Matayo 2
2
1Pakufyalwa Yesu mumusi waBetelemi mucalo caŵena-Juda pansiku syakwe Elode imfumu, lomba ŵaliisile kuJelusalemi aŵantu aŵamano aŵafumine kumutulesuŵa, nekwipusya ati: 2Ali kulipi uyo ufyelwe nimfumu yaŵaJuda? Pakuti kumutulesuŵa twalibwene akaŵaŋgaŵaŋga kakwe, peŋka twaisa mukumulambila. 3Pakumfwe'fyo Elode imfumu, yalisusilwe ukwakuti, pamo neŵamuJelusalemi ŵonse. 4Peŋka yaliwuŋgenye aŵapapatilisi ŵonse aŵakulu neŵalembesi ŵaŵantu, nekuŵepusisya ati: Mbo'yo-Klistu akafyalwa kulipi? 5Naŵo ŵaliyasucile ati: NimuBetelemi mucalo cawena-Juda, pakuti fililembelwe kuwakusimika ifi ati:
6Nawe, weBetelemi uwamucalo caŵena-Juda,
Pamisi yamfumu syaŵena-Juda toli musi upuŵile ukucila;
Pakuti muli weŵo mukafuma imfumu,
Ikaŵa mwembesi waŵantu ŵanji aŵaIsilaeli.
7Peŋka Elode aliŵetile kumpelo aŵo aŵamano, nekumfwisya kuli ŵo iyo-mpindi ikabwenekele-mo akawaŋgawaŋga, 8Lomba aliŵatumine kuBetelemi, ati: Kamuyeni, mukafifwaye bwino-bwino fyonse ifyamwano'yo; pakumuŵona, mukese, mukambule, ati naneŵo ŋkaye mukumulambila. 9Naŵo, ili ŵaumfwile imfumu, ŵalikumbulucile; lomba nekawaŋgawaŋga, ako ŵabwene kumutulesuŵa, kaliŵatanjilile, ili takaŋgafika mukwiminina apali umwano'yo. 10Peŋka pakuŵona akawaŋgawaŋga ako, ŵalisaŋgalelenekutemwo'kwakuti. 11Kaŵenjila muŋanda, nekuŵono'mwano'yo pamo naMaJiya ŵanyina; peŋka ŵaliifuneme ukumulambila; nekukakulula amaŵoni aŵo, nekumupela imilambu, igolide nalibona namola. 12Peŋka, pakuti paku ŵacenjesya ŵaLesa mumuloto ati tekubwelela kuli Elode, ŵaliile kwaŵo insila imbi.
13Peŋka'po, pakufuma ŵo, lomba yalibwenekele kuli Josefi mumuloto iŋkalamba yaŵaSikulu ati: Ŵuka! Upinte umwano'yu naŵanyina, mufyuke, muye kucalo caIjipiti; mukalukwikele kopele uko ili nsiŋgakuwula: pakuti Elode akafwaya-fwaya umwano'yu mukumwipaya. 14Naye aliimine, nekupinto'mwana uyo naŵanyina uŵusiku, lomba ŵalukuya kucalo caIjipiti; 15kopele uko ŵaliikele ukufika nakumpindi yakufwa Elode: ati fikapelelwe pamo nafyefyo ifyalaŵile ŵaSikulu muwakusimika ati: Kucalo caIjipiti naito'mwana wanji.
16Lomba Elode, pakuŵona ati aŵoŵamano ŵantumpaika, walikalipile ukwakuti; nekutume' fita mukuŵepaya aŵana ŵonse aŵalalume aŵamumusi waBetelemi neŵamumitala monse, incece neŵalala-po imyaka iŵili, koti nimpindi yopele'yo waumfwilisye bwino kuŵamano aŵo. 17Peŋka fyalicitilwe'fyo ifyalaŵile Jelemiya uwakusimika ati:
18Isiwi lyaumfwanika kuLama,
Ukulukulila nemisowa ikulu,
Laceli alukulila aŵana ŵakwe;
Nekulukukano'kusaŋgalasiwa, pakuti ŵo papa.
19Sombi, pakufwa Elode, lomba yalibwenekele kuli Josefi kuIjipiti mumuloto iŋkalamba yaŵaSikulu ati: 20Ŵuka, upinte umwana naŵanyina, mulukuya kucalo caŵena-Isilaeli, pakuti ŵalifwile aŵo aŵalukufwayo'kwipaya umwano'yu. 21Peŋka aliimine, nekupinta umwana naŵanyina, nekufika kucalo caŵena-Isilaeli. 22Sombi, pakumfwa ati Akelao eulukwikalika icalo cawena-Juda, eupyene Elode ŵawisi, alitinine ukuyo'ko; popele, pakuti ŵaLesa ŵalimucenjesye mumuloto, alifumine-ko nekuya kucalo caGalili; 23nekufika nekwikala mumusi uwailicilwe ati niNasaleti: ati fikapelelwe pamo nemasiwi aŵalaŵile aŵakusimika ati akelikwa MuNasaleti.
Currently Selected:
Matayo 2: AAL59
Highlight
Share
Copy
Want to have your highlights saved across all your devices? Sign up or sign in
Lamba Bible Version © United Bible Societies, 1959.