Ifyakutaŋga 47
47
1Popele apo Josefi waliinjile, nekumuŵula Falo ati: Ŵatata neŵakwaŵesu pamo nemataŋga aŵo ambelele neaŋombe nafyo fyonse ifi ŵali nafyo, ŵalifumine mucalo caKanani; lomba ŵoneni, ŵali mucalo caGosyeni. 2Popele peŵumba lyaŵakwaŵo walipintile aŵantu ŵasanu, nekuŵafisya pamenso akwe Falo. 3Peŋka Falo kaalaŵila kuŵakwaŵo Josefi ati: Mbemilimo yenu indo? Naŵo kaŵalaŵila kuli Falo ati: Fweŵantu ŵenu nifweŵembesi, fweŵo naŵawisifwe. 4Kaŵili ŵalilaŵile kuli Falo ati: Tuliisile mukulukwikele mucalo; pakuti kwesu takuli-po icembelelo camataŋga aŵantu ŵenu; pakuti insala ililemenene mucalo caKanani: pakuti pali fyefyo lomba, tulukumuko'libeteleni ati musumine ati fweŵantu ŵenu tulukwikala mucalo caGosyeni.
5Popele Falo walilaŵile kuli Josefi ati: Wawiso neŵakwaŵenu ŵaliisile kuli weŵo: 6icaio caIjipiti cili pamenso oŵe, ŵekalike ŵawiso neŵakwaŵenu pacalo apacilile ukuwama; ŋgaŵalukwikala mucalo caGosyeni; kaŵili kani uliŵesi aŵamano mwiŵumba lyaŵo, ukaŵekalike ŵo niŵucilolo icapanama syanji.
7Popele apo Josefi waliŵenjisye ŵaYakobi ŵawisi, nekuŵekalika pamenso akwe Falo; popele Yakobi walimusyucisye Falo. 8Popele Falo walilaŵile kuli Yakobi ati: Mbensiku syamyaka yamweo wenu sili siŋga? 9Kumfwa Yakobi kaalaŵila kuli Falo ati. Insiku syamyaka yalwendo lwanji silikumene imyaka umwanda umo nemakumi atatu. Insiku syamyaka yamweo wanji sice, siŵi; kaŵili tasikumene, ukusipenda, koti ninsiku syamyaka yamyeo yaŵawisifwe pansiku syalwendo lwaŵo. 10Lomba Yakobi walimusyucisye Falo, nekufuma-po napamenso akwe Falo.
11Popele apo Josefi waliŵekalicile ŵawisi neŵakwaŵo, nekuŵapelo'ŵupyani mucalo caIjipiti, mucalo umucilile ukuwama, mucalo caLamese, koti nifyefyo ifi afundile Falo. 12Popele Josefi walukuŵapela ŵawisi neŵakwaŵo neŵamuŋanda yaŵawisi ŵonse ifyakulya koti fikoto fyaŵo.
13Popele tamwali ifyakulya monse mucalo; pakuti insala yalilemenene ukwakuti, fyopele'fyo icalo caIjipiti necalo caKanani fyalilesucile pakuti pansala. 14Popele Josefi waliŵuŋgenye indalama syonse isyabwenekele mucalo caIjipiti namucalo caKanani, pakuti pamasaka ayo ŵaulile: popele Josefi waliinjisye indalama muŋanda yakwe Falo. 15Popele apo, pakusilo'kuposeka indalama syonse mucalo caIjipiti namucalo caKanani, aŵaIjipiti ŵonse ŵaliisile kuli Josefi, nekulaŵila ati: Mutupele ifyakulya: pakuti pando tuŋgafwila pamenso enu? pakuti indalama syaise'li sipela. 16Kumfwa Josefi ati: Poseni inama syenu, popele nakumupeleni pakuti panama syenu, kani sisile indalama. 17Peŋka kaŵalete'nama syaŵo kuli Josefi: popele Josefi walukuŵapele'fyakulya ukusitula ŵakafwalo nemataŋga ambelele neaŋombe nemboŋgolo: lomba aliŵalisisye ifyakulya ukusitule'nama syaŵo syonse uyo-mwaka.
