Matayo 1
1
1Ibuku lyafitentekwa fyaŵaYesu Klistu, umwana wakwe Dafidi, umwana wakwe Ablaamu.
2Ablaamu alifyele Isaci, lsaci naye alifyele Yakobi, Yakobi naye alifyele Juda neŵakwaŵo. 3Juda alifyele Pelesi naSyala muli Tama. Pelesi naye alifyele Esilomi, naEsilomi naye alifyele Alama; 4Alama alifyele Aminadabi, Aminadabi naye alifyele Nasyoni, Nasyoni naye alifyele Salimoni. 5Salimoni alifyele Boasi muli Lakabi, Boasi naye alifyele Obedi muli Lufi. Obedi alifyele Jese. 6Jese naye alifyele Dafidi imfumu.
Dafidi alifyele Solomoni mumwanakasi uwaupile Uliya; 7Solomoni naye alifyele Leyoboami, Leyoboami alifyele Abija, Abija naye alifyele Asa. 8Asa alifyele Jeosafati, Jeosafati naye alifyele Jolami, naJolami naye alifyele Usaya. 9Usaya alifyele Jotami, Jotami naye alifyele Eyasi, Eyasi naye alifyele Esikaya. 10Esikaya alifyele Manase, Manase naye alifyele Amoni, Amoni naye alifyele Josaya; 11naJosaya naye alifyele Jekonya neŵakwaŵo pampindi iyo ŵatapilwe ukuŵatwala kuBabiloni.
12Peŋka, ili ŵaŵatwite kuBabiloni, Jekonya alifyele Salatieli, Salatieli naye alifyele Selubabeli, 13Selubabeli naye alifyele Abiudi, Abiudi naye alifyele Elyacimu, Elyacimu naye alifyele Asuli; 14Asuli naye alifyele Sadoci, Sadoci naye alifyele Acimu, Acimu naye alifyele Eliudi; 15Eliudi alifyele Eliasa, Eliasa naye alifyele Matani, Matani naye alifyele Yakobi, 16Yakobi uyo alifyele Josefi, umulume wakwe Maliya, umo emwafyelwe ŵaYesu, aŵelicilwe niŵaKlistu.
17Peŋka ifitentekwa fyonse ukufuma kuli Ablaamu ukufika kuli Dafidi fili ikumi nafine; kaŵili ukufuma kuli Dafidi ukufika nakukutapwo'kuŵatwala kuBabiloni, ifitentekwa fikumene ikumi nafine; nakaŵili ukufuma kukutapwa kuBabiloni ukufika nakuli ŵaKlistu, filikumene ifitentekwa ikumi nafine.
18Ukufyalwa kwaŵaYesu Klistu kwaliŵele'fi: Maliya ŵanyina, ili alukumwambisya Josefi, lomba taŵaŋgekala pamo, waliŵele nepafu lyaMupasi Uswetelele. 19Josefi, umulume wakwe, pakuti ali muntu uluŋgeme, lomba taafwaile ukumutulisya kuŵantu, ati mukane lukoso kumpelo. 20Sombi, ili acalakanya lukoso ifyo-fintu, lomba yalibwenekele kuli ye mumuloto iŋkalamba yaŵaSikulu ati: Josefi, wemwana wakwe Dafidi, witino'kuupa Maliya umukasi woŵe, pakuti ipafu ilyo emitile lyaMupasi Uswetelele. 21Kaŵili akafyalo'mwana umwalalume; peŋka ukamwilika isina lyakwe niŵaYEsu; pakuti ŵo eŵakapulusya aŵantu ŵaŵo kufyakuŵifya fyaŵo.
22Lomba fyonse'fi fyaisa-kwikala, ati fikapelelwe pamo nemasiwi ŵalaŵile ŵaSikulu muwakusimika, ati:
23Ŵoneni! Umusice uswetele akaŵa nepafu,
Nekufyalo'mwana umwalalume;
Peŋka ŵakamwilike'sina lyakwe niŵalmanweli,
Ilyakwaluka ati niŵaLesa aŵekele nafweŵo. 24Ili aŵucile mutulo Josefi, alicitile fyopele'fyo ifyamuŵulile iŋkalamba yaŵaSikulu, nekumupoka umukasi wakwe, 25sombi taamulalicile, ili taaŋgafyalo'mwana umwalalume; peŋka nekumwilike'sina lyakwe niŵaYesu.
Currently Selected:
Matayo 1: AAL59
Highlight
Share
Copy
Want to have your highlights saved across all your devices? Sign up or sign in
Lamba Bible Version © United Bible Societies, 1959.