Matayo 15

1Peŋka ŵaliisile kuli ŵaYesu aŵaFalisi newalembesi, aŵafumine kuJelusalemi, ati: 2Mbanindo aŵasambile ŵenu ŵalukupulaisya ifyakutantaka ifyaŵakulu? Pakuti taŵasamba kuminwe pakulya. 3Naŵo nekuŵaasuka ati: Mbanindo namweŵo mupulaisye' funde lyaŵaLesa, pakuti pafyakutantaka fyenu? 4Pakuti ŵaLesa ŵalilaŵile ati: Utote ŵawiso naŵanoko! kaŵili ati: Uyo ulaŵisya ŵawisi neli niŵanyina ŋgaafwe! 5Sombi mweŵo ati: Aŵantu ŵonse, ukalaŵila kuli ŵawisi kani nikuli ŵanyina ati: Ifyo fyopele nati mupeleni pano ndaposa kuli ŵaLesa; 6uyo taakwete-mulandu wakutota ŵawisi. Peŋka, mwaalula lsiwi lyaŵaLesa lyalukoso pakuti pafyakutantaka fyenu. 7Mweŵakutumpaika, Yisaya walisimicile bwino ifyakuli mweŵo ati:

8Aŵantu aŵa ŵalantota neŵo kutunwa twaŵo;

Sombi imitima yaŵo ili apatali pali neŵo.

9Sombi uko ukundemya neŵo kwalukoso;

Ili ŵasambisya uwusambisi bwamafunde aŵantu.

10Peŋka ŵaliliitile iŵumba lyaŵantu, nekuwewa ati: Umfweni, mwisiŵe ati: 11Ico iciinjila mukanwa taciŵifya-muntu; sombi ico icifuma mukanwa eciŵifyo'muntu. 12Peŋka'po ŵaliisile aŵasambile nekulaŵila kuli ŵo ati: Kani tamwisi ati aŵaFalisi ŵatutulwa pakumfwa amasiwi ayo? 13Sombi ŵo ŵaliasucile ati: Imbuto syonse, isi taŵaŵyele ŵa Tata aŵaKwiulu, sikemalwa. 14Walekeni, ŵali nintanjisi impofu, Kaŵili kani impofu itanjilile impofu iŵyakwe, syoŵilo sikaponena mwikanda. 15Naye Petilo aliŵaasucile ati: Tuŵulisisyeni ukupalanya uko. 16Naŵo ŵalilaŵile ati: Namweŵo kaŵili, kansi mucili wakuwula'kalaŋgo? 17Tamwisi ati fyonse ifiinjila mukanwa filaya mumala, peŋka nekufifumya pakuya kumpaŋga? 18Sombi ifintu ifyo ififuma pakanwa filafuma mumutima; ifyo efiŵifyo' muntu. 19Pakuti mumutima mulafuma ukulaŋguluko'kuwipile, nefyakwipaya' ŵantu, nefyaŵucende, nefyaŵucencemesi, nefyakwiŵa, nefyaŵumboni ubwakuŵepa, nefyamucobwe. 20Ifintu ifyo efiŵifyo'muntu: sombi ukulya ukwakuŵulo'kusamba kuminwe takuŵifyamuntu.

21ŴaYesu ŵalifumine-ko'ko, nekuya kumi tala iyakuTulo nakuSidono. 22Lomba kusaŋga, umwanakasi umu Kanani walifumine kumitala iyo, nekuŵalilila ati: Muncitile'ŋkumbu, mweŵaSikulu, mweŵana ŵakwe Dafidi! Umwana wanji umwanakasi alukukululuko' kwakuti kuciŵanda. 23Sombi ŵo taŵamwasucile-po neli lisiwi limo. Peŋka aŵasambile ŵaŵo ŵaliisile, nekuŵakombetela ati: Mutamfyeni, pakuti alukutulo nda ili atulilila. 24Sombi naŵo ŵaliasucile ati: Nsinatuminwe ukuya kuli ŵambi, sombi kweŋka kumbelele isiluŵile isyananda yaŵaIsilaeli. 25Sombi umwanakasi uyo aliisile nekuŵalambila, nekulaŵila ati: MweŵaSikulu, muŋgofwe-ko. 26Naŵo nekwasuka ati: Tekwelelwa ukupoka ifyakulya fyaŵana, nekufipose'mbwa. 27Sombi naye ati: Cine mweŵaSikulu, pakuti nembwa nasyo silalya-ko ulunsekentwa uluponaila petebulu lyaŵawisikuluŵo. 28Peŋka ŵaYesu ŵalimwasucile ati: Wemwanakasi, ukucetekela koŵe kukulu; ficitwe kuli weŵo koti nifyopele'fyo ifi ulukufwaya. Impindi yeŋke'yo umwana wakwe walipulucile.

29Peŋka'po ŵaYesu ŵalifumine-ko' ko, nekupalamina kucisiŵa caGalili; eli ŵaninine kulupili nekwikalo'ko. 30Peŋka ŵaliisile kuli ŵo aŵantu amaŵumba akulu, aŵaleteleaŵalukusunta, nempofu, neŵasincile amasiwi, nefilema, naŵambi naŵo aŵenji, nekuŵalalika pamakasa aŵo: naŵo ŵaliŵaŵusisye: 31fyopele' fyo iŵumbe'lyo lyalikaŋkamicilwe lukoso, pakuŵona aŵasincile amasiwi ŵalukulaŵila, nefilema fyakosa, neŵalukusunta ŵalukwenda bwino, nempofu silukulaŵa; peŋka lyaliŵalemesye ŵaLesa ŵaŵaIsilaeli.

32Lomba ŵaYesu ŵaliŵetile aŵasambile ŵaŵo nekulaŵila ati: Umutima wanji ulukupopomenwa peŵumbe'li, pakuti ŵukumo syakumana insiku sitatu isi ŵalukwikala naneŵo, lomba taŵakwete neli kakulya; peŋka nsilukufwayo'kuŵatuma nensala, ŵeŋgalesuka pansila. 33Popele aŵasambile ŵalilaŵile kuli ŵo ati: Tuŵafumye kwisa muno mumpaŋga wasiŋkwa aŵenji aŵakwikuta iŵumba ilikulu ilyakuŵe'fi? 34Popele ŵaYesu ŵaliŵepwisyeati: Ŵasiŋkwa ŵaŋga muli naŵo? Naŵo ati: Ŵasanu naŵaŵili, pamo netusaŵi tunini utuce. 35Peŋka ŵaliŵaŵulile aŵantu, iŵumbe'lyo, ati ikaleni pansi. 36Lomba ŵaliŵulile ŵasiŋkwa aŵo ŵasanu naŵaŵili netusaŵi pamo; nekutota, nekukumala, eli ŵaŋgawapela aŵasambile, naŵo aŵasambile nekupelaika amaŵumba ayo. 37Naŵo ŵonse ŵalilile nekwikuta. Peŋka'po ŵalitolele ifyasyele-po ifyakumacile-ko ututundu tusanu natuŵili utwiswile. 38Aŵo aŵalile aŵalalume ŵalikumene amasausande ane, neŵanakasi neŵanice peulu. 39Lomba ŵalitumine amaŵumba, nekwicila mubwato, peŋka nekufika nakumi tala yaMagadala.

Currently Selected:

Matayo 15: AAL59

Highlight

Copy

Compare