Matayo 24

1Peŋka ŵaYesu ŵalifumine mwitempuli. Lomba ŵalukuya; eli ŵaisile kuli ŵo aŵasambile ŵaŵo mukuŵalanjisya ifi ŵeŵeke itempuli. 2Sombi naŵo ŵaliŵaasucile ati: Tamubwene ifi-fintu fyonse? Ieinenene ndukumuŵuleni ati: Tapakasyala apa neli libwe limo paliŵyakwe, ilitalikaposwa pansi.

3Peŋka'po, ili ŵaikele palupili lwaMaolife, aŵasambile ŵaliisile kuli ŵo kumpelo, ati: Mutuŵule! Ifyo-fintu fikesa lisa? Kaŵili mbakesa-kesiŵilo kakaŵa-po akakwisa kwenu, nekakusila kwampindi? 4Naŵo ŵaYesu ŵaliŵaasucile ati: Cenjeleni ati aŵantu ŵekamulufyeni. 5Pakuti aŵenji ŵakesa mwisina lyanji, ati: NineŵaKlistu! nekuŵalufya aŵantu aŵenji. 6Nakaŵili mukomfwa ifyaŋkondo, nempupo syaŋkondo: peŋka cenjeleni, tekwisa kuŵamba mumitima; pakuti ukwelelwa ati ifyo-fintu fikese; sombi ukusila takukesa-po lveŋke' lyo, tau. 7Pakuti umukoka umbi waŵantu ukaŵucila umukoka uŵyakwe; neŵufumu ŵumbi ŵukaŵucila uŵufumu uŵuŵyakwe; kaŵili pakaŵa insala syakawumbo nemyalo nefitulika pambi napambi. 8Sombi ifyo-fintu fyonse fyakutatika ukupotwa.

9Peŋka'po ŵakamuloŵeleni mukumukululusyeni nekumwipayeni. Kaŵili imikoka yonse yaŵantu ikamufitilweni pakuti pesina lyanji. 10Peŋka aŵenji ŵakalitutula, nekulukuloŵelansyanya, nekulukufitilwansyanya. 11Nakaŵili aŵakusimika aŵakutumpaika aŵenji ŵakema, nekuŵalufya aŵantu aŵenji. 12Lomba pakuti pakufula ukusendama, uŵutemwe bwaŵantu aŵenji ŵukaleka. 13Sombi uyo ukakoselela mumutima ukufika kukusila, uyo eukapuluka, 14Kaŵili leeŵo ici leiweme icaŴufumu cikatulika monse mucalo capansi, koti niŵumboni kumikoka yonse yaŵantu, elyo kukesa ukusila.

15Pakuti pali fyefyo, ili mukaŵona icakukoŵesya icakonala, ici aeŵele Danyeli uwakusimika, ciliimakene pantu apaswetelele (uyo upenda ŋgaalikutule), 16impindi iyo, aŵo, aŵakalukuli mucalo caŵena-Juda, ŵakaŵutucile kumapili; 17nawoyo ukalukuli peulu pananda tekuseluka ati ŋkafumye ifintu ifili muŋanda yanji; 18nawoyo naye ukalukuli kwiŵala, tekubwelela ati mbule icakufwala canji. 19Sombi ŵakasyama aŵo aŵakalukuli nemapafu, naŵaŵo aŵakalukonsya insiku isyo! 20Mulukutembela ati ukuŵutuka kwenu kwikesa pamwela neli nipali sabata; 21pakuti impindi iyo pakekala ukukululuka ukukulu, ukwakuŵe'fyo takuŋgesa ukufuma kumpindi yakuleŋgwa kwacalo ukufika nakuli ŵuŵuno-ŵukumo, kaŵili takukesa-po liŵili insiku syonse, tau. 22Lomba ŋga tasicefiwe insiku isyo, aŵantunsi ŋga tapapulucile neli umo: sombi pakuti pali ŵaŵo aŵasalulwilwe, insiku isyo sikacefiwa.

23Impindi iyo, kani umbi akalaŵile kuli mweŵo ati: Klistu uyu ŵule! neli ati: Ulya ŵule! tekuficetekela-po. 24Pakuti ŵakema ŵaklisiu awakutumpaika, neŵakusimika aŵakutumpaika; naŵo ŵakalanjisyo'twisiŵilo utukulu nefyakukaŋkamana: ati ŵakesye ukuŵapasusya neŵasalulwilwe. 25Ŵoneni, namusimicileni! 26Pakuti pali fyefyo, kani ŵakalaŵila kuli mweŵo ati: Woneni, ali uko kumpaŋga! tekuya-ko; kani ati: Ŵoneni, ali mucipembe muŋanda! Tekuficetekela. 27Pakuti, koti nifyopele' fyo ifi akampesimpesi kafuma kumutulesuŵa nekuŵoneka nakumbonsi konse, fyopele'fyo efikaŵa nekwisa kwaMwana waMuntunsi! 28Apo ponse apali icitumbi, popele apo pakawuŋgana nemoni.

