Ifyakutaŋga 46
46
1Popele apo Isilaeli waliimine ulwendo lwakwe pamo nafyo fyonse ifi ali nafyo, nekufika nakuBeyasyeba, nekupose'milambu iyakwipaya kuli ŵaLesa ŵaŵalsaci ŵawisi. 2Popele ŵaLesa ŵalilaŵile kuli Isilaeli pakuŵoneka ukwapaŵusiku, ati: Yakobi, Yakobi! Kumfwa naye ati: Nineŵo ŋkuno. 3Kumfwa ŵaLesa ati: NineŵaLesa, eŵaLesa ŵaŵawiso: witina ukuya kucalo caIjipiti; pakuti kopele uko ŋkaleŋga kuli weŵo icikoto caŵantu Icikulu; 4ŋkaya pamo naweŵo kucalo caIjipiti; kaŵili icine ŋkakubwesesya kuno liŵili; nakaŵili Josefi akaŵike'minwe yakwe pamenso oŵe. 5Popele apo Yakobi waliimine kuBeyasyeba; lomba aŵana ŵakwe Isilaeli ŵalimupintile Yakobi wisiŵo pamo netwana twaŵo neŵakasi ŵaŵo muŋgolofwana isyo isi atumine Falo mukumupinta. 6Popele ŵalipintile inama syaŵo nemaŵoni aŵo ayo ŵanoŋkele mucalo caKanani, nekufika nakucalo ca Ijipiti, Yakobi necifyalo cakwe conse pamo nakwe: 7aŵana ŵakwe aŵalalume, neŵana ŵaŵo aŵalalume pamo nakwe, neŵana ŵakwe aŵanakasi, neŵana aŵanakasi ŵaŵana ŵakwe aŵalalume, necifyalo cakwe conse, aliletele kucalo caIjipiti.
8Aya emasina aŵana ŵakwe Isilaeli, aŵaficile mucalo caIjipiti, Yakobi neŵana ŵakwe: Lubeni umwana wakwe Yakobi umuŵele. 9Neŵana ŵakwe Lubeni: Kanoci naPalu naEsiloni naKami. 10Neŵana ŵakwe Simyoni: Yemweli naYamini naOwadi naYacini naSoyali naSyauli umwana wamwanakasi umuKanani. 11Neŵana ŵakwe Lefai: Gesyoni naKoyati naMelali. 12Neŵana ŵakwe Juda: Elu naOnani naSyela naPelesi naSyala; sombi Elu naOnani ŵalifwilile mucalo caKanani. Kaŵili aŵana ŵakwe Pelesi ŵali niEsiloni naKamuli. 13Neŵana ŵakwe Isaka: Tola naPuwa naYobi naSimiloni. 14Neŵana ŵakwe Sebuluni: Seledi naEloni naYaleli. 15Aŵo eŵana ŵakwe Lea aŵalalume, aŵo amufyalile Yakobi kuPadanalama, pamo nemwana wakwe umwanakasi Dina. Imitima yaŵana ŵakwe aŵalalume neŵanakasi ŵonse yalikumene amakumi atatu naitatu. 16Neŵana ŵakwe Gadi: Sifyoni naKaji naSyuni naEsiboni naYeli naAlodi naAleli. 17Neŵana ŵakwe Asyali: Yimina naYisyua naYiswi naBeliya naSelaci iŋkasi yaŵo; neŵana ŵakwe Beliya: Ebeya naMaleceli. 18Aŵo eŵana aŵalalume aŵakwe Silipa, uyo Labani ewamupele Lea umwana wakwe umwanakasi, lomba aŵo walimufyalile Yakobi, imitima ikumi naisanu naumo. 19Neŵana ŵakwe Laceli umukasi wakwe Yakobi: Josefi naBenjamini. 20Kaŵili kuli Josefi mucalo caIjipiti kwalifyelwe Manase naEfilayimi, aŵo Asenati umwana umwanakasi uwakwe Potifela umupapatilisi uwakuOni ewamufyalile. 21Neŵana ŵakwe Benjamini: Bela naBekeli naAsibeli naGela naNamani naEci naLosi naMupimi naKupimi naAlidi. 22Aŵo eŵana ŵakwe Laceli, aŵafyalilwe kuli Yakobi; imitima yonse yalikumene ikumi naine. 23Nemwana wakwe Dani: Kusimi, 24Neŵana ŵakwe Nafitali: Yasiyeli naGuni naYeseyeli naSilemi. 25Aŵo eŵana aŵalalume aŵakwe Bilya, uyo Labani ewamupele Laceli umwana wakwe umwanakasi, lomba aŵo walimufyalile Yakobi; imitima yonse yalikumene isanu naiŵili. 26Imitima yonse'yo iyaisile kucalo caIjipiti pamo naYakobi, iyafumine kuluŵunda lwakwe, apakuŵulo'kupenda aŵakasi ŵaŵana ŵakwe, yalikumene amakumi asanu nalimo naisanu naumo; 27kaŵili aŵana ŵakwe Josefi aŵalalume aŵafyalilwe kuli ye mucalo caIjipiti ŵalikumene imitima iŵili: imitima yonse iyacikoto cakwe Yakobi, iyaisile mucalo caIjipiti, yalikumene amakumi asanu naaŵili.
28Popele Yakobi walitumine Juda ukumutanjilila kuli Josefi, mukumulanjisya insila iyakuya kuGosyeni; lomba ŵalificile kucalo caGosyeni. 29Peŋka Josefi kaansike'ŋgolofwana yakwe, kaaya mukuŵacinsya ŵaIsilaeli ŵawisi kucalo caGosyeni; naye waliisile pamenso aŵo, nekuŵakumbata namumukosi, nekulilila pamukosi waŵo impindi itali. 30Popele ŵaIsilaeli ŵalilaŵile kuli Josefi ati: Ŋgandukufwa pano, pakuti nakuŵona pamenso ati ucili nemweo. 31Popele Josefi walilaŵile kuŵakwaŵo nakucikoto caŵawisi ati: Ndukuya mukuŵaŵula ŵaFalo, nekulaŵila kuli ŵo ati: Aŵakwaŵesu necikoto caŵatata, aŵalukwikala mucalo caKanani, ŵaliisile kuli neŵo; 32kaŵili aŵa-ŵantu ŵembesi, pakuti ŵalukwembele'ŋombe; kaŵili ŵaleta amataŋga aŵo ambelele neaŋombe nafyo fyonse ifi ŵali nafyo. 33Popele apo, ili ŵakamwiteni ŵaFalo, nekulaŵila ati: 34Mbemilimo yenu indo? lomba mukalaŵile ati: Fweŵantu ŵenu twalukwembele'nama ukutatika kuŵusaŋkwa bwesu ukufika nakuli ŵuŵunoŵukumo, fweŵo naŵawisifwe; ati mukalukwikele mucalo caGosyeni; pakuti aŵembesi ŵonse fipakaŵi fyaŵaIjipiti.
Currently Selected:
Ifyakutaŋga 46: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
