Ifya Ŵalefai 15
15
1Popele ŵaYawe ŵalilaŵile kuli Mose nakuli Aloni ati: 2Mulaŵile kuŵaIsilaeli, muŵaŵule ati, Kani umwalalume ali neŵulwele bwakuswa mumunefu wakwe, ali nefiko pakuti pakuswa kwakwe. 3Lomba ifiko fyakwe ifyapakuswa kwakwe fikalukuli nififi: naŋgaŵa'ti umunefu wakwe ukuŋke pamo nekuswa kwakwe, naŋgawa'ti umunefu wakwe ucileke pakuswa kwakwe, fiko fyakwe. 4Amalo onse apo aŋgalukulala uyo uli nekuswa akalukuli nefiko; kaŵili ifintu fyonse apo aŋgalukwikala fikalukuli nefiko. 5Popele aŵantu ŵonse uwakukuma-ko kuŵulo bwakwe eukasamfya ifyakufwala fyakwe nekusamba mumenda, nekulukuli nefiko ukufika iciŋgulo. 6Kaŵili uyo uwakwikala pacintu apo alukwikala uyo uli nekuswa eukasamfya ifyakufwala fyakwe, nekusamba mumenda, nekulukuli nefiko ukufika iciŋgulo. 7Kaŵili uyo uwakukuma-ko kumunefu wawoyo uli nekuswa eukasamfya ifyakufwala fyakwe, nekusamba mumenda, nekulukuli nefiko ukufika iciŋgulo. 8Kaŵili kani uyo uli nekuswa amusipile nemate umuntu uswetele; lomba uyo eukasamfya ifyakufwala fyakwe, nekusamba mumenda nekulukuli nefiko ukufika iciŋgulo.
9Kaŵili ifyakwikala-po ifyapanama fyonse kani uli nekuswa waendela-po efikalukuli nefiko. 10Kaŵili aŵantu ŵonse uwakukuma-ko kufintu fyonse ifyali pansi pali ye, eukalukuli nefiko ukufika iciŋgulo; nawoyo kaŵili uwakupinta ifyo-fintu eukasamfya ifyakufwala fyakwe, nekusamba mumenda, nekulukuli nefiko ukufika iciŋgulo, 11Kaŵili aŵantu ŵonse kani uli nekuswa nekukuma-ko kuli ye lomba taaŋgasamba nakuminwe, uyo lomba eukasamfya ifyakufwala fyakwe, nekusamba mumenda, nekulukuli nefiko ukufika iciŋgulo. 12Kaŵili Iciŋkoloŋkolo celoŵa icakukumwa-ko kuli woyo uli nekuswa ecikatobwa. 13Lomba uyo uli nekuswa pakuposiwa kukuswa kwakwe, eli akalipendele insiku sisanu nasiŵili pakuti pakuswesiwa kwakwe, akasamfye ifyakufwala fyakwe; peŋka akasambe nakumunefu wakwe mumenda alukukuŋka, nekulukuswetele. 14Popele pakasuŵa kaŵusisanu nasitatu akalipokele ŵasikampele ŵaŵili neli twana twaŋkulimba tuŵili, akese pamenso aŵaYawe kumulyaŋgo uwakwisema Iyewuŋgano, amupele umupapatilisi; 15peŋka umupapatilisi akafipose, cimo ati kuposa ukwapafyakuŵifya, nacimbi naco ati kuposa ukwakoca; popele umupapatilisi akamucitile ukulamwina pamenso aŵaYawe pakuti pakuswa kwakwe.
16Kaŵili umwalalume kani amalume akwe nekuswa lukoso kuli ye, eli akasambe mumenda ponse pamunefu wakwe, nekulukuli nefiko ukufika iciŋgulo, 17Popele ifyakufwala fyonse nefiseŵa fyonse apali amalume efikasamfiwa nemenda, nekulukuli nefiko ukufika iciŋgulo, 18Kaŵili kani umwalalume alale nemwanakasi nemalume, ŵoŵilo ŵakasambe mumenda, nekulukuli nefiko ukufika iciŋgulo.