29Sombi peŋka pakusila ukukululuka kwansiku isyo, akasuŵa kakafita, nemwensi nawo tokatuŵa, netuwaŋgawaŋga nato tuka pona mwiulu, nemakosa amwiulu nao akateŋkanisiwa. 30Peŋka' po kakaŵoneka mwiulu akesiŵilo kaMwana waMuntunsi; impindi iyo imikoka yaŵantu yonse iyamucalo ikaŵombomana, popele ikaŵona Umwana waMuntunsi alukwisa pamakumbi akwiulu, nemakosa neŵuleme uŵukulu. 31Naye aka tuma iŋkalamba syakwe nekulila ukwakuti ukwalupeŋga; nasyo sikaŵuŋganya aŵasalulwilwe ŵakwe kufipupu fyonane, nakuluŵali lumo lwakwiulu ukufika nakuluŵyakwe.

32Sombi musambile iceŵo kumukuyu: pakunaka umu ta no wauo, nekusonsa'maŵula, mulesiŵa ati ulusuŵa lwapalamina. 33Fyopele'fyo namweŵo, ili mukafiŵona ifintu ifyo fyonse, mwisiŵe ati ali apepi epamilyaŋgo. 34Icinenene ndukumuŵuleni ati: Icitentekwa ici tacikapita, ili tafiŋgakonsiwa ifyo fyonse. 35Iulu necalo capansi fikapita, sombi amasiwi anji taakapita-po, 36Sombi ifyakasuŵa ako nempindi iyo taŵalukwisiŵa-po aŵantu ŵonse neli umo, neli niŋkalamba syaKwiulu, neli Mwana, sombi niŵa Wisi ŵeŋka.

37Koti nifyefyo ifi fyali insiku syakwe Noa, fyopele'fyo efikaŵa nekwisa kwaMwana waMuntu nsi. 38Pakuti koti nipansiku isyo, lomba tawuŋgesa uŵuloŵe, ŵalukulya nekunwa, nekuupa nekuufya aŵana ŵaŵo, ukufika nakukasuŵa ako ainjile Noa mubwato; 39naŵo taŵaisiŵile, ili tawuŋgesa uŵuloŵe, nekuŵatwala ŵonse; fyopele'fyo efikaŵa nekwisa kwaMwana waMuntunsi. 40Impindi iyo aŵalalume ŵaŵili ŵakalukuli kwiŵala; umbi akapokwa, umuŵyakwe akasiwa. 41Aŵanakasi ŵaŵili wakalukupela kucimabwe; umbi akapokwa, umuwyakwe akasiwa. 42Pakuti pali fyefyo kamucencenta ili mupembelele, pakuti tamwisi akasuŵa ako ŵakesa-mo ŵa Wisikulunweni.

43Sombi isiŵeni ati umwine wananda, ŋga aliisiŵile impindi yakwisa silumfundi, ŋga alicencentele, ŋga taasumine ati iŋanda yakwe itobwe. 44Namweŵo lomba mulukupembelele limo, pakuti pampindi itamucetekele epakesa-po Umwana waMuntunsi.

45Mbaninani lomba umupyunjisi uyo ucetekelwe uwamano, uyu ŵawisikulu ŵaikalicile paŵantu awamuŋanda yaŵo ŵonse, ati alukuŵapela ifyakulya fyaŵo pampindi isyelelwe? 46Alisyucile umupyunjisi uyo uyu ŵawisikulu, pakwisa, wakasaŋga alukucite'fyo fyopele. 47Icinenene ndukumuŵuleni ati ŵakamwikalika pafintu fyonse ifi ŵali nafyo. 48Sombi kani umupyunjisi uyo uŵipile akalaŵile mumutima wakwe ati: ŴaSikulu ŵanji ŵalukukokolo'kwisa! 49peŋka nekutatika ukupama aŵapyunjisi aŵaŵyakwe, nekulukulya nekulukunwa pamo neŵapendelwe; 50ŵawisikulu umuntu uyo ŵakesa pakasuŵa ako akakuwulo'kulaŋguluka ye, napampindi iyo iyakuŵulo'kwisiŵa ye, 51nekumupinika pakati, nekumwaŵanisisya pamo naŵaŵo aŵakutumpaika. Apo pakaŵa nemisowa nekulukusumanya ameno.

Currently Selected:

Matayo 24: AAL59

Highlight

Copy

Compare