Osiya 10
10
1Isilaeli mufaina ulukumeno'kwakuti, nekwikate'fisepo; koti bwinji bwafisepo fyakwe alifusisye ifyonto fyakwe; koti kuwama kwacalo cakwe ŵalicitile impanda syafiŵumbwaŵumbwa isiweme. 2Umutima waŵo uliaŵanisiwe; pano ŵakuŵoneka ati ŵamilandu; ŵakapama ifyonto fyaŵo, nekuŵifya impanda syaŵo. 3Icine ŵukumo ŵakulaŵila ati, Tatukwete-mfumu; pakuti tatuŵatina-po ŵaYawe; lomba imfumu kansi iŋgatucitile'ndo? 4Ŵalukulaŵila amasiwi alukoso, ukulukulapa ifyakutumpaika pakulukulayana; pakuti pali fyefyo ukusinina kulamena koti ŵuŵa mumifolwa yamwiŵala. 5Aŵalukwikala muSamalya ŵakaŵa necenswa pakuti paŵombe aŵakuBeta-yafeni; pakuti aŵantu ŵakuko ŵakamulilila umombe, neŵapapatilisi ŵakwe naŵo ŵakatutuma pakuti pali ye, pakuti paŵuleme bwakwe; pakuti ŵulifumine kuli ye. 6Kaŵili akatwalwa kuAsiliya, nimpese yakumfumu Yalebi; Efilayimi akapoka insoni, naye Isilaeli akomfwile'nsoni ukufunda kwakwe umwine. 7Ifyakwe Samalya, imfumu yakwe ilipinicilwe koti lipofu pamenda, 8Pantu apasuntucile apakuAfeni, ukuŵifya kwakwe Isilaeli, napo pakonalwa; imyuŋga nefisosolo fikamena pafyonto fyaŵo; lomba ŵakalaŵila kumapili ati, Tufimbeni-po! nakutupili ati, Tuwileni-po!
9WeIsilaeli, walukuŵifya ukufuma kunsiku syakuGibea; ŵaliimakene-ko' ko; kansi tapakakumana naŵo muGibea iŋkondo iyakulwa neŵakuŵifya? 10Pakufwaya neŵo, eli ŋkaŵapama ŵo; peŋka aŵenafyalo ŵakaŵuŋgana mukulwa naŵo, pakukakwa ŵo pakuti pakupulaisya kwaŵo koŵilo. 11Efilayimi yana yaŋombe iyanakasi isambisiwe, itemwa ukunyantala amasaka; sombi nalipitile paŵune bwamukosi wakwe; ŋkekalika pali Efilayimi uwakupapwa; kaŵili Juda akalima, naye Yakobi akapume'ŋkule syakwe. 12Liŵyalileni mukuluŋgama, muteŵule koti niŋkumbu: mukule icilala cenu; pakuti nimpindi yakuŵafwayafwaya ŵaYawe, ili tawaŋgesa nekumulokesyeni ukuluŋgama. 13Mwalukulima ukuŵifya, nekuteŵula ukusendama; mwalya ifisepo fyaŵufi; pakuti walukupema-mo munsila yoŵe, namubwinji bwaŵantu ŵoŵe aŵamakosa. 14Pakuti pali fyefyo icipupa cikaŵuka pakati paŵantu ŵoŵe, nemananda oŵe aŋkondo onse nao akonalwa, koti nifyefyo ifi Syalimana aonawile Beta-Iabeli pakasuŵa kakulwa: ŵanyinaŵo nekusansalwa pamo neŵana ŵaŵo. 15Koti nifyopele' fyo efikacita Beteli kuli mweŵo pakuti pakuŵifya kwenu ukukulu; kumaca imfumu yakuIsilaeli ikapinikwa lukoso pini.
Currently Selected:
Osiya 10: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
