Osiya 4
4
1Umfweni isiwi lyaŵa Yawe, mweŵana ŵakwe Isilaeli; pakuti ŵaYawe ŵalukupicisya nenjikale syamucalo, pakuti tapali-po neli niŵucine, neli niŋkumbu, neli kuŵesiŵa ŵaLesa mucalo. 2Tapali-po fimbi, sombi pali-po ukulapa kweŋka, nekupulaisya ifyakulayana, nekwipaya, nekwiŵa, nekucito'ŵucende; ŵalaŵucilansyanya; lomba imilopa nekulonda imilopa. 3Pakuti pali fyefyo icalo cikalukulila nemisowa; kaŵili ŵonse aŵakwikala-mo ŵakalukuli newuŋkumbwa, pamo nenama syamumpaŋga nefyuni fyamwiulu; icine, nesaŵi lyamucisiŵa likafumiwa. 4Naŋgawe'fyo aŵantu ŵonse ŵekesa mukulwa, neŵantu ŵonse kaŵili ŵekesa mukupatila; pakuti aŵantu ŵoŵe ŵali koti niŵaŵo aŵalukulwa nemupapatilisi. 5Popele ukalitutula pakasuŵa; kaŵili uwakusimika naye akalitutula pamo naweŵo paŵusiku; lomba ŋkawonala ŵanoko.
6Aŵantu ŵanji ŵalionawilwe pakuti pakuŵula ukwisiŵa; pakuti wakana ukwisiŵa, naneŵo kaŵili ŋkakukana weŵo, wiŋgesa mukumbela mupapatilisi; pakweŵa ati waluŵa-ko ukufunda kwaŵaLesa ŵoŵe, naneŵo kaŵili ŋkawaluŵa-ko aŵana ŵoŵe. 7Pakulukufula ŵo ŵalukumbifisya; ŋkabwaluta uŵuleme bwaŵo ŵuŵe ninsoni. 8Ŵalukulya ukuŵifya kwaŵantu ŵanji, nekupemamo mukusendama kwaŵo. 9Lomba ifyakuŵapapatilisi fikaŵa koti nifyefyo ifyakuŵantu; ŋkawapama pakuti pamekalilo aŵo, nekuŵalambula pakuti pakucita kwaŵo. 10Ŵakalukulya nekuŵulo'kwikuta; ŵakalukucito'ŵucencemesi nekuŵulo'kufula; pakuti ŵaleko'kuŵakutika ŵaYawe.
11Uŵucencemesi nemfaina nemfaina yaŵukumo filafumya umulaŋgwe, 12Aŵantu ŵanji ŵalepusya ukufunda kuciti caŵo, lomba iŋkoli yaŵo nekuŵaŵula; pakuti umupasi waŵucencemesi waleŋgesya ati ŵafuluŋganye, naŵo ŵaya muŵucencemesi ukufuma munsi mwaŵaLesa ŵaŵo. 13Ŵalepaya imilambu peulu pamapili, nekoca ifinuncile bwino patupili napansi pamyeloni naŵalibine nemyela, pakuti icinto cakuko ciliweme; pakuti pali fyefyo aŵana ŵenu aŵanakasi ŵalacito'ŵucencemesi ŵo, naŵamukakuupwa ŵenunekucito'ŵucende. 14Nsikaŵapama aŵana ŵenu aŵanakasi pakucito'ŵucencemesi ŵo, neli niŵamukakuupwa ŵenu pakucito'ŵucendeŵo; pakuti aŵene ŵalaya pambi pamo neŵacencemesi, nekwipaye'milambu pamo naŵamukambwe; lomba aŵantu aŵataŵakwete-mulaŋgwe ŵakawisiwa.
15Naŋgawa ati weŵo, weIsilaeli, ulukucito'ŵucencemesi, Juda eŋgesa mukuŵifya; mweŵo tekwisa kuGiligali, neli kunina mukuya kuBeta-yafeni, neli kulapa ati, Koti nifyefyo ifi ŵali nemweo ŵaYawe. 16Pakuti Isilaeli waikala necikaka, koti mombe iyanakasi iyacikaka; pano ŵaYawe ŵakaŵalisya koti mwana wambelele pantu apakulu, 17Efilayimi aliŵambakene nefiŵumbwaŵumbwa; mulekeni. 18Ifyakunwa fyaŵo filisasile; ukucencema ŵalacencema; aŵekalicisi ŵakwe ŵalatemwo'kwakuti insoni. 19Icipupu camwikata mumapindo acico; lomba ŵakaŵa nensoni pakuti pamilambu yaŵo iyakwipaya.
Currently Selected:
Osiya 4: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
