Matayo 11

1Peŋka'po, ili ŵasilile ŵaYesu ukuŵaŵula aŵasambile ŵakwe, aŵo ikumi naŵaŵili, ŵalifumine uko mukusambisya nekusimika mumisi yaŵo.

2Lomba Yoane mwikati, ili aumfwile ifyamilimo yaŵaKlistu, alitumine aŵasambile ŵakwe ŵambi mukwipusya ati, 3Kani muli ŵaŵo aŵasimicilweati ŵakesa? Kani tupembelele ŵambi naŵo? 4ŴaYesu ŵaliŵaasucile ati: Kamuyeni, mumuŵule Yoane ifyafintu ifyo ifi mulukumfwa nekuŵona: 5impofu silukupoka ukulaŵa kwasisyo, nefilema nafyo filukwenda, neŵamanata naŵo ifilonda fyaŵo filukuposiwa, neŵasincile amatwi naŵo ŵalukumfwa, neŵafwile naŵo ŵalukuŵusiwa, newapeŋgele naŵo ŵalukuŵulisisiwa leeŵo Iciweme. 6Popele alisyucile uyo utaakaŵona muli neŵo icakulitutula. 7Peŋka, pakukumbuluka aŵo, ŵaYesu ŵalitaticile ukulaŵila kumaŵumba aŵantu ifyakwe Yoane ati: Mbanindo mwailile mumpaŋga mukuŵona? Kani litete ilyateŋkene kucipupu? 8Sombi mbanindo mwailile mukuŵona? Kani muntu ufwite ifyakufwala ifinacile? Umfweni! Aŵo aŵafwala ifinacile ŵalekala mumananda amfumu, 9Sombi mbanindo mwailile? Kani mukuŵona uwakusimika? Inya, ndukumuŵuleni ati wakucilo'kwakuti napawakusimika! 10Uyu ewoyo ifyakwe fyalembelwe ati:

Wona! Ndukutuma iŋkalamba yanji pamenso oŵe,

Yopele'yo eikawamye'nsila ukukutanjilila.

11Icinenene ndukumuŵuleni ati pali ŵaŵo aŵafyelwe kuŵanakasi, taaŋgawuka uwakucilo'ŵukulu pali Yoane uwakuŵatisya: naŋgawe'fyo uyo munini lukoso muŴufumu bwaKwiulu, uyo eucilile pali ye. 12Kaŵili ukufuma kunsiku syakwe Yoane uwakuŵatisya nakukuno, Uŵufumu bwaKwiulu ŵulukumfwa ifyacitala, neŵacitala naŵo ŵalukubwikatisya necitala. 13Pakuti aŵakusimika ŵonse nemafunde pamo alukusimika ukufika kuli Yoane. 14Peŋka kani mulukusumino'kumfwe'fi, uyu niElaija, uyo usimicilwe ati akesa. 15Uyo uli nematwi akumfwa, ŋgaomfwe!

16Sombi mbanakupalanya nendo icitentekwa ici? Cilipalene neŵanice aŵalukwikala pamansa syakuulila-po, aŵalukuŵilicisya kuŵaŵyaŵo, 17nekulaŵila ati: Fweŵo twalukumulisisyeni imisembe, sombi mweŵo ukusyana mweŵone; twalukulile'misowa fweŵo, sombi mweŵo ukulila mweŵone! 18Pakuti Yoane aliisile uwakuŵulo'kulya neli kunwa, peŋka ŵalalaŵila ati, Ali neciŵanda! 19Umwana waMuntunsi ye aliisile alukulya nekunwa, peŋka ŵalalaŵila ati, Ŵoneni nipumpunta, ulukunwe'mfaina, ciŵusa cawasoŋkesi nembifi! Sombi amano alisuminwe ati aliluŋgeme kumilimo yao.

20Popele apo ŵaYesu ŵalitaticile ukwipatila imisi iyo iyi ŵacitile-mo ifimpelampela fyaŵo ifinji, pakuti tayalapile-po, 21ati: Ulisyeme, weKolasini! Ulisyeme, weBesaida! Pakuti imilimo iyo ikulu, iyacitilwe muli mweŵo, ŋga yalicitilwe muTulo namuSidono, ŋga kale ŵasasile mufyacikundulu namumatoi. 22Naŋgawe'fyo ndukumuŵuleni ati pakasuŵa kakusololole'milandu, fikaŵa fyansuminino kuTulo nakuSidono ukucila napali mweŵo. 23Naweŵo, weKapanaumi, kani ukasuntulwa kwiulu? Ukaya pansi paSyeoli; pakuti imilimo iyo ikulu iyacitilwe muli weŵo, ŋga yalicitilwe muSodoma, umusi uyo ŋga waliikele ukufika nakukasuŵa kano. 24Naŋgaŵe'fyo ndukumuŵuleni ati fikaŵa fyansuminino kucalo caSodoma ukucila napali weŵo pakasuŵa kakusololola imilandu.

25Impindi iyo ŵaYesu ŵaliasucile, nekulaŵila ati: Ndukumutoteni, mweŵaTata, mweŵaSikulu ŵaKwiulu napansi, pakuti mwalifisile ifi-fintu kuŵamano awakalaŋgo, nekufifisulwila kuncece. 26Inya Tata, ifyo fyaliweme pamenso enu. 27Ifintu fyonse fyalipelwe kuli neŵo kuminwe yaŵaTata; lomba tapalipo umuntu umwisi Umwana, sombi niŵaTata ŵeŋka; neli uŵesi ŵaTata, sombi Mwana eŋka, nawoyo ualukufwaya Umwana ukuŵabwenesya.

28Iseni kuli neŵo, mwense mwemwakatala kumilimo nefipinto ifilemene; eli nakumupeleni ukutusya. 29Litwikeni icikoŋkoli canji, musambile kuli neŵo; pakuti neŵo nditekenye, ndilicefesye mumutima; peŋka mukaŵona ukutusya kwamipasi yenu. 30Pakuti icikoŋkoli canji ciliweme; icipinto canji cilipuŵile.

Currently Selected:

Matayo 11: AAL59

Highlight

Copy

Compare