Ifya Ŵalefai 11
11
1Peŋka ŵaYawe ŵalilaŵile kuli Mose nakuli Aloni ati: 2Mulaŵile kuŵaIsilaeli ati, Ifyamweo ifi muŋgalya pakati panama syonse isyapacalo capansi nififi: 3Syonse isilekene'mbondo isili nempasu, isitikula pakati panama, isyo esi mukalya. 4Naŋgaŵe'fyo tesi mukalye-po isi pali syesyo isitikula napali syesyo isilekene' mbondo: iŋgamela, pakuti ilatikula sombi tailekene'ŵondo, iliŵipile kuli mweŵo. 5Naciŵila pakuti alatikula sombi taalekene'ŵondo, aliŵipile kuli mweŵo. 6Nekalulu pakuti kalatikula sombi takalekene'ŵondo, kaliŵipile kuli mweŵo. 7Neŋkumba, pakuti ililekene'ŵondo, ili nempasu, sombi tetikula-po, iliŵipile kuli mweŵo. 8Umunefu wasiko tesi mukalye-po, nakufitumbi fyasiko kaŵili tesi mukakume-ko; filiŵipile kuli mweŵo.
9Fyonse'fyo ifili mumenda mukalukulye'fi: fyonse ifili netumpisa nemamba mumenda, namufisiŵa, mamumanika, ifyo efi mukalukulya. 10Lomba fyonse ifitafikwete utumpisa neli mamba mufisiŵa namumanika ifyafyefyo fyonse ifyenda mumenda, nefyafileŋgelwe fyonse ifyamweo ifili mumenda, ifyo fipakaŵi kuli mweŵo; 11kaŵili fikalukuli fipakaŵi kuli mweŵo; tesi mukalye-po umunefu wafiko; kaŵili nefi tumbi fyafiko mukalukufyeŵa ati fipakaŵi. 12Fyonse'fyo ifitafikwete utumpisa neli mamba mumenda, ifyo fipakaŵi kuli mweŵo.
13Kaŵili nafifi ifyapafyuni mukalukufyeŵa fipakaŵi; tesi fikaliwe, fipakaŵi: inoŋga, napuŋgwa, neŋkwasi; 14nacikupwi, nelukosi koti mikoka yaluko; 15nawacikwaŋgala ŵonse koti mikoka yaŵo; 16nempye, naluŵafwa, nemukaŋga, netuŵemba koti mikoka yatuko; 17nakutukutu, namulondwe, nacisikuŋgulu; 18namwina, nekulalwando, nelyuni; 19nesela, naŵalumpansya koti mikoka yaŵo, nembuŵute, nekansuswa. 20Nefyamapindo fyonse ifikalaŵa pansi fipakaŵi kuli mweŵo. 21Naŋgawe'fyo muŋgalye'fi pafyamapindo fyonse ifikalaŵa pansi, ifili nemolu peulu pamakasa afiko, akusotokela pacalo; 22pali fyefyo muŋgalye'fi kaŵili: insye koti mikoka yasiko, nawakapamaŋgoma koti mikoka yaŵo, netuŵambala koti mikoka yatuko, naŵatete koti mikoka yaŵo. 23Sombi ifyamapindo fyonse ifikalaŵa ifili nemolu ane, ifyo fipakaŵi kuli mweŵo. 24Kuli fyefyo eko mukaŵa nefiko; aŵantu ŵonse utinta-po kucitumbi cafifyo eukalukuli nefiko ukufika iciŋgulo; 25kaŵili aŵantu ŵonse upinta icaci tumbi cafifyo eukasamfya ifyakufwala fyakwe, nekulukuli nefiko ukufika iciŋgulo.
26Inama syonse isilekene'mbondo, isitasili syampasu, isitasitikula, isyo siliŵipile kuli mweŵo, ŵonse aŵakukuma-ko kuli syo eŵakalukuli nefiko. 27Kaŵili syonse lukoso isyenda pafipanta fyasisyo siliŵipile kuli mweŵo; aŵantu ŵonse utinta-ko kucitumbi casisyo eukalukuli nefiko ukufika iciŋgulo. 28Lomba uyo upinta icitumbi casisyo eukasamfya ifyakufwala fyakwe, nekulukuli nefiko ukufika iciŋgulo: siliŵipile kuli mweŵo.
