Matayo 16

1Lomba ŵaliisile aŵaFalisi neŵaSadukayo, nekuŵesya, nekuŵalomba ati: Mutubwenesye akesiŵilo akakufuma kwi ulu. 2Sombi ŵo ŵaliŵaasucile ati: Pakufika iciŋgulo, mulalaŵila ati, Bwakuca! pakuti kwi ulu kwakasika. 3Nakaŵili ulucelo ati, Lelo teti ŵuce, pakuti kwiulu kwakasika nekufita. Muliisi ukupenda pamenso akwiulu; sombi tamwisi ukupenda utwisiŵilo twampindi. 4Icitentekwa iciŵipile, icaŵucende, cilukufwaya-fwaya akesiŵilo; sombi takakapelwa kuli co akesiŵilo kambi, sombi keŋka ako-kesiŵilo kakwe jona. Peŋka ŵaliŵasile nekukumbuluka.

5Peŋka ŵalificile kwisilya aŵasambile, sombi ŵaliluŵile-ko ukupinta siŋkwa, 6ŴaYesu ŵalilaŵile kuli ŵo ati: Cenjeleni kumusuŋga waŵaFalisi neŵaSadukayo. 7Naŵo ŵalukupikansyanya ati: Ŵalaŵilile'fyo pakuti tatupintile-po siŋkwa. 8Pakwisiŵe'fyo ŵaYesu ŵalilaŵile ati: Mweŵakucetekela kunini, mbanindo mulukupikansyanisisya, pakuti tamukwete-siŋkwa? 9Tamuŋgesiwa neli kulaŋguluka ŵasiŋkwa aŵo ŵasanu aŵalile aŵantu aŵo amasausande asanu; netutundu mwalitolele tuŋga? 10Neli niwasiŋkwa aŵo ŵasanu naŵaŵili aŵalile aŵantu aŵo amasausande ane; netutundu mwalitolele tuŋga? 11Mbanindo tamwisiŵile ati nsilaŵile kuli mweŵo ifyakuli siŋkwa? Sombi cenjeleni kumusuŋga waŵaFalisi neŵaSadukayo! 12Naŵo ŵaliisiŵile bwino ati taŵaŵaŵulile ati ŵacenjele kumusuŋga ŵasiŋkwa, sombi nikuŵusambisi bwaŵaFalisi neŵaSadukayo.

13Pakufika ŵaYesu kumitala yaKaisalia uwakuli Filipo, ŵaliŵepwisye aŵasambile ŵaŵo ati: Aŵantu ŵaleŵa ati Umwana waMuntu nsi ninani? 14Naŵo ŵalilaŵile ati: Ŵambi ati, niYoane uwakuŵatisya, ŵambi naŵo ati, niElaija, naŵambi naŵo ati, ni Ielemiya, neli wakusimika umbi naye. 15Naŵo ŵalilaŵile kuli ŵo ati: Mbamweŵo mulukuŋgewa ati ninenani? 16Peŋka Simoni Petilo waliasucile ati: NimweŵaKlistu, Aŵana ŵaŵaLesa ŵaMweo! 17Lomba ŵaYesu ŵalimwasucile ati: Ulisyucile weŵo, Simoni Ba-Jona; pakuti umunefu nemilopa tayakufisulwilile'fyo, sombi niŵaTata aŵaKwiulu eŵakufisulwilile. 18Nakaŵili ndukulaŵila kuli weŵo ati niwePetilo, peŋka peulu pacibwe ici ŋkeŵaka ikelesya lyanji; nefiiŵi ifyakuSyeoli tekuti filikomeke. 19Ŋkakupela imipinjilo yaŴufumu bwaKwiulu; fyonse'fyo ifi ukakaka pansi pano, fikakakwa nakwi ulu; nakaŵili fyonse'fyo ifi ukakakulula pansi pano, fikakakululwa nakwi ulu. 20Peŋka'po ŵaliŵacenjesye aŵasambile ati, Mwiŵula aŵantu ŵonse neli umo ati nineŵaKlistu.

21Ukufuma kumpindi iyo, ŵaYesu ŵalitaticile ukuŵulisisya kuŵasambile ŵakwe ati, Ukwelelwa ati ŋkaye kuJelusalemi, nsomenwe kufintu ifinji kuŵakulu nakuŵapapatilisi aŵakulu nakuŵalembesi, njipaiwe; peŋka pakasuŵa kaŵusitatu mbusiwe. 22Lomba Petilo aliŵatwite kumpelo, nekutatiko'kuŵakanya, nekulaŵila ati: Ifyo tefyo, mweŵaSikulu, tafikesa kuli mweŵo! 23Sombi naŵo kaŵasyoloka nekulaŵila kuli Petilo ati: Koya kunuma yanji, weSatana: weŵo uli cakuntutula neŵo; pakuti tolukwalakanya ifintu fyaŵaLesa, sombi fyaŵantunsi.

24Peŋka ŵaYesu ŵalilaŵile kuŵasambile ŵaŵo ati: Aŵantu ŵonse, ulukufwayo'kundonda neŵo, ŋgaalikanye, apinte umutaliko wakwe, alukundonda. 25Pakuti aŵantu ŵonse, ulukufwayo' kupulusyo'mweo wakwe, akaulufya: kaŵili ukaulufya umweo wakwe pakuti pali neŵo uyo eukauŵona. 26Pakuti mbomuntu akasyuka syani, kani akabwenapo icalo conse icapansi, nekuuposa umweo wakwe? Neli mbacisa-cintu ici esi umuntu ukuposa mukusitula umweo wakwe? 27Pakuti Umwana waMuntunsi akesa muŵuleme bwaŵaWisi pamo neŋkalamba syaŵo; impindi iyo akaŵacite'milandu aŵantu ŵonse koti kucita kwaŵo.

28Icinenene ndukumuŵuleni ati: Epo ŵali ŵambi aŵemakene pano, aŵataŵakomfwa-po imfwa neli panini, ili tawaŋgamuwona Umwana waMuntunsi alukwisa muŴufumu bwakwe.

Currently Selected:

Matayo 16: AAL59

Highlight

Copy

Compare