19Kaŵili kani umwanakasi nekulukuli nekuswa, lomba ukuswa kwakwe ukwamumunefu wakwe nekulukuli milopa, akalukuli mukusesa kwakwe insiku sisanu nasiŵili; lomba aŵantu ŵonse uwakukuma-ko kuli ye eukalukuli nefiko ukufika iciŋgulo, 20Popele ifintu fyonse apo aŋgalukulala mufiko fyakwe efikalukuli nefiko; ifintu fyonse kaŵili apo aŋgalukwikala akalukuli nefiko. 21Lomba aŵantu ŵonse uwakukuma-ko kuŵulo bwakwe eukasamfya ifyakufwala fyakwe, nekusamba mumenda, nekulukuli nefiko ukufika iciŋgulo. 22Kaŵili aŵantu ŵonse uwakukuma-ko kufintu fyonse apo aŋgalukwikala umwanakasi uwakuŵe'fyo eukasamfya ifyakufwala fyakwe, nekusamba mumenda, nekulukuli nefiko ukufika iciŋgulo. 23Lomba kani nipaŵulo kani nipafintu fyonse apo aŋgalukwikala, pakukuma-ko umuntu akalukuli nefiko ukufika iciŋgulo, 24Kaŵili kani umwalalume alale nakwe, lomba nekusesa kwakwe nekwisa pali ye, uyomwalalume akalukuli nefiko insiku sisanu nasiŵili; kaŵili amalo onse apo aŋgalukulala akalukuli nefiko.
25Kaŵili kani umwanakasi ali nekuswa kwamilopa yakwe insiku isinji isitasili pampindi yakusesa kwakwe, neli kani ali nekuswa ukucila-po napampindi yakusesa kwakwe; lomba insiku syonse isyakuswa kwafiko fyakwe akalukuli koti nipansiku syakusesa kwakwe: kansi ali nefiko. 26Amalo onse apo alukulala insiku syonse isyakuswa kwakwe akalukumuwela koti ŵulo bwakusesa kwakwe: kaŵili fyonse ifintu apo alukwikala fikalukuli nefiko koti fiko fyakusesa kwakwe. 27Popele aŵantu ŵonse uwakukuma-ko kufintu ifyo akalukuli nefiko, akasamfye ifyakufwala fyakwe, asambe mumenda, akalukuli nefiko ukufika iciŋgulo. 28Sombi kani umwanakasi aposiwa kukuswa kwakwe, eli akalipendele insiku sisanu nasiŵili, popele apo akalukuswetele. 29Peŋka pakasuŵa kaŵusisanu nasitatu akalipokele ŵasikampele ŵaŵili neli twana twaŋkulimba tuŵili, afilete kumupapatilisi kumulyaŋgo uwakwisema Iyewuŋgano. 30Peŋka umupapatilisi akapose cimo ati kuposa ukwapakuŵifya, nacimbi naco ati kuposa ukwakoca; popele umupapatilisi akamucitile ukulamwina pamenso aŵaYawe pakuti pakuswa kwafiko fyakwe.
31Fyopele'fyo mukalukulekanya aŵaIsilaeli nefiko fya ŵo; weŋgesa kufwa mufiko fyaŵo, pakuŵifya umutanda wanji uli pakati pali ŵo.
32Ilyo lifunde lyamwalalume uli nekuswa, nelyawoyo amalume akwe alukufuma muli ye nekumuleŋgesya ifiko; 33nelyamwanakasi ulukutenda nekusesa kwakwe, nelyamuntu uli nekuswa, ilyamwalalume nelyamwanakasi, nelyamwalalume uwakulala nemwanakasi uli nefiko.
Currently Selected:
Ifya Ŵalefai 15: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
