Ifyakutaŋga 48
48
1Popele apo panuma yafintu ifyo, umbi walilaŵile kuli Josefi ati: Woneni, ŵawisinwe watukutenda: naye Josefi walipintile aŵana ŵakwe ŵaŵili, Manase naEfilayimi. 2Popele umbi walimuŵulile Yakobi ati: Ŵoneni, Josefi umwana wenu alukwisa kuli mweŵo. Popele Isilaeli walilikoselesye, nekwikala pawulo.
3Popele Yakobi walilawile kuli Joseti ati: WaLesa Aŵamakosa onse ŵalibwenekele kuli newo kuLusu mucalo caKanani, nekunsyucisya, nekulaŵila kuli neŵo ati: 4Wona, ŋkakuleŋgesyo' kufyalisya, nekukufunusya, nekuleŋga kuli weŵo iŵumba lyamikoka yaŵantu; kaŵili ŋkawapela aŵana ŵoŵe panuma poŵe icalo ici koti ŵupyani ubwamuyayaya. 5Lomba pano aŵana ŵoŵe aŵalalume ŵaŵili aŵafyalilwe kuli weŵo mucalo caIjipiti, ili nsiŋgesa kuli weŵo kucalo caIjipiti, ŵanji neŵo; Efilayimi naManase ŵakalukuli ŵanji, koti nifyopele'fyo ifili Lubeni naSimyoni. 6Popele aŵana ŵoŵe, aŵo ukafyala panuma yaŵo, ŵakalukuli ŵoŵe; ŵakelikwa koti lisina lyaŵakwaŵo paŵupyani bwaŵo. 7Lomba neŵo, ili nafumine kuPadana, Laceli walifwilile pali neŵo mucalo caKanani pansila, ili pacili umusinso uwakufika kuEfilata: popele nalimusicile umo munsila iyakuya kuEfilata (wopele eBetelemi).
8Popele apo ŵaIsilaeli ŵalilolele aŵana ŵakwe Josefi aŵalalume, nekulaŵila ati: Mbaŵa niŵani? 9Popele Josefi walilaŵile kuli ŵawisi ati: Wana ŵanji aŵalalume aŵo ŵampele ŵaLesa pano. Kumfwa naŵo ati: Ndukukukombetela ati uŵalete kuli neŵo, mbasyucisye. 10Lomba amenso aŵaIsilaeli ali nekafinsi pakuti paŵucekulu, taŵaisiŵile ukuŵona. Popele aliŵapalamisye kuli ŵo; naŵo kaŵaŵafyontapo nekuŵakumbata. 11Popele' ŵaIsilaeli ŵalilaŵile kuli Josefi ati: Nsinalukucetekela ati ŋkakuwona pamenso; lomba ŵona, ŵaLesa ŵasumina ati mbone neŵana ŵoŵe kaŵili. 12Popele Josefi waliŵafumisye mumatampa akwe; nekwinamisya lukoso pansi. 13Popele Josefi nekuŵatwala ŵoŵilo, Efilayimi kukuŵoko ukwalwine ukumutwala kucipiko caŵaIsilaeli, naManase nave kukuŵoko ukwacipiko ukumutwala kulwine lwawa Isilaeli, nekuŵapalamisya kuli ŵo. 14Popele ŵaIsilaeli ŵalitambicile ukuŵoko kwaŵo ukwalwine nekukuŵika pamutwi wakwe Efilayimi, umwaniceŵantu, nekuŵika nekuŵoko kwaŵo ukwacipiko pamutwi wakwe Manase; ŵaliŵicile'fyo amaŵoko umumbo, pakuti Manase ewatanjile ukufyalwa.
15Peŋka kaŵamusyucisya Josefi, nekulaŵila ati: ŴaLesa aŵo aŵa ŵaendele pamenso aŵo ŵawisifwe ŵaAblaamu naŵalsaci, aŵo-ŵaLesa aŵalukumpele' fyakulya umweo wanji wonse ukufika nakuli lelo, 16iŋkalambe'yo iyandubwile kufyakuŵifya fyonse, ŋgaiwasyucisye aŵanice; kaŵili isina lyanji ŋgalikasimbulwe pali ŵo, pamo nesina lyaŵawisifwe ŵaAblaamu naŵalsaci; nakaŵili ŋgaŵakafule, ŵakaŵe liŵumbe' likulu pakati pacalo capansi.
17Popele apo Josefi, ili abwene ati ŵatata ŵaŵiko'kuŵoko kwaŵo ukwalwine pamutwi wakwe Efilayimi, taatemenwe'fyo, tau: popele alisuntwile ukuŵoko kwaŵawisi ati ŋkufumve kumutwi wakwe Efilayimi, ŋkuwike pamutwi wakwe Manase. 18Kaŵili Josefi walilaŵile kuli ŵawisi ati: Ifyo tefyo, Tata: pakuti niwuyu uwatanjile ukufyalwa; muŵike ukuŵoko kwenu ukwalwine pamutwi wawuyu. 19Sombi ŵawisi ŵalikene, nekulaŵila ati: Ndiisi, wemwana wanji, ndifiisi: uyu naye akaŵa cikoto caŵantu, naye akaŵa mukulu: naŋgawa nifyefyo umwanice wakwe akamucila ye uŵukulu, kaŵili aŵana ŵakwe wakawa fikoto fyaŵantu mpaŋgana mpaŋgana. 20Popele ŵaliŵasyucisye ako-kasuŵa, ati: Muli weŵo emo akasyucisya Isilaeli, pakulaŵila ati: ŴaLesa ŋgawakakwalule koti niEfilayimi naManase: kaŵili ŵalimutanjisyepo Efilayimi ukumucisya pali Manase. 21Popele ŵaIsilaeli ŵalilaŵile kuli Josefi ati: Wona, ndukufwa: sombi ŵaLesa ŵakalukuli nenu, ŵakamubwesesyeni kucalo caŵawisinwe. 22Nakaŵili ndikupele icipimo cimo icakucila napaŵakwaŵenu, ico napokolwele muminwe yaŵaAmoli kumpoko yanji nakuŵuta bwanji.
Currently Selected:
Ifyakutaŋga 48: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
