Osiya 1
1
1Ndi isiwi lyaŵaYawe ilyaficile kuli Osiya, umwana wakwe Beyeli, pansiku syikawe Usaya, naJotami, naEyasi, naEsikaya, imfumu syakuJuda, napansiku syakwe Jeloboami, umwana wakwe Joasi, imfumu yakuIsilaeli.
2Ili ŵalaŵile ŵaYawe kuli Osiya pakutaŋga, ŵaYawe ŵalilaŵile kuli Osiya ati: Koya, ulipokele umukasi waŵucencemesi neŵana ŵaŵucencemesi; pakuti icalo cilukucito'ŵucencemesi uŵukulu, ukulukufuma kuli ŵaYawe.
3Fyopele'fyo aliile nekumupoka Gomeli, umwana umwanakasi wakwe Dibilayimi; naye nekwimita nekumufyalila umwana umwalalume. 4Popele ŵaYawe ŵalilaŵile kuli ye ati: Mwilike isina lyakwe ati niJesileyeli; pakuti pakupita impindi inini, eli ŋkafutila imilopa yakuJesileyeli paŋanda yakwe Jiyu, nekupesya uŵufumu bwaŋanda yakuIsilaeli. 5Popele pakasuŵa ako pakaŵa ati ŋkatoŵa uŵuta bwakuIsilaeli mumukolo wakuJesileyeli.
6Popele apo umwanakasi waliimitile liŵili nekufyala umwana umwanakasi. Peŋka ŵaYawe ŵalilaŵile kuli Osiya ati: Mwilike isina lyakwe ati niLo-lukama; pakuti ukufuma-po pano nsikalukuli neŋkumbu paŋanda yakuIsilaeli, ati mbafitulucile nekantu. 7Sombi ŋkaŵa neŋkumbu paŋanda yakuJuda, nekuŵapulusya nemakosa aŵaYawe Lesa waŵo; tekuti mbapulusye kuŵuta neli nikumpoko neli nikukulwa neli nikuli ŵakafwalo neli nikuŵapali ŵakafwalo.
8Lomba, ili wamusumwine Lo-lukama, umwanakasi waliimitile nekufyala umwana umwalalume. 9Popele ŵaYawe ati, Mwilike isina lyakwe ati niLoami; pakuti mweŵo tamuli ŵantu ŵanjii kaŵili neŵo nsikalukuli niŵaLesa ŵenu. 10Naŋgaŵa nifyefyo ubwinji bwaŵana ŵakwe Isilaeli ŵukalukuli koti museŋga wakucisiŵa, uŵutabwisi ukwesiwa neli kupendwa; popele apo-pantu apo fyalaŵilwe ati, Mweŵo tamuli ŵantu ŵanji, pakaŵa ati fikalaŵilwa kuli ŵo ati, Mweŵo muli ŵana ŵaŵaLesa ŵamweo. 11Popele aŵana ŵakwe Juda neŵana ŵakwe Isilaeli ŵakaŵuŋganisiwa pamo, naŵo ŵakaliikalicila imfumu imo, nekunina ukulukufuma mucalo; pakuti akasuŵa kakuJesileyeli kakalukuli kakulu.
Currently Selected:
Osiya 1: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
