Ifyakutaŋga 45
45
1Popele apo Josefi taaisiŵile ukulikanya pamenso awawo wonse awaimakene pali ye: naye ati: Ŵafumyenipo ŵonse pali neŵo. Popele tapaimakene pali ye neli umo umuntu wakwe, lomba Josefi walilifisulwile kuŵakwaŵo. 2Naye kaalila nemusowa: naŵaIjipiti naŵo kaŵomfwa, newamuŋanda yakwe Falo naŵo kaŵomfwa. 3Lomba Josefi walilaŵile kuŵakwaŵo ati: Nine Iosefi: ŵatata kani ŵacili nemweo? Sombi aŵakwaŵo taŵaisiŵile ukumwasuka, pakuti walikaŋkamucile pamenso pakwe.
4Peŋka Josefi kaalaŵila kuŵakwaŵo ati: Ndukumukombeteleni ati palamineni kuli neŵo. Naŵo kaŵapalamina. Kumfwa naye ati: Nine Iosefi umukwanu, nemwaulile kucalo caIjipiti. 5Sombi pano mwiŵa nensoni, mwilikalipila, pakuti pakuŋgulila kuno: pakuti ŵaLesa ŵalintumine ukumutanjilileni mukupulusye'myeo yaŵantu. 6Insala yaikala mucalo iyi-myaka iŵili: kaŵili pacisyele imyaka isanu itaikalukuli-po neli kulima neli kuloŋgela, 7Popele ŵaLesa ŵalintumine ukumutanjilileni mukumulamineni aŵakusyala-po pacalo capansi, nekumupulusyeni muli nemyeo yenu kukupulusya ukukulu. 8Popele lomba tamwali nimweŵo mwantumine kuno, sombi niŵaLesa aŵantumine: kaŵili ŵaliŋgalwile ninewisiŵo ŵaFalo, ninesikulu uwapananda yaŵo yonse, ninewakwikalika icalo conse icaIjipiti. 9Endesyeni, muye kuli ŵatata, mukalaŵile kuli ŵo ati: Umwana wenu Josefi walaŵila ati ŵaLesa waŋgalula ninesikulu uwapacalo caIjipiti conse: iseni kuli neŵo, mwikakokola; 10po pele mukalukwikele mucalo caGosyeni, eli mukalukuli apepi napali neŵo, mweŵo neŵana ŵenu neŵana ŵaŵo, nemataŋga enu ambelele neaŋombe, pamo nafyo fyonse ifi muli nafyo; 11lomba kopele uko ŋkalukumupeleni ifyakulya; pakuti pacisyele imyaka isanu iyansala; mwikesa kuŵusuka, mweŵo newamuŋanda mwenu nafyo fyonse ifi muli nafyo. 12Kaŵili ŵoneni, amenso enu alibwene, nemenso amukwasu Benjamini nao alibwene, ati kanwa kanji neŵo akalukulaŵila nenu. 13Nakaŵili mukaŵaŵule ŵatata ifyaŵuleme bwanji ŵonse ubwamucalo caIjipiti nefyafifi fyonse ifi mwaŵona; kaŵili mukendesye mukaŵalete kuno ŵatata.
14Popele Josefi walimukumbete Benjamini umukwaŵo namumukosi, nekulukulila; kaŵili Benjamini naye nekulilila napamukosi wakwe. 15Popele alifyontele-po paŵakwaŵo ŵonse, nekulilila pali ŵo: peŋka panuma yafyefyo aŵakwaŵo ŵalukwambala nakwe.
16Popele impupo syafyefyo syaliumfwanicile namuŋanda yakwe Falo, ati: Ŵalificile aŵakwaŵo Josefi. Popele ifyo fyalimutemwesye ukwakuti Falo, nekuŵatemwesya neŵantu ŵakwe. 17Popele apo Falo walilaŵile kuli Josefi ati: Laŵila kuŵakwaŵenu ati: Kamucite'fi: mutwike inama syenu, mwende mukaye kucalo caKanani; 18popele mukaŵapinte ŵawisinwe newamumananda enu, mukese kuli neŵo: eli ŋkamupeleni ifiweme ifyamucalo caIjipiti, mukalukulya amafuta amucalo. 19Pano mulifundilwe, kamucite'fi, mutuŵulile iŋgolofwana mucalo caIjipiti utwana twenu, nekuŵaŵulila neŵakasi ŵenu, mukaŵalete ŵawisinwe, mukese. 20Kaŵili amenso enu ekaficite'ŋkumbu ifintu fyenu; pakuti ifiweme ifyamucalo caIjipiti conse fyenu.
21Popele apo aŵana ŵakwe Isilaeli ŵalicitile'fyo. Popele Josefi waliŵapele iŋgolofwana, koti kufunda kwakwe Falo, nekuwapela nefyakulya ifyapansila, 22Kaŵili ŵonse umo umo aliŵapele ifyakufwala; sombi Benjamini alimupele indalama imyanda itatu pamo nefyakufwala fisanu. 23Kaŵili kuli ŵawisi walitumine ifyakuŵe'fi: imboŋgolo ikumi isitwicilwe ifintu ifiweme ifyamucalo caIjipiti, nemboŋgolo isyanakasi ikumi isitwicilwe amasaka nawasiŋkwa nefilyo ifyakulya ŵawisi pansila. 24Fyopele'fyo aliŵatumine aŵakwaŵo, naŵo kaŵakumbuluka: kaŵili alilaŵile kuli ŵo ati: Cenjeleni mwikatosya pansila.
25Popele ŵalifumine-mo mucalo caIjipiti nekufika namucalo caKanani kuli ŵaYakobi ŵawisiŵo. 26Popele ŵaliŵaŵulile ati: Josefi acili nemweo, alukwikalike'calo conse icaIjipiti. Sombi ŵaYakobi ŵalilemucile mumutima, pakuti taŵacetekele amasiwi aŵo. 27Peŋka kaŵaŵaŵula amasiwi akwe Josefi onse aŵaŵulile. Popele apo, ili ŵabwene iŋgolofwana isi atumine Josefi mukuŵapinta, eli waŵucile umupasi wawaYakobi ŵawisiŵo: 28popele ŵaIsilaeli ŵalilaŵile ati: Filikumene; Josefi umwana wanji acili nemweo; ŋkaya mukumuŵona ili nsiŋgatwa.
Currently Selected:
Ifyakutaŋga 45: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
