Agayi 1
1
1Pamwaka waŵuiŵili uwamfumu Daliu, pamwensi wakukoŵeka-mo, pakasuŵa akakutaŋga kamwensi, lyaliisile isiwi lyaŵaYawe muli Agayi uwakusimika kuli Selubabeli umwana wakwe Syalatieli icilolo capacalo caŵaJuda, nakuli Josyua umwana wakwe Jeosadaci umupapatilisi umukulu, nekulaŵila ati:
2ŴaYawe ŵamaŵumba ŵalukulaŵile'fi ati: Aŵantu aŵa ŵalukulaŵila ati, Impindi taiŋgesa iyakwiŵaka iŋanda yaŵaYawe.
3Peŋka'po isiwi lyaŵaYawe lyaliisile muli Agayi uwakusimika ati:
4Kansi iyi nimpindi yakwikala mweŵo mweŵene mumaŋanda ali netuŵimbeulu, ili icili yalukoso iyi-ŋanda? 5Pakuti pali fyefyo lomba ŵa Yawe ŵamaŵumba ŵalukulaŵile'fi ati: Kamulaŋguluka bwino insila syenu. 6Mwaliminsaile ifinji, sombi mwateŵula ifice; mulalya, sombi tamwikuta-po; mulanwa, sombi tacisila-po icilaka cenu; mulafwala, sombi tapali-po uwakumfwa-po iciŵe; kaŵili uyo upoka amalambulo alaaŵika lukoso mumukopa utiŵacile. 7ŴaYawe ŵamaŵumba ŵalukulaŵile'fi ati: Kamulaŋguluka bwino insila syenu. 8Kamunina kulupili, mulete ifiti, mwiŵake iŋanda; eli naneŵo ŋkasaŋgalalilamo muli yo, nekulemiwa, efilukulaŵila ŵaYawe. 9Mwalipembelele ifinji, sombi ŵoneni, fyaliŵele fice; kaŵili pakufiletela kwenu nalifyululwile. Lomba ŵaYawe ŵamaŵumba ati: Mbanindo? Nipakuti paŋanda yanji iili lukoso, ili mulukuŵutuka mwense umo umo mukuya kuŋanda syenu. 10Pakuti pali fyefyo iulu lilukumukanisyeni icime, necalo nekulukumukanisyeni ifisepo fyacico. 11Popele ndiciitile icilala mukwisa pacalo, napamapili, napamasaka napamfaina, napamafuta, napali fyefyo fyonse ifi umesya umusili, napaŵantu, napaŋombe, napamilimo yonse iyakuminwe.
12Peŋka Selubabeli umwana wakwe Syalatieli, naJosyua umwana wakwe Jeosadaci umupapatilisi umukulu, pamo neŵantu ŵonse aŵasyele-po, ŵalilyumfwile isiwi lyaŵaYawe Lesa waŵo, nemasiwi akwe Agayi uwakusimika, pakuti ŵaYawe Lesa waŵo eŵamutumine; kaŵili aŵantu ŵalukutonda pamenso aŵaYawe.
13Popele apo Agayi, iŋkalamba yaŵaYawe, uwalukulaŵila iceŵo caŵaYawe kuŵantu, walilaŵile ati: Ŵalukulaŵila ŵaYawe ati: Neŵo ndi nenu.
14Lomba ŵaYawe ŵaliŵusisye umupasi wakwe Selubabeli umwana wakwe Syalatieli icilolo capacalo caŵaJuda, nemupasi wakwe Josyua umwana wakwe Jeosadaci umupapatilisi umukulu, nemipasi yaŵantu aŵasyele-po ŵonse; naŵo ŵaliisile nekupyuŋga muŋanda yaŵaYawe ŵamaŵumba, Lesa waŵo, 15pakasuŵa kamakumi aŵili nasine akamwensi wakukoŵeka-mo, pamwaka waŵuiŵili uwamfumu Daliu.
Currently Selected:
Agayi 1: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
