Ifya Ŵalefai 6
6
1Kaŵili ŵaYawe ŵalilaŵile kuli Mose ati: 2Kani umuntu aŵifye, aŵapulaisisye ŵaYawe, amutumpaike umuŵyakwe ifyafyefyo ifi amupele ati ndamine, neli fyafyefyo ifi alayene nakwe, neli fyakwiŵa, neli fyakumupensya umuŵyakwe; 3neli kutole'fyo ifyaluŵile nekutumpaika ifyafyefyo, nekulapa ifyaŵufi; pakucite'fyo fyonse umuntu, ili aŵifya; 4lomba pakaŵe ati, kani aŵifya, kani ali nemulandu, akabwesye ifyo ifi apokolwele ukwiŵa, neli niceco ici apokele pakupensya, neli niceco ici apelwa ati ndamine, neli niceco icaluŵile ico atolele, 5neli cintu cimbi ico alapile ukwakutumpaika; akafibwesye fyonse ifiŵuluŵulu; akalunde-po kaŵili nacimo pali fisanu; akafipele kumwine wafifyo, pakasuŵa ako abwenekele-po ati ali nemulandu. 6Kaŵili akaŵaletele ŵaYawe nemulambu wakwe uwamulandu, imbelele iyalalume iyakuwule'fisemba iyapetaŋga, koti ku penda koŵe, koti mulambu wamulandu, akaulete kumupapatilisi; 7lomba umupapatilisi akamucitile ukulamwina pamenso aŵaYawe, naye eli kuŋgamufitulucilwa, ifyafyefyo fyonse ifi alukucita ukwakuŵa nemulandu.
8Kaŵili ŵaYawe ŵalilaŵile kuli Mose ati: 9Uŵafunde Aloni neŵana ŵakwe aŵalalume ati, ifunde lyamulambu uwakoca nilili: umulambu uwakoca ukalukuli pesiko paconto uŵusiku ŵonse ukufiko'lucelo; kaŵili umulilo uwapaconto ukalukwacila-po impindi iyo yonse. 10Lomba umupapatilisi akafwale icakufwala cakwe icansalu, naŵakaputula ŵakwe aŵansalu naŵo akafwale pamunefu wakwe; eli akatole amatoi amulambu uwakoca uwapile paconto, akaateke mumbali yaconto. 11Eli akafule ifyakufwala fyakwe, afwale nafimbi ifyakufwala, afumye amatoi pesonde lyacisasa ukwatwalila ukuswetele. 12Kawili umulilo uli paconto ukalukwacila-po, tesi usimike; popele incelo syonse umupapatilisi ukalukoca-po iŋkuni: naye akateke-po ukuluŋgeme umulambu uwakoca, akocele-po kaŵili nemafuta amilambu yaŵutende. 13Umulilo ukalukwaka paconto impindi yonse; tesi usimike.
14Kaŵili ili lifunde lyamulambu waŵuŋga: aŵana ŵakwe Aloni aŵalalume ŵakauposa pamenso aŵaYawe, pamenso paconto. 15Naye akaŵule-po ifyakwisusyo'lupi ifyaŵuŋga uwupelekele bwino ubwapamulambu wawuŋga, nefyapamafuta aku ko, pamo nalibona wonse uli pamulambu wawuŋga, afyoce paconto ati kunuŋka ukuweme, cakwanusya cakuko, cakuli ŵaYawe. 16Lomba nafyefyo ifyakusyala-po Aloni neŵana ŵakwe aŵalalume eŵo ŵakafilye-po. Fikalilwe Ifyakuwulo'musuŋga pantu apaswetelele; paluŵansa ulwakwisema lyewuŋgano epo ŵakafilila. 17Tesi fikociwe nemusuŋga. Nafipela ati fyakwaŵana fyawo pamilambu yanji iyamumulilo; fiswetelele swete, koti mulambu uwapakuŵifya, nakoti mulambu uwapamulandu. 18Aŵalalume ŵonse paŵana ŵakwe Aloni eŵo ŵakafilye-po, koti fyelelwe ŵo insiku syonse lukoso pafitentekwa fyenu fyonse, ifyapamilambu iyakuli ŵaYawe iyamumulilo; ŵonse aŵo aŵakutinta-po pali fyo ŵakalukuswetelele.
19Kaŵili ŵaYawe ŵalilaŵile kuli Mose ati: 20Uyu mulambu wakwe Aloni neŵana ŵakwe aŵalalume, uyo ŵakaŵaposela ŵaYawe pakasuwa akakusufiwa ye; cimo pekumi lyakwe efa wawuŋga uŵupelekele bwino ati mulambu wawuŋga uwansiku syonse; iyafu ulucelo, neyafu limbi iciŋgulo, 21Ukacitwe nemafuta munoŋgo yakocela-mo; pakwaŵikwa ukawinjisye; ifipeswa ifyakoca ukapose umulambu wawuŋga ati kunuŋka kwanse ukwakuli ŵaYawe. 22Lomba umupapatilisi usufisiwe, ukalukuli pamupunda wakwe, uwapaŵana ŵakwe aŵalalume eukauposa; koti kulayana ukwamuyayaya ukalukupililila ukuŵocela ŵaYawe. 23Kaŵili imilambu yawuŋga yonse ikalukupililila; tesi ikaliwe.
24Kaŵili ŵaYawe ŵalilaŵile kuli Mose ati: 25Ulaŵile kuli Aloni nakuŵana ŵakwe aŵalalume, ati: Ili lifunde lyamulambu wakuŵifya: apo apakwipailwa umulambu wakoca, epo pakepailwe nemulambu wakuŵifya pamenso aŵaYawe: uswetelele swete. 26Umupapa tili si uyo uuposa pakuti pakuŵifya eukaulya; pantu apaswetelele epo ukaliwe, paluŵansa pesema lyewuŋgano. 27Ifintu fyonse icakukuma-ko kumunefu wauko cikalukuswetelele; kaŵili kani kukasanswa imilopa yauko pacakufwala, ukacisamfye ico icisansilwe-po pantu apaswetelele. 28Sombi inoŋgo yeloŵa iyo waaŵicilwa-mo ikatobwe; kaŵili kani waaŵicilwa-mo munoŋgo yaluŵemba, iyo ikakutalwe ikaswesiwe mumenda. 29Aŵalalume ŵonse ŵaŵapapatilisi ŵakalye-po: uswetelele swete. 30Sombi imilambu yakuŵifya, imilopa yauko yainjisiwa mwisema lyewuŋgano mukulamwina umo umuswetelele swete, tesi uliwe; ukapye lukoso mumulilo.
Currently Selected:
Ifya Ŵalefai 6: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
