Joeli 2
2
1Kamulisyo'lupeŋga muSayoni, muwele iŋgwele palupili lwanji uluswetelele; injikale syonse isyamucalo ŋgasitutume; pakuti akasuŵa kaŵaYawe kalukwisa, pakuti kali apepipepi; 2kasuŵa kamfinsi nematesi; kasuŵa kamakumbi nemfinsi itikeme, koti kuca ukutandaŵele pamapili; aŵantu ŵakulu, ŵalikosele; tapaŵele nekale konse aŵakuŵe'fyo, kaŵili tapakaŵa-po liŵili aŵakupalana naŵo, ukufika imyaka yafitentekwa ifinji. 3Umulilo ulukulya pamenso aŵo; kaŵili panuma yaŵo icaka cilukwaka. Pamenso aŵo icalo cilipalene neŵala lyaEdeni, lomba panuma paŵo pali impanta iyonawilwe; icine, tapali-po icakupuluka kuli ŵo. 4Ukuŵoneka kwaŵo kuli koti kuŵoneka kwaŵakafwalo; kaŵili ŵalaŵutuka koti ŵapali ŵakafwalo. 5Ŵalasotoka koti cipupa caŋgolofwana peulu pamapili, koti cipupa cacaka camulilo icilukoca icani icumine, koti ŵantu aŵakosele aŵaansicilwe limo ukulwa. 6Pakufika ŵo aŵantu ŵalomfwe'nsoni isikulu; pamenso paŵo ŵonse nekuŵa necenswa. 7Ŵalaŵutuka koti ŵalalume ŵaŋkosa; ŵalanina paciŵumba koti ŵalalume ŵaŋkondo; ŵonse ŵalenda pantanjile pansila syaŵo aŵene; taŵafuma-po pamiloŋgo yaŵo. 8Kaŵili taŵasindikansyanya, ŵaŵa; ŵonse ŵalenda pantanjile umo umo pansila yakwe umwine; lomba ŵalapusya-mo mufyakulifuna-ko; taŵafuma-mo munsila yaŵo. 9Ŵalasotoka napamusi, nekuŵutuka peulu paciŵumba, nekuninina nakumaŋanda, nekwinjila napatumbeluka koti nisilumfundi. 10Icalo cilateŋkana pamenso aŵo; amaulu nao nekututuma; nekasuŵa nemwensi kaŵili nekuŵa bwii, netuŵaŋgaŵaŋga nato nekuleka ukutuŵa kwatuko; 11omba ŵaYawe kaŵalaŵila nesiwi lyaŵo pamenso eŵumba lyafita fyaŵo; pakuti icisasa caŵo cikulu ukwakuti; pakuti ŵalikosele ŵo aŵacita koti lisiwi lyaŵo; pakuti akasuŵa kaŵaYawe kakulu, kakutinisyo'kwakuti; lomba ninani uŋgakakutika?
12Naŋgaŵe'fyo naŵukumo, efilukulaŵila ŵaYawe, kamwalulucila kuli neŵo nemutima wenu wonse, ili mulukulifina, muli neminsosi nekuŵombomana; 13kamupanduka umutima wenu, ifyakufwala fyenu fyefi; mwalulucile kuli ŵaYawe Lesa wenu; pakuti ŵo ŵaluse, ŵaliiswile iŋkumbu, ŵalakokolo'kufitwa, ŵali nebwinji bwacifuto; kaŵili ŵalomfwile'nsoni ifyakuŵifya. 14Ninani uwisi ati cipale ŵakaaluluka, nekusasa, nekusya munuma yaŵo ukusyucisya, emulambu wawuŋga nemulambu wakunwa mukuŵacindika ŵaYawe Lesa wenu?
15Kamulisyo'lupeŋga muSayoni, muswesye ukulifina, mwite iwuŋgano lyansoni; 16muwawuŋganye aŵantu, muŵaswesye awewuŋgamo, muwaloŋganye aŵalalume aŵacekulu, muwawuŋganye aŵanice newakoŋka'mawele, Uwakuupa ŋgaafume mucipinda cakwe, newakuufiwa nave ŋgaafume mukapinda kakwe. 17Aŵapapatilisi, aŵapyunjisi ŵaŵaYawe, ŋgaŵalile pakati pacilyaŋgwa neconto, ŋgawalawile ati, Muŵapulusye aŵantu ŵenu, mweŵaYawe, tekuposa uŵupyani bwenu mukutoŋgalwa, ati aŵenafyalo ŵaŵekalike. Mbanindo ŵaŋgalawilila pakati paŵantu ati, MbaŵaLesa ŵaŵo ŵali kulipi?
