Amosi 1
1
1Ŋga amasiwi akwe Amosi, uwali pakati paŵembesi aŵakuTekoa, ayo abwene akuIsilaeli pansiku syakwe Usaya, imfumu yakuJuda, napansiku syakwe Jeloboami umwana wakwe Joasi imfumu yakuIsilaeli, lomba pasyala imyaka iŵili ukufika icitulika.
2Naye ati, ŴaYawe ŵakaŵuluma muSayoni, nekulaŵila nesiwi lyaŵo muJelusalemi; lomba ifyembelelo fyaŵembesi fikalukulila; napo peulu paKameli pakoma.
3ŴaYawe ŵalukulaŵile'fi ati: Pakuti pakusilulula kwakuDamasiko kutatu, ekune, tekuti ŋkaalule umulandu wakuko; pakuti ŵalukulupula Gilyadi kumilupulo yamfitwe; 4sombi ŋkatuma umulilo muŋanda yakwe Kasayeli, eli ukatulya ututanino twakwe Benadadi. 5Kaŵili ŋkatoŵa umupinjilo wakuDamasiko, nekupinika injikale ukwifumya mumukolo waAfeni, nawoyo uwikete akasako kaŵufumu ukumufumya kuŋanda yaEdeni; lomba aŵantu ŵakuSilya ŵakaya kuli ŵukaili kuCili, efilukulaŵila ŵaYawe.
6ŴaYawe ŵalukulaŵile'fi, ati: Pakuti pakusilulula kwakuGasa kutatu, ekune, tekuti ŋkaalule umulandu wakuko; pakuti ŵaliŵatapile aŵantu ŵonse lukoso ati niŵakaili, nekuŵaposa kuEdomi; 7sombi ŋkatuma umulilo kwiliŋga ilyakuGasa, lomba ukatulya ututanino twakuko. 8Kaŵili ŋkapinika injikale ukwifumya muAsidodi, nawoyo uwikete akasako kaŵufumu ukumufumya kuAsikelono; lomba ŋkaalula ukuŵoko kwanji mukulwa naEcilono; naŵo aŵakusyala-po ŵaŵaFilisiti ŵakonalwa, efilukulaŵila ŵaSikulu Yawe.
9ŴaYawe ŵalukulaŵile fi, ati: Pakuti pakusilulula kwakuTulo kutatu, ekune, tekuti ŋkaalule umulandu wakuko; pakuti ŵaliŵaposele aŵantu ŵonse lukoso kuEdomi, nekuwulo'kulaŋguluka ukulayana kwabwana-bŵaŋkasi; 10sombi ŋkatuma umulilo kwiliŋga ilyakuTulo, lomba ukatulya ututanino twakuko.
11ŴaYawe ŵalukulaŵile'fi, ati: Pakuti pakusilulula kwakuEdomi kutatu, ekune, tekuti ŋkaalule umulandu wakuko; pakuti alimutamfisye umukwaŵo kumpoko, nekuposa lukoso iŋkumbu syonse, neŵukali bwakwe nekulukukwamuna, naye nekulukulama ukukalipa kwakwe impindi yonse; 12sombi ŋkatuma umulilo paTemani, lomba ukatulya ututanino utwakuBosila.
13ŴaYawe ŵalukulaŵile'fi, ati: Pakuti pakusilulula kwaŵana ŵakwe Amono kutatu, ekune, tekuti ŋkaalule umulandu wakuko; pakuti ŵalitimbwile aŵanakasi aŵali nemapafu aŵakuGilyadi, ati ŋgawakusye umupaka waŵo; 14sombi ŋkaambusye'mulilo kwiliŋga lyakuLaba, lomba ukatulya ututanino twakuko, neŋgwele pakasuŵa kakulwa, nekutukala pakasuŵa kakapupulwa; 15popele imfumu yaŵo ikaya kuli ŵukaili, yo nefileme fyaiyo pamo, efilukulaŵila ŵaYawe.
Currently Selected:
Amosi 1: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
