Matayo 25

1Peŋka'po Uŵufumu bwaKwiulu ŵukapalana naŵamoye ikumi, aŵaŵulile inyale syaŵo, nekuya mukumucinsya uwakuupa. 2Lomba pali ŵo pali ŵasanu aŵatumpile, ŵambi ŵasanu naŵo ŵamano. 3Pakuti aŵatumpile, pakupinte'nyale syaŵo, taŵapintile-po amafuta; 4sombi aŵo aŵamano ŵalipintile amafuta mumisasi yaŵo pamo nenyale syaŵo. 5Lomba, pakukokola uwakuupa, ŵonse aŵo ŵalukusinsila nekulala mutulo. 6Sombi pakati kaŵusiku, paliŵele ukuŵilicisya ati: Ŵoneni, uwakuupa ŋgulya! Fumeni, mukamucinsye! 7Peŋka ŵamoye ŵonse aŵo ŵaliimine, nekuwamya inyale syaŵo. 8Lomba aŵo aŵatumpile ŵalilaŵile kuŵamano ati: Tupeleni-po ambi amafuta enu; pakuti inyale syesu silukufwayo' kusimika. 9Sombi aŵamano ŵaliasucile ati: Eŋgaleŋga aŵule ukukumana nafweŵo namweŵo; kamuyeni tanje kuŵakuula, mukole mweŵene. 10Peŋka pakuya mukuula ŵo, newakuupa walificile; lomba aŵo aŵapembelele ŵaliinjile mucitenje caŵuufi: napamulyaŋgo paliiselwe. 11Pantanjile lomba naŵo ŵamoye ŵambi nekubwela, ati: Sikulu, Sikulu, twiswileni-ko! 12Sombi naye aliasucile ati: Icinenene ndukumuŵuleni ati, Nsimwisini-po! 13Pembeleleni lomba, pakuti tamwisi akasuŵa ako, neli nimpindi iyo iyi akesa-mo Umwana waMuntunsi.

14Pakuti fili koti muntu, uwaimine ulwendo lwakuya kucalo cimbi, nekwita aŵapyunjisi ŵakwe, nekuŵasisya amaŵoni akwe. 15Umbi alimupele amatalanto asanu, umbi naye aŵili, naumbi naye limo: ŵonse aliŵapele koti mano aŵo umo umo; peŋka aliimine ulwendo lwakwe.

16Popele uyo, uwapokele amatalanto asanu, alipulilile ukufuŵulula-mo amaŵoni, nekubwena-po naambi amatalanto asanu. 17Fyopele'fyo nawoyo uwa pokele awili, alibwenene-po naambi aŵili. 18Sombi uyo uwapokele limo, aliile mukutule'cilindi pansi, nekufisa-mo indalama syaŵawisikulu. 19Popele, pakupita impindi itali, wisikuluŵo aŵantu aŵo waliisile nekupendulula naŵo. 20Peŋka uyo, uwapokele amatalanto asanu, aliisile nekuleta naambi amatalanto asanu, nekulaŵila ati: Sikulu mwalinsisisye neŵo amatalanto asanu: ŵoneni, ndibwenene-po naambi asanu. 21Peŋka ŵawisikulu ŵalilaŵile kuli ye ati: Wacita bwino, wemupyunjisi uweme ucetekelwe; walukucetekelwa kufintu ifice, ŋkakwikalika pafintu ifinji: injila mukutemwa kwaŵawisokulu! 22Peŋka nawoyo naye, uwapokele amatalanto aŵili, aliisile nekulaŵila ati: Sikulu, mwalinsisisye amatalanto aŵili: ŵoneni, ndibwenene-po naambi aŵili. 23Lomba ŵawisikulu ŵalilaŵile kuli ye ati: Wacita bwino, wemupyunjisi uweme ucetekelwe; walukucetekelwa kufintu ifice, ŋkakwikalika pafintu ifinji: injila mukutemwa kwaŵawisokulu! 24Lomba nawoyo naye, uwapokele italanto ilyo limo, aliisile nekulaŵila ati: Sikulu, naliisiŵile ati mweŵo muli ŵantu ŵalukansa, mulateŵula nepo tamwaŵyele, nekuloŋgela nepo tamwaminsile. 25Peŋka nalitinine, nekuya mukufisa pansi italanto lyenu; ŵoneni, lyenu ndi! 26Lomba ŵawisikulu ŵalimwasucile ati: Wemupyunjisi uŵipile, wemufila, waliisiŵile ati ndateŵula nepo nsinaŵyele, nekuloŋgela nepo nsinaminsile; 27ŋga walielelwe lomba ukutwala indalama syanji kuŵamipawo, peŋka pakwisa neŵo, ŋga nalipokele isyanji nesyakuciluka-po! 28Mupokololeni lomba italanto, mumupele uyo uli nematalanto ikumi! 29Pakuti aŵo ŵonse uli nafyo fikapelwa kuli ye, naye akaŵa nefinji; sombi kuli woyo utaakwete fikapokololwa nafyefyo ifi ali nafyo. 30Muposeni posonde pamfinsi uyu-mupyunjisi walukoso: apo pakaŵa nemisowa, nekulukusumanya ameno.

