Osiya 9
9
1WeIsilaeli, tekusaŋgalala pakuti pakusemba koti ŵenafyalo, pakuti wafuma kuli ŵaLesa ŵoŵe ukulukucencemesya; walukutemwa amalambulo pafiŵansa fyonse. 2Iciŵansa cakupuma amasaka nelusanso lwamfaina ulukulu tekuti fikaŵalisye, kaŵili imfaina syaŵukumo sikamutumpaika. 3Taŵakekala mucalo caŵaYawe; sombi Efilayimi akabwelela kuIjipiti; kaŵili ŵakalukulya ifyakulya Ifinaŋgwa ifiŵipile muAsiliya. 4Taŵakaŵetulwila ŵaYawe imilambu yamfaina, neli kuŵatemwesya ŵo; imilambu yaŵo ikaŵaŵela koti fyakulya fyaŵalukulila; ŵonse aŵalukulya-ko ŵakaŵa nefiko; pakuti ifyakulya fyaŵo fikalukuli fyansala yaŵo; tekuti fikenjile muŋanda yaŵa Yawe. 5Mbamukacite'ndo pakasuŵa kakuŵuŋgana kwansoni, napakasuŵa kacitenje caŵaYawe? 6Pakuti ŵoneni, ŵalifumine kukonalwa, sombi Ijipiti akaŵatola, naMofo naye nekuŵasika; ŵakafuŋga ifintu fyaŵo fyesilifa, sombi imbaŵaŋgwa sikalukuli nafyo; kaŵili imyuŋga ikalukuli mumasema aŵo. 7Insiku syakuficilwa syaisa; insiku syakulambula syaisa; Isilaeli akafiisiŵa; uwakusimika kaŋguluŋgulu: umuntu uli nemupasi lisilu; pakuti pabwinji bwafyakusendama fyoŵe, napakuti uŵupondo ŵukulu. 8Efilayimi wakuŵelama uwakuli ŵaLesa ŵanji; ifyawakusimika, icifu cawakwikasye'fyuni cili ponse pansila syakwe, newupate naŵo ŵuli muŋanda yaŵaLesa ŵakwe. 9Ŵaliŵifyo'kwakuti koti nipansiku syakuGibea; ŵakakwanuka ukusendama kwaŵo, nekucito'mulandu ifyakuŵifya fyaŵo.
10Nalimusanjile Isilaeli ali koti nimfaina pampaŋga; kaŵili nalibwene ŵawisinwe koti fyamutulu ifyakumukuyu pakwikata kwauo ukwakutaŋga: sombi ŵalificile kuBala-peyoli, nekuliposela kuli ceco cansoni, nekunekasya koti niceco ici ŵatemenwe. 11IfyakuŵaEfilayimi, uŵuleme bwaŵo ŵukaya ukulukupalala koti cuni; tapakaŵa-po ukufyala, neli wakuŵa nepafu, neli kwimita. 12Naŋgawa'ti ŵaŵakusya aŵana ŵaŵo, naŋgawa nifyefyo ŋkaleŋgesya ati ŵafwilwe, nekuŵulo'kusya-po neli muntu umo; icine kaŵili, ŋgaŵasyame pakufuma-ko neŵo kuli ŵo! 13Efilayimi, koti nifyefyo ifi nabwene Tulo, alilimbilwe pantu apaweme; sombi Efilayimi akafumya aŵana ŵakwe ukuŵaleta kumwipaisi. 14Muŵapele, mweŵaYawe! Mwakuŵapele'ndo? Muŵapele inda yakupulumusya nemaŵele akuŵula'mandili. 15Ukuŵifya kwaŵo konse kuli muGiligali; pakuti umo emo naŵafitilwe; pakuti pakuŵifya kwakucita kwaŵo ŋkaŵatamfya-mo namuŋanda yanji: nsikaŵatemwa nafimbi, yo; ifileme fyaŵo fyonse fyakwalucila. 16Efilayimi alipaminwe; umusyu waŵo uliuminine, tekuti ŵakekate-po ifisepo neli cimo; icine, naŋgawa'ti ŵafyala, naŋgawe'fyo ŋkepaya aŵana aŵamunda mwaŵo aŵatemenwe.
17ŴaLesa ŵanji ŵakaŵaposa, pakuti taŵalukukutika kuli ŵo; lomba ŵakaŵa ŵakwenda-enda pakati paŵenafyalo.
Currently Selected:
Osiya 9: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
