Ifya Ŵalefai 19
19
1Popele ŵaYawe ŵalilaŵile kuli Mose ati: 2Ulaŵile kwiŵumba lyonse lyaŵaIsilaeli, uŵaŵule ati, mukalukuswetelele; pakuti neŵo neŵaYawe Lesa wenu ndiswetelele.
3Mwense lukoso mukalukuŵatina ŵawisinwe naŵanyinenwe; kaŵili mukalukulama wasabata ŵanji: nineŵaYawe Lesa wenu.
4Tekwalucila kufiŵumbwaŵumbwa, neli kuli citila ŵalesa ŵacela icakusuŋgulula: neŵo nineŵaYawe Lesa wenu.
5Kaŵili pakuŵaposela ŵaYawe umulambu wafyakuposa ifyaŵutende, mukaupose ati mukapokwe. 6Ukaliwe pakasuŵa ako kopele aka mulukuposa, naŋgamailo; popele kani fimbi nekusyala-po ukufika akasuŵa kaŵusitatu, fikociwe mumulilo. 7Lomba kani filiwe neli panini pakasuŵa kaŵusitatu, kansi cipakaŵi; tesi fipokwe; 8sombi aŵantu ŵonse ulya-po akapi nte uku sendama kwakwe, pakuti apusyanya icintu caŵaYawe iciswetelele; popele uyomuntu akapinikwe pakati paŵantu ŵakwe.
9Kaŵili ili mukateŵula ifyakulya ifyamucalo cenu, tesi ukateŵulisye lukoso pamakoŋko onse eŵala lyoŵe neli kuloŋgela ifyakupupula lukoso ifyafyakulya fyoŵe. 10Kaŵili tesi ukapupule mwiŵala lyoŵe lyamifaina, neli kutola ifisepo ifyakupona ifyamwiŵala lyoŵe ilyamifaina; ukaŵasile awapeŋgele neŵensu: neŵo nineŵaYawe Lesa wenu.
11Tesi mwiŵe; neli kucite'fyakutumpaika, neli kuŵulansyanya ifyaŵufi. 12Kaŵili tesi mukalape isina lyanji ukwakuŵepa, ati upusyanye isi na lyaŵaLesa ŵoŵe: neŵo nineŵaYawe.
13Tesi upensye umuŵyoŵe, neli kumwiŵila ifintu fyakwe; ifyakulambula ifyamupyunjisi uwakufolwa tesi fiikale naweŵo uŵusiku ŵonse ukufiko'lucelo.
14Tesi ufiŋge aŵasincile amatwi, neli kusiteya impofu necakulitutula; sombi ukatine ŵaLesa ŵoŵe: neŵo nineŵaYawe.
15Tesi mukacite ifisendene fyonse pakusololola; tesi ulaŋguluke uŵuntu bwawapeŋgele, neli kucindika uŵuntu bwaŵamakosa; sombi ukasololole nemuŵyoŵe nekuluŋgama.
16Tesi ukalukwenda-enda pakati paŵantu ŵoŵe ili ucita ŵucilumanyabwitondo; neli kwimakana lukoso lomba umuŵyoŵe ati afwe: neŵo nineŵaYawe.
17Tesi umufitilwe umukwanu mumutima woŵe; ukamukanye icine umuŵyoŵe, tesi uŵifye pakuti pali ye.
18Tesi ukacite umulandu, neli kuŵalamina ukuŵafitilwa aŵana ŵaŵantu ŵoŵe, sombi ukamutemwe umuŵyoŵe koti kulitemwa wemwine: neŵo nineŵaYawe. 19Mukalukulama amafunde anji.
Tesi ukasumine ati inama syoŵe silale nesyamukoka umbi; tekuti uŵyale mwiŵala lyoŵe imbuto syamikoka iŵili; kaŵili tesi ufwale icaku fwala icicitilwe kufintu fyamikoka iŵili ifipataŋkene.
20Kaŵili aŵantu ŵonse uwakulala nemwanakasi umusya ulukwambisiwa, utaaŋgaluwuka, utaaŋgawa mwana-waŵene; ŵakaŵa nemulandu, sombi tesi ŵakepaiwe pakuti umwanakasi taali mwana-waŵene. 21Popele umwalalume akaletele ŵaYawe ukuposa kwakwe ukwa pamulandu, kumulyaŋgo uwakucitente cewuŋgano, imbelele iyalalume ati kuposa ukwapamulandu. 22Popele umupapatilisi akamucitile ukula mwina nembelele iyalalume iyakuposa ukwapamulandu pamenso aŵaYawe pakuti pafyakuŵifya ifyo acitile; naye akafitulucilwa pakuti pafyakuŵifya ifyo acitile.
23Kaŵili ili mukenjila mucalo, nekulimba imiti yamikoka yonse ati fyakulya, eli mukafyeŵe ifisepo fyaiyo ati kuŵulo' kucitwe'cisilamu kwaiyo: imyaka itatu iyo-miti ikalukumuŵeleni koti yakuŵulo'kucitwe'cisilamu; ifisepo tesi fikaliwe. 24Sombi pamwaka waŵuine ifisepo fyakuko fyonse fikalukuswetelele, ifyakuŵalemya ŵaYawe. 25Popele pamwaka waŵuisanu mukalukulya kufisepo fyakuko, ati fimupeleni ukufula kwakuko: neŵo nineŵaYawe Lesa wenu.
26Tesi mukalye icintu pamo nemilopa; kaŵili tesi mucite ifyakuŵuka neli kupende'mbiko. 27Tekuti mukaŵeye ukusiŋgulusya mumpelo yamitwi yenu, neli kuŵifya impelo syamwefu woŵe. 28Tekuti mucite inembo pamunefu wenu pakuti paŵafwile, neli kulilembelela ifyakulemba lukoso: neŵo nineŵaYawe.
29Tekupusyanya umwana woŵe umwanakasi mukumwalula ati mucencemesi; necalo kaŵili nekwisula ŵumbifi. 30Mukalukulama ŵasabata ŵanji; mukalukupatonda pantu panji apaswetelele: neŵo nineŵaYawe.
31Tekupasucila kuŵawililwe imipasi neli nikumfwiti; tekuŵafwaya-fwaya mwiŋgesa kuŵa nefiko kuli ŵo: neŵo nineŵaYawe Lesa wenu.
32Ukeminine pamenso awamfwi, ukacindike pamenso pamucekulu, kaŵili ukatine ŵaLesa ŵoŵe: neŵo nineŵaYawe.
33Kaŵili kani umwensu nekwikala nenu mucalo cenu, tekuti mukamucitile ifyakuŵifya. 34Umwensu uwakwikala nenu akalukumuŵeleni koti waku fyalwa pakati pali mweŵo; ukalukumutemwa koti kuli temwa wemwine; pakuti mweŵo mwali ŵensu mucalo caIjipiti: neŵo nineŵaYawe Lesa wenu.
35Tekuti mucite ifyakusendama pakusololola napakwesya umusinso nekulema neŵukulu. 36Mukalukuli nefyakwesya ifiluŋgeme, nefyapesikelo ifiluŋgeme, naefa uluŋgeme, nacini uluŋgeme: neŵo nineŵaYawe Lesa wenu aŵamufumisyeni mucalo caIjipiti. 37Lomba mukalukulama amafunde anji onse, nekusololola kwanji konse, nekulukukucita: neŵo nineŵaYawe.
Currently Selected:
Ifya Ŵalefai 19: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
