Ifya Ŵalefai 10
10
1Popele Nadabi naAbiyu, aŵana ŵakwe Aloni aŵalalume, ŵoŵilo ŵaliŵulile imbale isyakocela-mo ifinuncile bwino uyu yakwe uyu yakwe, nekuŵika-mo umulilo, nekuŵika-po ifinuncile bwino, nekuposa umulilo wabwensu pamenso aŵaYawe, uyo utaŵaŵafundile ati mucite. 2Popele kwalifumine pamenso aŵaYawe umulilo, nekuŵoca, naŵo kaŵafwila pamenso aŵaYawe. 3Peŋka Mose kaalaŵila kuli Aloni ati, Ici ececo icalaŵile ŵaYawe ati, Ŋkalukuswetelela muli ŵaŵo aŵapalamina kuli neŵo, kaŵili napamenso aŵantu ŵonse ŋkalukulemiwa. Naye Aloni kaekele celele lukoso. 4Popele Mose waliŵetile Misyaeli neElisafani, aŵana ŵakwe Yusyeli, umukwaŵo ŵawisi-Aleni, nekulaŵila kuli ŵo ati, Palamineni, muŵapinte aŵakwaŵenu, ukuŵafumya pamenso pamupunda uswetelele, muŵatwale pesonde lyacisasa. 5Peŋka kaŵapalamina kaŵaŵapinta mumalaya aŵo ukuŵatwala pesonde lyacisasa, koti nifyopele'fyo ifyalaŵile Mose. 6Peŋka Mose kaalaŵila kuli Aloni, nakuli Elyasa nakuli liamali, aŵana ŵakwe aŵalalume, ati: Imisisi iyamumitwi yenu tekulukukakulucile, kaŵili mweŵo tekupandala ifyakufwala fyenu; mwiŋgesa kufwa, ŵeŋgesa kuŵafitilwa aŵamwiŵumba ŵonse; sombi aŵakwaŵenu, iŋanda yonse iyakwe Isilaeli, ŋgaŵalilile ukoca uko ŵasaya ŵaYawe. 7Kaŵili tesi mufume mumulyaŋgo uwakwisema lyewuŋgano, mwiŋgesa kufwa; pakuti amafuta aŵaYawe akusufya ali pali mweŵo. Naŵo ŵalicitile koti lisiwi lyakwe Mose.
8Popele apo ŵaYawe ŵalilaŵile kuli Aloni ati, 9Tekunwa neli nimfaina neli kunwa konse ukukosele, weŵo neli ŵana ŵoŵe aŵalalume pamo namweŵo, pakwinjila mwisema Iyeŵuŋgano, mwiŋgesa kufwa: ifyo fikalukuli lifunde ilyamuyayaya monse mufitentekwa fyenu; 10ati mukalukulekanisisya bwino ifiswetelele nefyalukoso, nekufilekanisisya ifyafiko nefiswetele; 11nakaŵili ati mukasambisye aŵaIsilaeli amafunde onse ayo ŵaŵaŵulile ŵaYawe muminwe yakwe Mose.
12Popele apo Mose walilaŵile kuli Aloni, nakuli Elyasa, nakuli liamali, aŵana ŵakwe aŵalalume aŵasyele-po, ati, Muŵule ukuposa kwawuŋga ukwakusyala-po pafyakuŵaposela ŵaYawe ifyamumulilo, mukulye ukwakuŵulo' musuŋga muceni caconto; pakuti kuliswetelele swete. 13Kaŵili mukakulye pantu apaswetelele, pakuti koŵe ukwelelwe, nekwaŵana ŵoŵe, ukwapafyakuŵaposela ŵaYawe ifyamumulilo; pakuti ndifundilwe koti nifyefyo. 14Kaŵili intiŵi iyakukupalwa nekasolo akakusuntulwa mukafilye pantu apaswetele; weŵo neŵana wowe aŵalalume neŵanakasi pamo naweŵo; pakuti filipelwe ati fyelelwe weŵo neŵana ŵowe aŵalalume, ifyapamilambu iyakuposa kwaŵutende ukwaŵaIsilaeli. 15Akasolo akakusuntulwa nentiŵi iyakukupalwa ŵakafilete pamo nekuposa ukwamumulilo ukwamafuta mukufikupala ati kuposa ukwakukupalwa pamenso aŵaYawe; popele fikalukuli fyoŵe nefyaŵana ŵoŵe aŵalalume pamo naweŵo, ati fyelelwe mweŵo insiku pee; koti nifyopele'fyo ifyafundile ŵaYawe.
16Popele apo Mose walukufwayafwaya imbusi yakuposa ukwapafyakuŵifya, lomba kusaŋga yapya; naye waliŵakalipile Elyasa naliamali, aŵana ŵakwe Aloni aŵalalume aŵasyele-po, nekulaŵila ati: 17Mbanindo tamulile ukuposa ukwapafyakuŵifya pantu apaswetelele, pakuti kuswetelele swete, kaŵili ŵalimupeleni ati mupinte ukuŵifya kweŵumba, muŵacitile ukulamwina pamenso aŵaYawe? 18Ŵoneni imilopa yakuko tayaletelwe mukati umuswetelele; mwalielelwe icine ukukulila muntu umuswetelele, koti kufunda kwanji. 19Lomba Aloni walilaŵile kuli Mose ati, Ŵoneni, lelo lyopele ŵaposa ukuposa kwaŵo ukwapafyakuŵifya nekuposa kwaŵo ukwakoca pamenso aŵaYawe; lomba kwamficila ukwakuŵe'fi; lomba ŋga nalya-po lelo ukuposa ukwapafyakuŵifya, ŋga fiŋgatemwesya pamenso aŵaYawe? 20Popele pakumfwe'fyo Mose, fyalitemwesye pamenso akwe.
Currently Selected:
Ifya Ŵalefai 10: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
