Ifya Ŵalefai 7
7
1Kaŵili ili lifunde lyamulambu wamulandu: uswetelele swete. 2Apopantu popele apo ŵepaila umulambu uwakoca, epo kawili ŵakepaile nemulambu wamulandu; lomba imilopa yauko akaisanse paconto ponse ponse. 3Kaŵili akapose nemafuta auko onse; umucila unonene, nemafuta afimba-po pafyamukati, 4nemfyo syoŵilo, nemafuta ali pali syo, ali apepi paluŵunda, nalwisalila uli paciŵu, pamo nemfyo, akafifumye fyonse; 5peŋka umupapatilisi akafyoce paconto, ati mulambu uwamumulilo uwakuli ŵaYawe: mulambu wamulandu. 6Aŵapapatilisi aŵalalume ŵonse eŵakalye-po; ukalilwe pantu apaswetelele swete; uliswetelele swete lukoso. 7Koti mulambu wapafyakuŵifya, koti nifyopele'fyo ekuli umulambu wamulandu; pali ifunde limo lukoso pali yo; umupapatilisi ucitila-ko ukulamwina eukalukuli nawo. 8Kaŵili umupapatilisi uposa umulambu wamuntu uwakoca, umupapatilisi uyo eukalipokela iciseŵa camulambu uwakoca uyo aposele. 9Kaŵili imilambu yonse iyaŵuŋga ubwakoca mwisiko, nafyefyo fyonse ificitilwe pambale yakusalwila-po, namunoŋgo yakocela-mo, fyonse fikalukuli fyamupapatilisi uwakufiposa. 10Kaŵili imilambu yawuŋga yonse, kani wusaŋkene nemafuta, kani ŵuumine lukoso, aŵana ŵakwe Aloni aŵalalume ŵonse eŵakalukuli nayo yonse yonse.
11Kaŵili ili lifunde lyaku posa kwamilambu yaŵutende, uko umuntu aŋgaŵaposela ŵaYawe. 12Kani akupose ati atote, popele akapose pamo nekuposa kwakutota ifimpwampwa ifyakuŵulo' musuŋga ifisaŋkene nemafuta, nefimbala ifyakuwulo'musuŋga ifisufisiwe nemafuta, nemikate isaŋkene nemafuta, iyawuŋga uŵupelekele bwino ubwakwaŵikwa. 13Pamo nemikate yasiŋkwa wamusuŋga epo akapose umulambu wakwe nekuposa kwamilambu yakwe iyaŵutende pakutota. 14Kaŵili ifyafyefyo akaŵaposele ŵaYawe cimo pamilambu yonse ati mulambu uwakusuntula, ukalukuli wamupapatilisi usanse' milopa yamulambu waŵutende. 15Kaŵili iminefu yaku posa kwamilambu yakwe iyaŵutende pakutota ikaliwe pakasuŵa kamulambu wakwe; tesi asile neli kantu kaiyo ukufiko'lucelo. 16Sombi kani ukuposa kwamulambu wakwe kulapa kani mulambu uposelwe koti mutima, ukaliwe pakasuŵa ako aposela-po umulambu wakwe; popele ŋgamailo ifyo ifyakusyala-po fikaliwe; 17sombi ifyo ifyakusyala-po ifyaminefu yamulambu pakasuwa kawusitatu ikociwe mumulilo. 18Lomba kani fimbi ifyaminefu yaku posa kwamilambu yakwe iyaŵutende filiwe pakasuwa kaŵusitatu, tesi kukapokwe neli kweŵelwa kuli woyo ukuposa; kukalukuli cipakaŵi, kaŵili umuntu uyo uwakulya-ko eukapinta ukusendama kwakwe. 19Kawili iminefu iyo iyakukuma-ko kucintu iciŵipile tesi ikaliwe; ikociwe mumulilo. Naŋgawe'fyo ŵonse aŵaswetele ŵakalye-ko kuminefu iyo. 20Sombi umuntu uyo uwakulya iminefu yakuposa kwamilambu yaŵutende, iyakuli ŵaYawe, kani ali nekuŵipa kwakwe pali ye, umuntu uyo eukapinikwa pakati paŵantu ŵakwe. 21Kaŵili awantu ŵonse uyo ukakuma-ko kucintu iciŵipile, kani nikukuŵipa kwamuntu, kani ninama iŵipile, kani cipakaŵi cimbi iciŵipile, popele nekulya kuminefu yakuposa kwamilambu yaŵutende iyakuli ŵaYawe, umuntu uyo eukapinikwa pakati paŵantu ŵakwe.
