelela uko. 37Kaŵili, peulu lyamutwi waŵo, fyalikoŵekele amalembo amulandu waŵo ati: UYU NIWAYESU, IMFUMU YAWAJUDA.

38Lomba ŵalitalicilwe naŵo pamo awano ŵaŵili, umbi palwine, naumbi naye pacipiko. 39Peŋka naŵaŵo aŵalukupita, walukuwatoŋgala, ili ŵasendaika imitwi; 40nekulaŵila ati: Wewakonale' tempuli, nekuliiŵakulula pansiku sitatu, ŋgolipulusye! Kani uli Mwana waŵaLesa, useluke-ko kumutaliko! 41Fyopele'fyo neŵapapatilisi aŵakulu, pamo ncŵalembesi neŵakulu, ili ŵaŵaseka, ŵalilaŵile ati: 42Ŵambi alukuŵapulusya; sombi umwine tesi ukulipulusya! NiMfumu yaŵaIsilaeli, ŋgaiseluke-ko ŵukumo kumutaliko; peŋka twakucetekela muli yo! 43Alukupema-mo muli ŵaLesa; ŋgawamupulusye-po ŵukumo, kani ŵalukumufwaya: pakuti alilaŵile ati: Ndi Mwana waŵaLesa! 44Kaŵili newano naŵo, aŵatalicilwe pamo naŵo, ŵaliŵasalwile fyopele'fyo.

45Lomba ukutatika kumpindi yakasuŵa pakati paliŵele nemfinsi ponse pacalo ukufika nakumpindi yakuteyama' kasuŵa. 46Peŋka, pampindi yakuteyama'kasuŵa, ŵaYesu ŵaliŵilicisye nesiwi'likulu ati: Eli, Eli, lama sabacitani? (akwaluka ati: MweŵaLesa ŵanji, mweŵaLesa ŵanji, pakuti pando mwandekela neŵo?). 47Naŵo, aŵaimakene apo, ili ŵaumfwile'fyo, ŵambi ŵalilaŵile ati: Uyu-muntu alukwita Elaija. 48Peŋka' po umbi aliŵutucile, nekuŵula isiponje, nekwisusya nefinega, nekuŵika kwitete, nekuŵatambika ati ŵanwe. 49Peŋka ŵambi ŵalilaŵile ati: Cilekeni! Tuŵone kani Elaija akwisa mukumupulusya!

50Lomba ŵa Yesu ŵaliŵilicisye liŵili nesiwi'likulu, nekuleka umweo wakwe. 51Lomba icipembe icamwitempuli calikwamucile pakati, ukutaticila peulu nekufika kunsi; necalo naco nekuteŋkana; nefibwe nafyo nekutoŵaika; 52nefilende nafyo fyaliisucile; nemiŵili iinji iyaŵantu awaluŋgeme aŵaile mutulo twamfwa yaliŵusiwe, 53nekufuma mufilende, ili ŵaŵucile pamfwa ŵaYesu Klistu, nekwinjila mumusi uyo uswetelele, nekuŵoneka kuŵantu aŵenji. 54Peŋka icilolo icafito'mwanda, naŵaŵo aŵo cali naŵo ukulukupembelela ŵaYesu, ili ŵabwene icitulika nefintu ifyo ifyacitilwe, ŵalitinine ukwakuti, nekulaŵila ati: Icine aŵa Ŵana ŵaŵaLesa! 55Nakaŵili aŵanakasi aŵenji eko ŵali, awalukutambo'kutali, aŵaŵalondele ŵaYesu ukufuma kuGalili, ukulukuŵapyunjila. 56Mwiŵumba lyaŵo emo ŵali Maliya uwakuMagadala, naMaliya ŵanyinaŵo Jakobo najose, naŵanyinaŵo aŵana ŵakwe Sebedai.

57Pakufike'ciŋgulo, waliisile umuntu umbi umusambasi uwakuAlimatea, isina lyakwe niJosefi, naye musambile waŵaYesu. 58Uyo-muntu aliile kuli Pilati nekulomba icitumbi caŵaYesu. Peŋka Pilati aliŵaŵulile aŵantu ati mupeleni. 59Lomba Josefi alipokele icitumbi, nekucipeta muŋguwo iswetele; 60nekucilalika mwiceŋgo lyakwe umwine ilyawukumo, ili afukwile mwibwe: peŋka alialamwinine-ko nebwe ilikulu kumulyaŋgo wacilende; nekufuma-ko. 61Kaŵili Maliya uwakuMagadala naMaliya uyo umbi eko ŵali, ŵaliikele apasiŋkamene necilende.

62Ŋgamailo, pakasuŵa akakulonda akaKwansicila paMuciluko, aŵapapatilisi aŵakulu neŵaFalisi ŵaliŵuŋgene kuli Pilati, 63nekulaŵila ati; Sikulu, tulukulaŋguluka ati ulya-wakutumpaika, ili acilaŵa, alilaŵile ati: Pakupite'nsiku sitatu ŋkawukat 64Pakuti pali fyefyo, fundeni-ko aŵantu ati ŵalukukosya bwino icilende ukufika kukasuŵa kaŵusitatu; cipale aŵasambile ŵakwe ŵeŋgesa kwiŵa icitumbi cakwe, nekulaŵila kuŵantu ati: Aliŵucile paŵafwile: peŋka ukutumpaika ukwakupela-ko kwiŋgesakucila napakwakutaŋga, 65Naye Pilati alilaŵile kuli ŵo ati: Muli neŵakulama, kamuyeni, mukacikosye koti makosa enu. 66Peŋka'po ŵaliile, nekukosya pacilende, nekuciŋka-po pebwe nekesiŵilo, nekusya-po neŵakulama.

Currently Selected:

Matayo 27: AAL59

Highlight

Copy

Compare