29Lomba ifi efiŵipile kuli mweŵo pafyakukalaŵa ifikalaŵila pacalo; kandende, nembeŵa, namucelalesa koti mikoka yakwe, 30nakaŵandami, nensamba, namaleŋganya, nasumba, nalufunyembe. 31Ifyo efiŵipile kuli mweŵo pakati pafyakukalaŵa fyonse; aŵantu ŵonse uwakukuma-ko kuli fyo ififwile, eukalukuli nefiko ukufika iciŋgulo. 32Naceco icakuponenwa-po kuli fyefyo ili fifwile cikalukuli nefiko; kani ciŋkoloŋkolo caciti, kani icakufwala, kani ciseŵa, kani lisaka, kani nifimbi ifiŋkoloŋkolo fyonse lukoso ifi ŵacita nafyo imilimo yonse, fiŋgawikwa mumenda, fikalukuli nefiko ukufika iciŋgulo; eli fikalukuswetele. 33Kaŵili inoŋgo syonse isyewumba umo fiponena-mo ifyo fimbi, conse icili-mo cikalukuli nefiko, nayevo-noŋgo kaŵili mukaipaye, 34Ifilyo fyonse ifiŋgaliwa, ifyo ifyakuficilwa amenda, efikalukuli nefiko; kaŵili ifyakunwa ifiŋganwinwa mufiŋkoloŋkolo fyonse ifyakuŵe'fyo fikalukuli nefiko. 35Kaŵili ifintu fyonse ifiŋgaponenwa-po kucacitumbi cafifyo efikalukuli nefiko; kani cakocela-mo, kani cakutekela-po amanoŋgo, fyonse fikatoŵalwa; fili nefiko, kaŵili fikalukumuŵeleni nefiko. 36Naŋgawe'fyo akantupuntupu neli mukalo umo mwawuŋganina-mo amenda ifyo fikalukusweta: sombi ifyo ifikumako kucitumbi cafifyo fikalukuli nefiko. 37Kaŵili kani icacitumbi cafifyo ciponene pambuto isi ŵalukufwaya ukuŵyala sikalukusweta. 38Sombi kani pali amenda pambuto isyo, lomba icacitumbi cafifyo nekuponena-po sikalukumuŵeleni nefiko.
39Lomba inama syonse isi muŋgalya, kani ifwe imbi; uyo-muntu uwakukumako kucitumbi caiyo eukalukuli nefiko ukufika Iciŋgulo. 40Kaŵili uyo uwakulya-ko kucitumbi caiyo akasamfye ifyakufwala fyakwe, akalukuli nefiko ukufika iciŋgulo; nawoyo kaŵili uwakupinta icitumbi caiyo akasamfye ifyakufwala fyakwe, akalukuli nefiko ukufika iciŋgulo.
41Lomba fyonse lukoso icikalaŵa pansi pacalo cipakaŵi; tesi cikaliwe. 42Fyonse ifyenda pakapafu, nafyefyo fyonse ifyenda pamolu ane, nafyefyo fyonse ifili nemakasa aenji, icine ifintu fyonse ifikalaŵa pacalo, tesi mukafilye; pakuti fyo cipakaŵi. 43Tesi mukaliŵifye necintu icikalaŵa, neli kulicitile'fiko nafyo mwiŋgesa kuŵa nefiko kuli fyo. 44Pakuti neŵo nineŵaYawe Lesa wenu; pakuti pali fyefyo muliswesye, ŋgamulukuswetelele; pakuti neŵo ndiswetelele; kaŵili tesi mukaliŵifye nefintu fyonse ifikalaŵa ifyenda pacalo. 45Pakuti neŵo nineŵaYawe aŵamufumisyeni mucalo caIjipiti, ati njiŵe nineŵaLesa ŵenu; pakuti pali fyefyo mukalukuswetelele, pakuti neŵo ndiswetelele.
46Ilyo lifunde lyanama, nelyacuni, nelyafilaŵi fyonse ifyenda mumenda, nelyafileŋgelwe fyonse ifikalaŵa pacalo; 47mukufilekanya ifiŵipile nefiswetele, nekufilekanya ifilaŵi ifiŋgaliwa, nefilaŵi ifitafyelelwe ukuli wa.
Currently Selected:
Ifya Ŵalefai 11: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