18Popele pakusilo'yo-mwaka, ŵaliisile kuli ye pamwaka waŵuiŵili, nekulaŵila kuli ye ati: Tesi tufise kuli ŵaSikulu ŵesu ati indalama syesu siliposekele syonse, nakaŵili ati amataŋga anama aŵaSikulu ŵesu; tapasyele-po ifintu pamenso aŵaSikulu ŵesu, sombi imiŵili yesu nefyalo fyesu fyeŋka efyasyele-po; 19mbanindo tuŋgafwila pamenso enu, fweŵo necalo cesu? Kamutuula fweŵo necalo cesu ifyakulya, popele fweŵo necalo cesu tukalukuli niŵakalume ŵaŵaFalo: lomba mutupele-po imbuto, ati tukalukwikele nemweo, twikafwa, necalo naco cikonalwa. 20Fyopele'fyo Josefi walimuulile Falo icalo conse icaIjipiti; pakuti aŵaIjipiti ŵonse ŵaliulile amaŵala aŵo uyu lyakwe uyu lyakwe, pakuti insala yalilemenene pali ŵo: popele icalo caliŵele cakwe Falo. 21Lomba neŵantu aliŵaletele kumisi Ilkuŵafumya kumipaka yonse iyacalo caIjipiti. 22Sombi icalo caŵapapatilisi ceŋka taaculile; pakuti aŵapapatilisi ŵalukupoka kuli Falo icakuŵaaŵanya, lomba ŵalukulya icakwaŵanya icalukuŵapela Falo; pakuti pali fyefyo taŵaulile icalo caŵo.
23Popele apo Josefi walilaŵile kuŵantu ati: Ŵoneni, lelo naŵolila ŵaFalo mweŵo necalo cenu; ŵoneni imbuto syenu nsi, mukaŵyale mucalo. 24Popele apo lomba, pakuloŋgela, pali fisanu mukaŵapele ŵaFalo cimo, fine fikalukuli fyenu mweŵene, ifyakuŵyala mwiŵala nefyakulya mweŵo, neŵamumananda enu, nefyakulya utwana twenu. 25Kumfwa naŵo ati: Mwapulusya imyeo yesu: ŋgatukasaŋge uluse pamenso aŵaSikulu ŵesu, tukalukuli ŵapyunjisi ŵaŵaFalo. 26Popele apo Josefi walilembele nefunde ilyakucalo caIjipiti ukufika nakukasuŵa kalelo, ati Falo aŋgapoka cimo pali fisanu; sombi icalo caŵapapatilisi weŋka tacaŵele cakwe Falo. 27Popele aŵaIsilaeli ŵaliikele mucalo caIjipiti, mucalo caGosyeni; naŵo ŵaliŵele nemaŵoni mopele umo, nekufyalisya nekufunuko'kwakuti.
28Popele Yakobi waliikele mucalo caIjipiti imyaka ikumi naisanu naiŵili; fyopele'fyo insiku syakwe Yakobi, imyaka yamweo wakwe, yalikumene imyaka umwando'mo nemakumi ane nemyaka isanu naiŵili peulu. 29Popele nempindi nekupalamina iŋgafwila-po Isilaeli; popele alimwitile Josefi umwana wakwe, nekulaŵila kuli ye ati: Kani ŵukumo ndibwene uluse pamenso oŵe, ndukukukombetela ati uŵike ukuŵoko koŵe mumatampa anji, ukancite'ŋkumbu nefyacine; ndukukukombetela ati tekunsicila mucalo caIjipiti; 30sombi pakulala neŵo naŵawisifwe, ukampinte ukumfumya mucalo caIjipiti mukunsika neŵo apakusicila ŵo. Naye ati: Ŋkacita fyopele'fyo ifi mwalaŵila. 31Kumfwa naye ati: Ulape kuli neŵo necilapo! Naye walilapile kuli ye. Popele Isilaeli waliinamisye paŵulo kumitwi.
Currently Selected:
Ifyakutaŋga 47: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