22Popele ŵaYawe ŵalilaŵile kuli Mose ati: 23Laŵila kuŵalsialeli, ati: Tesi mulye amafuta neli aŋombe, neli ambelele, neli ambusi. 24Kaŵili amafuta ayeyo iyakulifwila, nemafufa ayeyo iyakupandalwa kufilwani, onse aŋgacitwa pamilimo imbi yonse; sombi tesi mulye-ko neli panini. 25Pakuti aŵantu ŵonse uyo ulya amafuta anama, iyo ŵaŵaposela ŵaYawe aŵantu umulambu uwamumulilo, uyo-muntu wopele uwakulya-ko eukapinikwa pakati paŵantu ŵakwe. 26Kaŵili tesi mulye-po milopa yonse, neli yacuni neli yanama, mumananda enu onse. 27Aŵantu ŵonse uyo uwakulya imilopa, uyomuntu eukapinikwa pakati paŵantu ŵakwe.
28Lomba ŵa Yawe ŵalilaŵile kuli Mose ati: 29Laŵila kuwa Isilaeli ati, Uyo uŵaposela ŵaYawe umulambu wakuposa kwakwe ukwaŵutende eukaleta impese yakwe kuli ŵaYawe iyapamulambu wakuposa kwakwe ukwaŵutende: 30muminwe yakwe umwine akaŵaletele ŵaYawe ifyakuposa ifyamumulilo; akalete amafuta pamo nentiŵi, ati intiŵi ikasuntulwe ati mulambu wakusuntula pamenso aŵaYawe. 31Popele umupapatilisi akaoce amafuta paconto; sombi intiŵi ikalukuli yakwe Aloni neŵana ŵakwe aŵalalume. 32Kaŵili akasolo akakulwine mukamupele umupapatilisi ati kuposa kwakusuntula ukwapamilambu yakuposa kwenu ukwaŵutende. 33Uyo uwapaŵana ŵakwe Aloni aŵalalume, uposa imilopa yakuposa kwaŵutende nemafuta, eukapoka akasolo akakulwine ati cakwaŵana cakwe. 34Pakuti intiŵi yakukupala nekasolo kakusuntula nafipoka kuŵaIsilaeli kumilambu yakuposa kwaŵo ukwaŵutende, nekuŵapela Aloni umupapatilisi neŵana ŵakwe aŵalalume ati cakupa caŵo icamuyayaya icakufuma kuŵaIsilaeli. 35Ici cakwaŵana icakusuŵa icakwe Aloni necakwaŵana icakusuŵa caŵana ŵakwe, icamilambu iyakuli ŵaYawe iyamumulilo, pakasuŵa ako aiposele mukuŵapyunjila ŵaYawe paŵupapatilisi; 36ico ŵaYawe ŵafundile ati ŋgacipelwe kuŵaIsilaeli, pakasuŵa ako ŵaŵasufisye. Cakupa icamuyayaya ponse pafitentekwa fyaŵo. 37Ilyo lifunde lyamulambu wakoca, nelyamulambu wawuŋga, nelyamulambu uwapafyakuŵifya, nelyamulambu uwapamulandu, nelyakuliposa, nelyakuposa kwamilambu yaŵutende; 38ilyo ŵamufundile Mose ŵaYawe palupili lwaSinai, pakasuŵa ako ŵaŵafundile aŵaIsilaeli ati ŵaŵaposele ŵaYawe imilambu yaŵo pampanta iyakuSinai.
Currently Selected:
Ifya Ŵalefai 7: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
