Matayo 23
23
1Peŋka ŵaYesu ŵalilaŵile kumaŵumba nakuŵasambile ŵaŵo 2ati: A ŵalembesi neŵaFalisi ŵalekala pamupando wakwe Mose. 3Pakuti pali fyefyo, ifintu fyonse lukoso ifi ŵamuŵuleni, kamuficita, kamufilonda; sombi tekucita koti milimo yaŵo, pakuti ŵalalaŵila, nekuŵulo'kucita. 4Icine, ŵalakaka ifipinto ifilemene, ifyakukatasyo'kupinta, nekufitwika pafifusi fyaŵantu: sombi aŵene taŵaŵika-ko neli munwe umo ukufisuntula. 5Sombi imilimo yaŵo yonse ŵalecitilo'kutambwa kuŵantu; pakuti ŵalakusya ŵafulaciteli ŵaŵo, nekuŵikapo imilundo ikulu pafyakufwala fyaŵo, 6nekutemwa umupunda ucilile uŵuleme kufitenje fyafyakulya, nemipando icilile uŵuleme mumasunagoge, 7nekusekelwa pamansa syakuulila-po, nekwilikwa kuŵantu ati niLabi. 8Sombi mweŵo tekusumina ukwilikwa ati niLabi; pakuti Umusambisi wenu umo eŋka, mweŵo mwense muli wana-ŵaŋkasi. 9Kaŵili tekwiliko'muntu neli umo uwamucalo capansi ati niŵaTata: pakuti ŵaWisinwe ŵamo ŵeŋka, aŵali Kwiulu; 10neli kwilikwa ati ŵakufunda'mano: pakuti pali umo eŋka uwakumufundeni eŵaKlistu. 11Sombi uyo ucilile uŵukulu pali mweŵo eukaŵa mupyunjisi wenu. 12Nakaŵili aŵantu ŵonse ukalilemya akacefiwa; neukalicefya eukalemiwa.
13Sombi mulisyeme, mweŵalembesi namweŵaFalisi, mweŵakutumpaika! Pakuti mulesala Uŵufumu bwaKwiulu kuŵantu; pakuti mweŵene tamwinjilamo, neli kuŵasumino'kwinjila aŵalukwinjila! 14Mulisyeme, mweŵalembesi namweŵaFalisi, mweŵakutumpaika! Pakuti mulalya amaŵoni aŵamukakusyala, nakaŵili, pakuti pakutumpaika, mulatalimfye'tembelo; pakuti pali fyefyo mukapoka nekusininwa ukwakucila.
15Mulisyeme, mweŵalembesi namweŵaFalisi, mweŵakutumpaika! Pakuti mulapitana pacisiŵa ponse napamutunta ponse, mukwalululo'mutima wamuntu umo lukoso; peŋka ye, pakwaluluke'fyo, mulamwalula mwana waGeena uwakumucileni uŵuŵi kuŵili.
16Mulisyeme, mwentanjisi impofu, mwemulaŵila ati: Aŵantu ŵonse ukalape'tempuli, pape'ceŵo; sombi ukalape'golide ilyamwitempuli, uyo akaŵa nemulandu! 17Mweŵatumpile, mwempofu; pakuti cisa-cintu icaku cila, kani ligolide kani litempuli ilyaswesesye igolide? 18Nakaŵili ati: Aŵantu ŵonse ukalape'conto, pape'ceŵo; sombi ukalapo'mulambu uli pali co, uyo akaŵa nemulandu! 19Mweŵatumpile, mwempofu; pakuti cisa-cintu icakucila, kani mulambu kani conto iciswesyo'mulambu? 20Pakuti pali fyefyo, uyo ulape' conto, alalapila kumo nafyonse ifili-po. 21Kaŵili nawoyo naye ulape'tempuli, alalapila kumo naŴaŵo aŵekala mwitempuli. 22Kaŵili nawoyo naye ulape' ulu, alalape'teŵe lyaŵaLesa, naŴaŵo aŵekala-po.
23Mulisyeme, mweŵalembesi namweŵaFalisi, mweŵakutumpaika! Pakuti mulafumya-po pekumi ukuposa kuli ŵaLesa iminta naanisi nakamono, nekuŵulo'kucita ifyeŵo ificilile ukulema ifyamafunde nekusololola neŋkumbu nekucetekela. Cine'fyo filimwelelweni ukucita, sombi tekwelelwa ukuŵulo'kuficite'fi nafyo. 24Mwentanjisi impofu, mulasansa-ko akabwibwi, nekumina iŋgamela.
25Mulisyeme, mweŵalembesi namweŵaFalisi, mweŵakutumpaika! Pakuti mulaswesya pesonde lyaŋkomeci nembale, sombi mukati muliiswile ifyakukakatisya ukwakwiŵa nefyakucisya-po. 26WemuFalisi, wempofu, utaŋge uswesye mukati kaŋkomeci nembale, ati pesonde napo paswete!
27Mulisyeme, mweŵalembesi namweŵaFalisi, mweŵakutumpaika! Pakuti mulipalene nefilende ifituŵile, ifiŵoneka pesonde ati fiweme, sombi mukati muliiswile amafupa aŵantu aŵafwile, pamo nefiŵipile fyonse. 28Fyopele' fyo namweŵo, pesonde mulaŵoneka kuŵantu ati muliluŋgeme, sombi mukati muliiswile ifyakutumpaika nefyakusendama!
29Mulisyeme, mweŵalembesi namweŵaFalisi, mweŵakutumpaika! Pakuti muleŵaka ifyapafilende fyaŵakusimika, nekuwamya ifyumbwe fyaŵaluŋgeme, 30nekulaŵila ati: Ŋga twali-po isyonsiku syaŵawisifwe, ŋga tatwaŵofweleko ukupokomona imilopa yaŵakusimika! 31Pakuti pali fyefyo mulalicita ŵumboni mweŵene, ati muli ŵana ŵaŵaŵo aŵaipeye aŵakusimika.
32Isusisyeni lomba icakwesya caŵawisinwe. 33Mwensoka, mweŵana ŵaŵamakata, mukapuluka syani kukusininwa ukwakuGeena?
34Pakuti pali fyefyo ŵoneni, ndukutuma kuli mweŵo aŵakusimika neŵamano neŵalembesi; lomba aŵo ŵambi mukaŵepaya nekuŵatalika; ŵambi naŵo mukalukuŵapamawila mumasunagoge enu, nekuŵapensya ukulukuŵalondelela mumisi namisi, 35ati ikese pali mweŵo imilopa yonse iyaŵaluŋgeme, iyapokomokele pacalo capansi, ukufuma kumilopa yakwe Ebeli uluŋgeme, ukufika nakumilopa yakwe Sakaliya, umwana wakwe Balaciya, uyu mwaipaile pakati pamulenda uswetelele neconto. 36Cinenene ndukumuŵuleni ati ifintu ifyo fyonse fikesa kucitentekwa cino.
37We Jelusalemi! Welelusalemi! wewipaya aŵakusimika, nekuŵapama' mabwe aŵo aŵatuminwe kuli weŵo! Liŵili liŵili nalukufwayo'kuŵuŋganya aŵana ŵoŵe, koti nifyopele'fyo ifi inseke iŵuŋganya utwana twaiyo mumapindo, lomba mwalikene! 38Woneni, iŋanda yenu ilisyele kuli mweŵo koti yamumasala. 39Pakuti ndukumuwuleni ati tamukambona liŵili, ili tamuŋgalawila ati: Alicindeme uyo ulukwisa mwisina lyaŵaSikulu!
Currently Selected:
Matayo 23: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
