Osiya 11
11
1Ili acili mwanice Isilaeli nalukumutemwa, nekumwita umwana wanji ati afume muIjipiti. 2Ili ŵalukuŵeta, eli ŵaŋgafuma kuli ŵo; ŵalukuŵepaila ŵaBala imilambu, nekufyocela ifiŵumbwaŵumbwa ifiŵasilwe ifinuncile bwino. 3Naŋgawe'fyo nineŵo enamufundile Efilayimi ukwenda; naliŵapintile mumaŵoko anji; sombi ŵo taŵaisiŵile ati naliŵaposesye. 4Naliŵakulumwine kumyando yamuntu, kufyakukaka fyaŵutemwe; lomba kuli ŵo nali koti ŵakufumisya ifikoŋkoli kumicendwa yaŵo; kaŵili nalitekele ifyakulya pamenso aŵo.
5Takabwelela kucalo caIjipiti; sombi umuAsiliya eukaŵa nimfumu yakwe, pakuti ŵalikene ukubwela. 6Kaŵili impoko ikaponena-po pamisi yakwe, nekusilisya aŵakumufuna, nekuŵalya, pakuti pakufunda kwaŵo aŵene. 7Lomba aŵantu ŵanji ŵalilandakenye ukuŋgalucila neŵo; naŋgawa'ti ŵalukuŵeta mukucindika Aŵo aŵakwiulu, tapali-po neli umo uwakuŵalemya.
8Ŋkuleke syani, Efilayimi? Ŋkupulusye syani, Isilaeli? Syani niŋgakucita koti niAdima? Syani niŋgakwikalika koti niSeboyimi? Umutima wanji ulialulucile muli neŵo, iŋkumbu syanji nekuŵucila kumo. 9Nsikacita-po koti ŵukali bwakufitwa kwanji; nsikabwelela mukonala Efilayimi; pakuti nineŵaLesa, nsili muntunsi neŵo; nineŴaŵo Aŵaswetelele pakati pali weŵo; tekuti ŋkenjile-mo mumusi. 10Ŵakalukwenda ukulukuwalonda ŵaYawe, aŵakaŵuluma koti niŋkalamu; pakuti ŵakaŵuluma, eli ŵakesa aŵana ukufuma kumbonsi ili ŵatutuma. 11Ŵakesa ili watutuma koti cuni ukufuma kuIjipiti, nakoti niciŵa ukufuma kucalo caAsiliya; peŋka ŋkaleŋgesya ati ŵekale mumananda aŵo, efilukulaŵila ŵaYawe.
12Efilayimi alukunsiŋgulwisya nefyaŵufi, nenanda yakuIsilaeli nayo ilukunsiŋgulwisya nefyakutumpaika; sombi Juda ye aciikalika pamo naŵaLesa, alitekenye kuli Ŵaŵo Aŵaswetelele.
Currently Selected:
Osiya 11: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
