Osiya 13
13
1Pakulaŵila Efilayimi, pali ukututuma; alilisuntwile muIsilaeli; sombi pakucito'kuwifya muBala, eli afwile. 2Lomba ŵukumo ŵalukuŵifya ukwakucila-cila; ŵalilicitle ifiŵumbwaŵumbwa ifyakusuŋgululwa kwisilifa lyawo, etuluŵi koti kalaŋgo kaŵo aŵene, tonse milimo yaŵamfundi. Ŵalukulaŵila ifyakuli to ati, Aŵantu awalukwipaye'milambu ŋgawafyonte-po paŵombe. 3Pakuti pali fyefyo ŵakaŵa koti likumbi lyalucelo, nakoti cime icuma lucelocelo, nakoti musuŋgu upupulwa kukapupulwa ukuufumya paciŵansa cakupumina-po, nakoti cusi icifumiwa kuli cimini.
4Naŋgawe'fyo neŵo nineŵaYawe Lesa woŵe ukufuma kucalo caIjipiti; lomba tekuti wisiŵe lesa umbi, sombi nineŵo neŋka: apakuŵula neŵo tapali-po uwakupulusya neli umo. 5Nalikwisiŵile mumpaŋga, mucalo cacilala icikulu. 6Koti cembelelo caŵo kaŵekuta; ŵaliikutile, lomba memutima waŵo nekusuntulwa; pakuti pali fyefyo ŵalinduŵileko. 7Pakuti pali fyefyo ndiŵaŵelele koti niŋkalamu; ŋkaŵelamina pansila koti nincense. 8Ŋkakumana naŵo koti ninyina-beya uwafwililwe utwana twakwe; peŋka ŋkasantala icisiŋguluko'mutima waŵo; eli ŋkaŵalila apo koti niŋkalamu; icilwani cikaŵapandala.
9Konalwa koŵe, weIsilaeli, pakuti ulimbucile neŵo nekofwa-ko koŵe. 10Mbeli kwisa pano imfumu yoŵe, ati ŋgaikupulusye monse mumisi yoŵe? Mbaŵali kwisa aŵasoŵolwesi ŵoŵe, aŵo walaŵile ifyakuli ŵo ati, Mumpele-ko imfumu nefileme? 11Mukukalipa kwanji nalikupele imfumu, lomba muŵukali bwanji naliifumisye. 12Ukusendama kwakwe Efilayimi kulikacilwe; nekuŵifya kwakwe nako kulilaminwe. 13Insoni syamwanakasi ulukupotwa sikamuficila; ye mwana umwalalume uwakuŵula' mano, pakuti pampindi ino ye taelelwe ukupembela pantu apakufyalilwa aŵana.
14Ŋkaŵaluŵula kumakosa akuSyeoli, nekuŵaluŵula kulufu. Welufu, ili kwisa imyalo yoŵe? WeSyeoli, kuli kwisa ukonala koŵe? Ukusasa kukafiswa pamenso anji.
15Naŋgawa ati akekate'fisepo pakati paŵakwaŵo, pakafika icipupu icapali ntundwe, umupuya waŵaYawe uwakufuma kumpanta, lomba intulo yakwe ikoma, nekantupuntupu kakwe nako nekupwa. Ye akatapa uŵuŵoni bwafiŋkoloŋkolo fyonse ifikumbilwe. 16Samalya akapinta umulandu wakwe, pakuti waŵaalucila ŵaUsa ŵakwe; ŵakawa kumpoko, nencece syaŵo nekusansalwa pansi, neŵanakasi ŵaŵo aŵali nemapafu nekutimbulwa.
Currently Selected:
Osiya 13: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