31Sombi pakwiso'Mwana waMuntunsi neŵuleme bwakwe, pamo neŋkalamba syonse, lomba akekala peteŵe lyaŵuleme bwakwe. 32Peŋka pamenso akwe pakawuŋgana imisyoŵo yaŵantu yonse; lomba akaŵalekanya koti nifyopele'fyo ifi asilekanya umwembesi imbelele nembusi. 33Lomba akekalika imbelele palwine lwakwe, sombi imbusi pacipiko. 34Peŋka'po Imfumu ikalaŵila kuli ŵaŵo aŵapalwine lwaiyo ati: Iseni mwemucindeme muli ŵaTata, mupyane Uŵufumu ubwansicilwe limo pakuti pali mweŵo pampindi yakuleŋgwa kwacalo. 35Pakuti neŵo nali nensala, lomba mweŵo mwalinteŵetele ifyakulya: nali necilaka, lomba mwalimpele ifyakunwa: nali mwensu, lomba mweŵo mwalimpokelele bwino: 36nali neŵusakula, lomba mweŵo mwalimfwicile: nalukutenda, lomba mweŵo mwalukwisa mukumbona: nali mwikati, lomba mweŵo mwalukwisa kuli neŵo!

37Peŋka aŵo awaluŋgeme ŵakayasuka ati: MweŵaSikulu, mbalisa twamubweneni muli nensala, nekumuteŵeteni ifyakulya? neli muli necilaka, nekumupeleni ifyakunwa? 38Kaŵili mbalisa twamubweneni ubwensu nekumupokeleleni, neli ŵusakula nekumufwikeni? 39Nakaŵili mbalisa twamubweneni mulukutenda neli nimwikati, lomba nekulukwisa kuli mweŵo? 40Lomba Imfumu ikaŵaasuka ati: Icinenene ndukumuŵuleni ati, pakuti mwalificitile'fyo kuli umo aŵaŵyanji aŵa, naŋgawa ali ucepele lukoso, mwalificitile kuli neŵo.

41Lomba ikalaŵila nakuli ŵaŵo aŵapacipiko ati: Fumeni-po pali neŵo, mweŵafinjilwe; kamuyeni kumulilo uwamuyayaya, ukuncilwe limo pakuti pamusensesi neŋkalamba syakwe. 42Pakuti nali nensala, sombi tamwanteŵetele; nali necilaka, sombi tamwampele neŵo ifyakunwa; 43nali mwensu, sombi tamwampokelele, yo; nali neŵusakula, sombi tamwamfwicile neŵo, koku; nalukutenda nekwikala mwikati, sombi tamwaisile kuli neŵo, tau. 44Peŋka aŵo naŵo ŵakaasuka ati: MweŵaSikulu, mbalisa twamubweneni muli nensala, necilaka, neli bwensu, neli ŵusakula, neli mulukutenda, neli nimwikati, lomba fweŵo nekuŵulo'kumutaŵataŵileni? 45Lomba ikaŵaasuka ati: Icinenene ndukumuŵuleni ati, pakuti tamwaficitile'fyo kuli umo waŵaŵa, naŋgawa ali ucepele lukoso, tamwaficitile kuli neŵo. 46Lomba aŵo ŵakafuma, nekuya kwipensyo lyamulandu uwamuyayaya; sombi aŵaluŋgeme ŵakaya kumweo uwamuyayaya.

Currently Selected:

Matayo 25: AAL59

Highlight

Copy

Compare