Matayo 3

1Pansiku isyo aliisile Yoane uwakuŵatisya, ili asimika mumpaŋga yaŵena-Juda, ati: 2Alululeni imitima yenu, pakuti Uŵufumu bwaKwiulu bwapalamina. 3Pakuti uyo ewulya uwasimicilwe kuli Yisaya uwakusimika ati:

Isiwi lyaulukuŵilicisya mumpaŋga, ati:

Wamyeni umwakupita ŵaSikulu,

Mulunjike nensila syaŵo!

4Yoane umwine ifyakufwala fyakwe fyali fyamasako aŋgamela, nentandwe yaciseŵa paluŵunda; ifyakulya fyakwe fyali ninsye neŵuci. 5Lomba ŵaliile kuli ye aŵamuJelusalemi neŵena-Juda ŵonse, neŵamumitala iyakuJodeni; 6nekuŵatisiwa kuli ye munika yaJodeni, ili ŵafisulwile ifyakuŵifya fyaŵo. 7Sombi Yoane, ili abwene aŵaFalisi aŵenji neŵaSadukayo ŵalukwisa kukuŵatisya kwakwe, alilaŵile kuli ŵo ati: Mweŵana ŵaŵamakata! Mbaninani uwamucenjesyeni ati muŵutuke ukupuluka kuŵukali uŵukesa? 8Kamwikata lomba ifisepo ifyelelwe ukwaluluka! 9Mwilaŋguluko'kulawila mumitima yenu ati: Tuli naAblaamu wisifwe; pakuti ndukumuŵuleni ati ŵaLesa ŵali nemakosa pamabwe aya, aŋgamuwusisya aŵana Ablaamu. 10Pakuti naŵukumo naŵo akatemo kali kumisyu yamiti: peŋka imiti yonse utaulukwikate'fisepo ifiweme ula temwa nekuposwa mumulilo. 11Cinenene neŵo ndukumuŵatisyeni mumenda, akesiŵilo kakwalulula imitima, sombi uyo ulukwisa panuma panji alincilile neŵo uŵukulu, uyo iŋkwawilo syakwe nsielelwe ukusipinta; uyo akamuŵatisyeni muMupasi Uswetelele namumulilo: 12kaŵili ulupe lwakwe luli muminwe yakwe; naye akaswesya bwino pacilupwilo cakwe; peŋka akaloŋgela amasaka akwe muŵutala; sombi imisuŋgu akayoca mumulilo utosimika.

13Peŋka'po ŵaYesu ŵalifumine mucalo caGalili, nekwisa kujodeni kuli Yoane mukuŵatisiwa kuli ye. 14Sombi Yoane ati akaŵakane ati: Neŵo eneŋgelelwe ukuŵatisiwa kuli mweŵo; lomba mwaisa kuli neŵo? 15Sombi ŵaYesu ŵalimwasucile ati: Munsumine ŵukumo, pakuti ifi filitwelelwe ukukonsye'filuŋgeme fyonse. Eli aŋgawasumina. 16Pakuŵatisiwa, ŵaYesu nekwaŵuka-mo bwaŋgu mumenda: lomba neulu nekuŵesucila, peŋka ŵalibwene Umupasi waŵaLesa ulukuseluka koti niciŵa ukwisa pali ŵo; 17lomba nesiwi lyalifumine kwiulu ati: Aŵa Ŵana ŵanji aŵa ntemenwe, muli ŵo emo ndukusaŋgalala!

Currently Selected:

Matayo 3: AAL59

Highlight

Copy

Compare