18Popele apo ŵaYawe waliŵele neŵukwa pakuti pacalo caŵo, nekuŵomfwile'nsoni aŵantu ŵilŵo. 19Naŵo ŵaYawe ŵaliasucile nekulaŵila kuŵantu ŵaŵo ati, Ŵoneni, ŋkamutumineni amasaka nemfaina nemafuta, eli mukekuta kuli fyo; tekuti muleŋgesyeni cakutoŋgalwa pakati pamikoka yaŵantu; 20sombi ŋkafumya ukutali kuli mweŵo iŵumba lyafita ilyakunofu, nekulitamfya ati liye kucalo campanta iconawilwe; necapantanjile calilyo nekuya kucisiŵa icakumutulesuŵa, nacapanuma calilyo nekuya kucisiŵa icakumbonsi; peŋka ukunuŋka kwalilyo kukafutuma, nebwema bwalilyo uŵuŵipile nekufutuma; pakuti lyacita ifintu ifikulu.
21Witina, wecalo, ulukusemba nekulukusaŋgalala; pakuti ŵaYawe ŵacita ifintu ifikulu. 22Mwitina, mwenama syamumpaŋga; pakuti ifyembelelo ifyapampanta filukumena; pakuti umuti ulukwikata nefisepo, nemukuyu nemufaina nayo nekusaŋguka nemakosa aiyo. 23Kamusaŋgalala lomba, mweŵana ŵakuSayoni, musembele muli ŵaYawe, Lesa wenu; pakuti ŵalamupeleni imfula yakutaŋga ukwesya ukuluŋgeme, nekumulokesyeni imfula, emfula yakutaŋga nemfula yakupela-ko, pamwensi wakutaŋga, 24Lomba ifiŵansa fikesula tiligu, nematala nao nekupokomoka imfaina nemafuta. 25Kaŵili ŋkamubwesesyeni imyaka iyo ulusye lwalya, neluteŋgute, necisimu, neciloŋgolo, iŵumbe'lyo ilikulu ilyo natumine pakati pali mweŵo. 26Popele mukalukulya ifinji nekwikuta, nekulukucindika isina lyaŵaYawe Lesa wenu, aŵalukumucitileni ifyakukaŋkamana; lomba aŵantu ŵanji tekuti ŵaŵe nensoni insiku syonse lukoso. 27Peŋka mukesiŵa ati neŵo ndi pakati pali Isilaeli, nakaŵili ati neŵo nineŵaYawe Lesa wenu; tapali-po naumbi; lomba aŵantu ŵanji tekuti ŵaŵe nensoni insiku syonse lukoso.
28Popele pakaŵa pantanjile ati ŋketila-po umupasi wanji paŵamunefu ŵonse; popele aŵana ŵenu aŵalalume neŵanakasi ŵakalukusimika, neŵacekulu ŵenu aŵalalume ŵakalukulote'filoto, newasaŋkwa ŵenu naŵo ŵakalukuŵona ifyakuŵona; 29icine napaŵapyunjisi aŵalalume neŵanakasi ŋketila-po ifyamupasi wanji pansiku isyo. 30Kaŵili ŋkalanjisya ifyakukaŋkamana mwiulu napacalo capansi, imilopa nemulilo neŋkumbi syacusi. 31Akasuŵa kakaaluka nimfinsi, nemwensi nawo milopa, ili takaŋgesa akasuŵa kaŵaYawe ako akakulu akakutinisya. 32Popele fikaŵa kuŵantu ŵonse ukalilila isina lyaŵaYawe ati akapuluka; pakuti palupili lwaSayoni namuJelusalemi pakaŵa aŵakapuluka-po, koti nifyefyo ifyalaŵile ŵaYawe; nakaŵili pakati paŵakusyala-po pakaŵa aŵakwitwa kuli ŵaYawe.
Currently Selected:
Joeli 2: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
