Ifyakutaŋga 50
50
1Popele apo Josefi waliwilile pamenso paŵawisi, nekulilila pali ŵo, nekuŵafyonta-po. 2Popele Josefi waliŵafundile aŵantu ŵakwe aŵalaye ati ŵomyeni umuŵili waŵatata. Lomba aŵalaye ŵalimuumisye Isilaeli. 3Popele ŵalimukumanisye insiku amakumi ane; pakuti fyopele'fyo efi sikumana insiku isyakuumya umufu; kaŵili aŵaIjipiti ŵalimulilile insiku amakumi asanu naaŵili.
4Popele, pakupite'nsiku isyakumulila, Josefi walilaŵile kuwamuŋanda yakwe Falo, ati: Kani ŵukumo ndibwene uluse pamenso enu, ndukumukombeteleni ati mulaŵile mumatwi aŵaFalo ati: 5Ŵatata ŵalindapisye ati: Wona ndukufwa, mucilende canji ico nalitulile mucalo caKanani, emo ukansika. Pakuti pali fyefyo pano musumine ati ŋkave, ŋkawasike ŵatata, eli ŋkabwela. 6Popele Falo ati: Koya, ukaŵasike ŵawiso, koti nifyefyo ifi ŵakulapisye.
7Popele apo, Josefi waliile mukuŵasika ŵawisi: kaŵili waliile pamo neŵapyunjisi ŵakwe Falo ŵonse, aŵakulu awamuŋanda yakwe, neŵakulu ŵonse aŵamucalo caIjipiti, 8pamo newamuŋanda yakwe Josefi ŵonse, neŵakwaŵo, newamuŋanda yaŵawisi: sombi utwana twaŵo nemataŋga aŵo ambelele neaŋombe ŵalisilile mucalo caGosyeni. 9Kaŵili waliile pamo neŋgolofwana neŵantu aŵapali ŵakafwalo: lomba kwali liŵumba ilikulu. 10Popele apo ŵalificile kuciŵansa cakwe Atadi icakupumina-po, icili pesilya lyaJodeni; lomba apo kaŵalila nekulila ukukulu ukwansoni syakuti; kaŵili aliŵalilile ŵawisi insiku sisanu. 11Popele injikale isyamucalo ico, aŵaKanani, ili syabwene ukulilo'ko ukwapaciŵansa cakwe Atadi, syialilaŵile ati: Ukulilo'ku kulemene kuŵaIjipiti. Popele pakuti pali fyefyo isina lyapapo lyaliilicilwe ati niAbelimisilayimi, apali pesilya lyaJodeni. 12Popele aŵana ŵakwe aŵalalume ŵalimucitile koti nifyefyo ifi aŵafundile; 13pakuti aŵana ŵakwe ŵalimupintile kucalo caKanani, nekumusika mwiceŋgo ilyamwiŵala lyaMacipela, ili aulile Ablaamu pamo neŵala kuli Efilono umuYeti, pamenso paMamile, ati liŵe pakusicila.
14Popele apo Josefi, ili asicile ŵawisi, walibwelele kucalo caIjipiti, ye neŵakwaŵo naŵaŵo ŵonse aŵo aile naŵo mukuŵasika ŵawisi.
15Popele apo aŵakwaŵo Josefi, ili ŵabwene ati ŵawisifwe ŵalifwile, ŵalilaŵile ati: Cipale Josefi akatufitilwa, nekutubwesesyo'mulandu uwakukumana pakuti pakuŵifyo'ko konse uku twamucitile. 16Popele ŵalitumine amasiwi kuli Josefi ati: Wawisinwe, ili tawaŋgafwa, ŵalifundile ati: 17Mukalaŵile'fi kuli Josefi ati: Ndukukukombetela ati ukafitulucile ukupulaisya kwaŵakwanu, nekuŵifya kwaŵo, pakuti ŵalikucitile ukuŵifya. Lomba ŵukumo, tulukumukombeteleni ati mukafitulucile ukupulaisya kwaŵapyunjisi ŵaŵaLesa ŵaŵawisinwe. Popele Josefi walililile neminsosi, ili ŵalaŵile kuli ye. 18Popele apo kaŵili aŵakwaŵo ŵaliile nekwinamisya pamenso akwe, nekulaŵila ati: Ŵoneni, tuli ŵantu ŵenu. 19Popele Josefi walilaŵile kuli ŵo ati: Mwitina; kansi nineŵo ene ndi pamupunda waŵaLesa? 20Popele mweŵo mwati muncite ukuŵifya; sombi ŵaLesa ŵalififwaile koti fiweme, ati fikaŵe koti nififino lelo, mukuŵapulusya aŵantu aŵenji ati ŵekale nemweo. 21Pakuti pali fyefyo lomba, mwitina; ŋkalukumupeleni ityakulya, nekutupela netwana twenu. Naye aliwasaŋgalesye, nekulaŵilo'ŵutende kuli ŵo.
22Popele Josefi waliikele mucalo caIjipiti, ye umwine newamuŋanda yaŵawisi; kaŵili Josefi waliikele pano pesonde imyaka umwando'mo nekumi peulu. 23Kaŵili Josefi walibwene aŵana ŵakwe Efilayimi aŵacitentekwa icaŵufitatu; nakaŵili neŵana ŵakwe Macili, umwana wakwe Manase umwalalume, ŵalikulile pamolu akwe Josefi.
24Popele Josefi walilaŵile kuŵakwaŵo ati: Ndukufwa: sombi icine ŵaLesa ŵakesa mukumuŵoneni, nekumufumyeni mucalo ici, nekumufisyeni kucalo ico ici ŵalapile kuli ŵaAblaamu naŵalsaci naŵaYakobi. 25Popele apo Josefi walilapile kuŵana ŵakwe Isilaeli ati: Icine ŵaLesa ŵakesa mukumuŵoneni; popele mukapinta amafupa anji ukwafumya pano. 26Fyopele'fyo Josefi kaafwa; imyaka yakwe yalikumene umwando'mo nekumi peulu. Peŋka kaŵamuumya, kaŵamuŵika mwibokosi mucalo caIjipiti.
Currently Selected:
Ifyakutaŋga 50: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
