Danyeli 12
12
1Pampindi iyo Mikayeli akema, imfumu iyo ikulu ilukuŵofwa-ko aŵana ŵaŵantu ŵoŵe; popele pakaŵa nempindi yakukatasya, ifyakuŵe'fyo tafyaŵele-po ukufuma kumpindi yakwikala umukoka waŵantu ukufika kumpindi iyo yopele; lomba pampindi iyo aŵantu ŵoŵe ŵakapulusiwa, ŵonse aŵakuŵoneka ati ŵalilembelwe mwibuku. 2Aŵo aŵalele mwifukutu lyapansi aŵenji ŵakaŵuka, ŵambi mukuya kumweo wamuyayaya, ŵambi naŵo kunsoni nemupufyo wamuyayaya. 3Lomba aŵali nemano ŵakatula koti kutuŵa kwamuceleŵela; naŵaŵo aŵaalula aŵenji ati ŵaŵe ŵaluŋgeme ŵakatula koti tuwaŋgaŵaŋga insiku pee.
4Sombi weŵo, weDanyeli, isala kumasiwi, uciŋke-ko kwibuku, ukufika nakumpindi yakupela-ko; aŵenji ŵakalukuŵutuka ukupitana, nekwisiŵa nako nekufula.
5Popele apo neŵo neDanyeli kantontomeka, lomba paliimakene ŵambi ŵaŵili, umbi pambali yanika kuno-bwisilya, umbi naye pambali yanika kulya-bwisilya. 6Kumfwa umbi walaŵila kumuntu uyo uwafwite imbafuta, uwali peulu lyamenda amunika, ati: Impindi yasyani ukufika kukupela kwafimpelampeia ifi? 7Popele kamumfwa uyo-muntu uwafwite imbafuta, uwali peulu lyamenda amunika, ili asuntwile kwiulu ukuŵoko kwakwe ukwakulwine nekwakucipiko, nekulapa kuli woyo uli nemweo uwamuyayaya, ati pakalukuli impindi nemapindi neyafu lyampindi; kaŵili ili ŵakapesya ukutoŵala uŵukulu bwaŵantu aŵaswetelele, eli fikasila ifyo-fintu fyonse.
8Peŋka kanumfwa, sombi nsinafiisiŵile-po; eli niŋgeŵa ati, Mweŵasikulu ŵanji, mbacindo cikaŵa-po pafintu ifi? 9Naye ati, Kauya Danyeli; pakuti kumasiwi kwaisalwa nekuciŋkwa-ko ukufika kumpindi yakupela-ko. 10Aŵenji ŵakaliswesya nekulitufya nekuwaminisiwa; sombi imbifi sikalukuŵifya; pambifi papo'muntu uwakwisiŵa; sombi aŵali nemano eŵakesiŵa. 11Kaŵili ukutatika kumpindi yakufumya umulambu wansiku syonse, ukufika kukwimika icakukoŵesya icakonala, pakaŵa-po insiku imyanda ikumi naiŵili nensiku amakumi asanu naane peulu. 12Usyucile uyo ukapembela nekufika kunsiku isyo imyanda ikumi naitatu nensiku amakumi atatu nasisanu peulu. 13Sombi weŵo kauya lukoso ili takuŋgafika ukupela-ko; pakuti ukatusya-po, nekwima pacakwaŵana coŵe pakupela insiku.
Currently Selected:
Danyeli 12: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
