Joeli 3
3
1Pakuti ŵoneni, pansiku isyo napampindi iyo, ili ŋkabwesya liŵili ŵukaili bwakuJuda na Jelusalemi, 2eli ŋkawuŋganya imikoka yonse yaŵantu, nekwiselusisya mumukolo wakwe Jeosafati; popele ŋkalukukombetela kuli yo umo, pakuti paŵantu ŵanji neŵupyani bwanji, eŵaIsilaeli, aŵo yapalaŋganisisye pakati paŵenafyalo pakwaŵanya icalo canji. 3Kaŵili yaliŵacitile aŵantu ŵanji ifipa; nekuposo'mwanice umwalalume mukupoka umwanakasi umucencemesi, nekuulisya umwanice umwanakasi mukuula imfaina ati inwe.
4Inya, mbamweŵo muli syani kuli neŵo, mweTulo naSidono, nemitala yonse iyakucalo caFilisiti? Kani mwakumbwesesya ilambulo? Lomba, kani mwakundambula, ŋkamubwesesyeni ilambulo Iyenu pamutwi wenu mweŵene bwaŋgu uluŵilo. 5Pakuti fyopele'fyo ifi mwapoka isilifa lyanji negolide lyanji, nekutwalila-mo mumatempuli enu ifintu fyanji ifiweme ifyaŵune; 6nafyefyo ifi mwaulisya kuŵana ŵaŵaEla aŵana ŵakwe Juda naŵo pamo neŵana wakujelusalemi, ati muŵafumye ukutali nakumupaka waŵo; 7ŵoneni, ŋkaŵaŵusya ukuŵafumya apo-pantu apo mwaŵaulisye, nekumubwesesyeni ilambulo Iyenu pamutwi wenu mweŵene; 8kaŵili ŋkawolisya aŵana ŵenu aŵalalume neŵanakasi muminwe yaŵana ŵakwe Juda; naŵo kaŵili ŵakaŵolisya kuŵantu ŵakuSyeba, kumukoka waŵantu uli ukutali; pakuti niŵaYawe eŵafilaŵila.
9Kamutulisye'fi pakati pamikoka yaŵantu; mwansike iŋkondo; muŵasuŋgwile aŵalalume ŵaŋkosa; aŵalalume waŋkondo ŵonse ŋgawapalamine, ŵanine, 10Kamukanda amase enu ati aaluke nimpoko, nefiŵesi fyenu ifyamwiŵala ati fyaluke mafumo; aŵanacile ŋgaŵalaŵile ati, Ndi nemakosa. 11Kamwaŋgufya, mwise, mwemikoka yaŵantu isiŋgulucile, muwuŋganine pamo; mweŵaYawe, ŵaselusisyeni uko aŵamakosa ŵenu! 12Imikeka yaŵantu ŋgawawuke, ŵaninine kumukolo wakwe Jeosafati; pakuti uko kopele ŋkekala mukusololola nemikoka yaŵantu yonse isiŋgulucile. 13Tekeni-mo icikwakwa, pakuti ifyakuleŋgela fyapya; mwise, munyante, pakuti ulusanso lwaisula paa, nematala nao nekupokomoka-mo; pakuti ukuŵifya kwaiyo kukulu. 14Nikumaŵumba mpaŋgana mpaŋgana mumukolo wakupiniko'mulandu! Pakuti akasuŵa kaŵaYawe kali apepi mumukolo wakupiniko'mulandu. 15Akasuŵa nemwensi fyaŵa bwii, netuwaŋgawaŋga nato nekuleka ukutuŵa kwatuko. 16Peŋka ŵaYawe ŵakaŵuluma muSayoni, nekulaŵila nesiwi lyaŵo muJelusalemi; lomba amaulu necalo capansi nekuteŋkana: sombi ŵaYawe ŵakaŵa cakupulucila-mo aŵantu ŵaŵo, maliŋga akosele akuŵana ŵakwe Isilaeli. 17Fyopele'fyo mukesiŵa ati neŵo nineŵaYawe Lesa wenu, nendukwikala muSayoni, ulupili lwanji uluswetelele. Apo Jelusalemi ukalukuswetelela; lomba aŵensu tekuti ŵakapite-mo muli wo liŵili.
18Popele pali kako-kasuŵa pakaŵa ati amapili akaswa imfaina syanse, netupili nato nekukuŋka nemandili, netunika tonse utwakuJuda nato nekukuŋka nemenda; kaŵili akantupuntupu kakafuma muŋanda yaŵaYawe, nekwitila amenda mumukolo waSitimi. 19Icalo caIjipiti cikonalwa, necalo caEdomi naco nekuŵa nimpanta yakonaika, pakuti paŵuŋgwa uŵucitilwe kuŵana ŵakwe Juda, pakuti aŵantu ŵapokomosya mucalo caŵo imilopa iyakuŵule'ceŵo. 20Sombi Juda akalukwikala insiku syamuyayaya, nawo Jelusalemi ukalukwikala ifitentekwa nafitentekwa. 21Popele ŋkaswesya imilopa yaŵo, iyo nsinaswesesye akale; pakuti ŵaYawe alekala muSayoni.
Currently Selected:
Joeli 3: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
