Osiya 2
2
1Kamulaŵila kuŵakwaŵenu ati Ami, nakuŋkasi syenu ati Lukama. 2Kamumukombetela nyinenwe, kamumukombetela; pakuti ye taali mukasi wanji, kaŵili neŵo nsili mulume wakwe. Ŋgaafumye pamenso akwe ifyaŵucencemesi fyakwe, nefyawucende fyakwe afifumye pakati pamaŵele akwe; 3niiŋgesa-kumufula ati aŵe matako lukoso, nekumwikalika ati ekale koti nifyefyo ifi ali pakasuŵa kakufyalwa kwakwe, nekumuleŋgesya ati aŵe koti nimpaŋga, nekumwikalika koti calo icuminine, nekumwipaya kucilaka; 4icine, napaŵana ŵakwe nsikacita-po iŋkumbu, pakuti ŵo ŵana ŵaŵucencemesi. 5Pakuti nyinaŵo wacito'ŵucencemesi; uyo uwaimitile ŵo wacite'fyansoni syakuti; pakuti ye ati, Ŋkalukuŵalonda aŵalukuntemucila, a ŵalukumpela siŋkwa wanji nemenda anji, nemasako ambelele anji nemikusu yanji, nemafuta anji nefyakunwa fyanji.
6Pakuti pali fyefyo ŵoneni, ŋkasiŋka insila yoŵe kucikuti camyuŋga, nekumucicila neluŵawo, eŋgesa ye mukuŵona insila syakwe. 7Popele akalukuŵalonda aŵalukumutemucila, sombi tekuti akakumane naŵo; akalukuŵafwayafwaya, sombi tekuti akaŵaŵone; telyo aŋgalawila ati, Ndukuya, ndukubwelela kumulume wanji uwakutaŋga: pakuti pampindi iyo fyalukuŋgwamina ukucila napali ŵuŵuno-ŵukumo. 8Pakuti ye taesiŵile ati nineŵo enamupele amasaka nemfaina nemafuta, nekumufusisya isilifa negolide ilyo ŵo ŵalukucitisya mukumucindika Bala. 9Pakuti pali fyefyo ŋkalibwesesya amasaka anji pampindi yaako, nemfaina yanji pansiku syaiko; kaŵili ŋkasompola amasako ambelele anji nemikusa yanji, ifyo ifyaelelwe ukufimba-po paŵusakula bwakwe. 10Pano lomba ŋkafimbulula uŵucencemesi bwakwe pamenso aŵalukumutemucila; tapakalukuli-po neli umo uwakumupulusya muminwe yanji. 11Kaŵili ŋkapesya lukoso utuseko twakwe tonse, nefitenje fyakwe, nemyensi yakwe iyamaseŋgo, naŵasabata ŵakwe, nemawuŋgano akwe onse ansoni. 12Kaŵili ŋkonala imifaina nemikuyu yakwe, iyo alaŵile ifyakuli yo ati, Iyi kulambulwa kwanji uko awalukuntemucila ŵampele; ŋkayalula liyamba, lomba inama isyamumpaŋga sikailya. 13Popele ŋkamufisisya insiku syaŵaBala, aŵo alukocela ifinuncile bwino, ili alukutaŋgala nensela syakwe nefyamataŋgalo fyakwe, nekulukuŵalonda aŵalukumutemucila, nekunduŵa-ko neŵo, efilukulaŵila ŵaYawe.
14Pakuti pali fyefyo ŵoneni, ŋkamoŋgola, nekumufisya namumpaŋga, nekwambala nakwe ifyakumusaŋgalasya, 15Kaŵili, ukufuma apo, ŋkamupela amaŵala akwe amifaina, lomba umukolo waAkoli ukaŵa mulyaŋgo walucetekelo; popele ye akaasucila'po, koti nipansiku syaŵumoye bwakwe, nakoti nipakasuŵa ako afumine mucalo caIjipiti. 16Kaŵili ŵaYawe ati, Akasuŵa ako pakaŵa ati ukanjilika ati nilsi; tokanjilika liŵili ati niBayali. 17Pakuti ŋkafumya mukanwa kakwe amasina aŵaBala; ŵo tekuti ŵakasimbulwe liŵili pesina lyaŵo.
18Kaŵili akasuŵa ako ŋkaŵalayanina nenama syamumpaŋga, nefyuni fyamwiulu, nefikalaŵa pansi; lomba ŋkatoŵa uŵuta nempoko neŋkondo ukufifumya pacalo, nekuŵalalika neŵutende. 19Popele neŵo ŋkakwambisya weŵo insiku syamuyayaya; icine, ŋkakwambisya mukuluŋgama namukusololola, namuŋkumbu, namuluse. 20Icine, neŵo ŋkakwambisya weŵo mukutekanya; peŋka ukaŵesiŵa ŵaYawe.
21Popele akasuŵa ako pakaŵa ati ŋkaasuka, efilukulaŵila ŵaYawe; ŋkalyasuka iulu, nalyo likacasuka icalo capansi; 22kaŵili icalo cikaasuka amasaka nemfaina nemafuta; nafyefyo nafyo fikaasuka Jesileyeli. 23Popele ŋkaliŵyalila ye mucalo; kaŵili ŋkamucite'ŋkumbu uyo utaapokele iŋkumbu; popele ŋkalawila kuli ŵaŵo aŵataŵali ŵantu ŵanji ati, Mweŵo muli ŵantu ŵanji; naŵo kaŵili ŵakalaŵila ati, Mweŵo nimweŵaLesa ŵanji.
Currently Selected:
Osiya 2: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
