Ifyakutaŋga 44
44
1Popele apo Josefi waliciŵulile icilolo icamuŋanda yakwe ati: Isusya impafu syaŵantu aŵa ifyakulya ifyakukumana amakosa aŵo akupinta, nekuŵabwelesesya ŵonse indalama syaŵo mutunwa twampafu syawo: 2kaŵili uŵike neŋkomeci yanji, iyo-ŋkomeci yesilifa, mukanwa kalupafu lwamwaniceŵantu, pamo ne ndalama syakwe isyamasaka. Po pele calicitile koti masiwi ayo alaŵile Josefi.
3Popele ŋgamailo pakuca lukoso, aŵantu ŵalituminwe ŵo nemboŋgolo syaŵo. 4Popele, ili ŵafumine mumusi, lomba nemusinso tawaŋgenda utali, Josefi walilaŵile kucilolo cakwe ati: Ima, uŵalonde aŵo-ŵantu; popele, pakuwasaŋga, ukalaŵile kuli ŵo ati: Mbanindo mwacitilo'kuŵifya, mwemwapoko'kuwama? 5Kansi iyi teŋkomeci inwina-mo ŵasikulu ŵanji, nekuŵucilako kaŵili? Mwaŵifyo'kwakuti pakucite'fi. 6Popele co caliŵasanjile, nekulaŵila amasiwi ayo kuli ŵo. 7Peŋka naŵo kaŵalaŵila kuli co ati: Mbanindo ŵalukulaŵilila ŵasikulu ŵanji amasiwi akuŵe'fyo? Aŵantu ŵenu ukucite'fyakuŵe'fyo teko! 8Ŵoneni, indalame'syo isi twabwene mutunwa twampafu syesu, twalibwesesye kuli mweŵo ukusifumya kucalo caKanani: mbasyani lomba tuŋgewa muŋanda yaŵawisikulunweni neli lisilifa neli ligolide? 9Uyo-muntu wenu, umwakuŵona ali nayo, ŋgaafwe, nafweŵo kaŵili eli tuŋgawa niŵakalume ŵaŵasikulu ŵanji. 10Naco ati: Pano kaŵili ŋgafiwe koti masiwi enu: uyo, ukaŵonwa ali nayo, akaŵa nikalume wanji; sombi mweŵo tesi muŵe nemulandu. 11Peŋka kawaaŋgufya, kaŵatula pansi ŵonse impafu syaŵo, kaŵakakulula ŵonse impafu syaŵo. 12Naco kacifwaya, kacitaŋga kumukulu-ŵantu, kacileka kumwanice-ŵantu: popele iŋkomeci yalibwenwe mulupafu lwakwe Benjamini.
13Popele ŵonse kaŵapandula nefyakufwala fyaŵo, kaŵatwika nemboŋgolo syaŵo ŵonse, kaŵabwelela nakumusi. 14Popele Juda neŵakwaŵo ŵalificile kunanda yakwe Josefi; naye kaacili-ko: lomba ŵo kaŵawila pansi pamenso akwe. 15Popele Josefi walilaŵile kuli ŵo ati: Mbacindo ici mwacita? Kansi tamwisi ati umuntu uwakuwe'fi ifi ndi neŵo, aliisi icine ukuŵuka? 16Kumfwa Juda ati: Mbatulaŵile'ndo kuli ŵaSikulu ŵanji? Mbatuŋgati syani? Mbatulilaŵilile syani? ŴaLesa ŵafisulula ukuŵifya kwaŵantu ŵenu: ŵoneni tuli niwakalume ŵaŵaSikulu ŵanji, fweŵo nawoyo naye usanjilwe neŋkomeci muminwe yakwe. 17Popele Josefi ati: Neŵo ukucite'fyo teko: uyo-muntu usanjilwe neŋkomeci muminwe yakwe eukaŵa nikalume wanji; sombi mweŵo, imeni neŵutende, mulukuya kuli ŵawisinwe.
18Popele Juda walipalamine kuli ye, nekulaŵila ati: MweŵaSikulu ŵanji, ndukumukombeteleni ati munsumine ati nemuntu wenu ndukulaŵile'siwi mumatwi aŵaSikulu ŵanji, popele mwiŋkalipila makosa nemuntu wenu: pakuti mweŵo muli fyopele'fyo ifili ŵaFalo. 19ŴaSikulu ŵanji ŵaliŵepwisye aŵantu ŵaŵo ati: Kani muli naŵawisinwe kani mukwanu? 20Popele fweŵo katulaŵila kuli ŵaSikulu ŵanji ati: Tuli naŵawisifwe aŵacekulu nemwana waŵucekulu bwaŵo umwanice; kaŵili umukwaŵo alifwile; ye eŋka ewasyele-po paŵana ŵaŵanyina, nakaŵili ŵawisi ŵalimutemenwe. 21Eli mwalaŵile mweŵo kuŵantu ŵenu ati: Mukamulete kuno kuli neŵo ati ŋkamuwone pamenso. 22Popele fweŵo katulaŵila kuli ŵaSikulu ŵanji ati: Umwanice tesi ukuŵaleka ŵawisi; pakuti kani aŵaleke ŵawisi, ŵawisi naŵo waŋgafwa. 23Popele apo mweŵo mwalilaŵile kuŵantu wenu ati: Kani umwanice wenu tesi akese namweŵo, tosi mukambone-po pamenso liŵili. 24Popele apo lomba, ili twaficile kuŵantu ŵenu kuli ŵatata, twaliŵaŵulile amasiwi aŵaSikulu ŵanji. 25Lomba ŵawisifwe ati: Kamuyeni liŵili, mukatuulile utwakulya. 26Kumfwa fweŵo ati: Tesi tuye-ko; kani tukalukuli nemwanice wesu, eli tuka yako; pakuti tesi tukaŵaŵone-po aŵoŵantu pamenso, kani tatukalukuli-po nemwanice wesu. 27Popele neŵantu ŵenu ŵatata kaŵalaŵila kuli fweŵo ati: Muliisi ati umukasi wanji walimfyalile aŵana aŵalalume ŵaŵili: lomba umbi walifumine-po pali ncŵo, naneŵo ati: 28Icine asantalwa; kaŵili nsiŋgamuŵona-po liŵili; 29popele kani nawuyu mukamupoke kuli neŵo, naye nekufwa, lomba mukasifisye'mfwi syanji kuSyeoli nensoni isyaŵulanda. 30Pakuti pali fyefyo lomba, paku fika neŵo kuŵantu ŵenu ŵatata, apakuŵulo'mwanice, pakuti umweo waŵo ulikakaŋkene nemweo wamwanice, 31lomba pakuŵona ati taa-po umwanice, ŵakafwa; nafweŵo fwewantu ŵenu eli tukasifisye'mfwi syaŵantu ŵenu ŵawisifwe kuSyeoli nensoni isyaŵulanda. 32Pakuti neŵo nemuntu wenu naliŵele niŋkusi pakuti pamwanice kuli ŵatata, nekulaŵila ati: Kani neŵo tesi ŋkamubwesesye kuli mweŵo, neŵo ŋkalukuli nemulandu kuli ŵatata insiku syonse lukoso. 33Pakuti pali fyefyo lomba, ndukumukombeteleni ati munsumine nemuntu wenu ati njikale pamupunda wamwanice nikalume waŵasikulu ŵanji; popele umwanice ŋgaaye neŵakwaŵo. 34Pakuti neŵo mbasyani ŋkaye kuli ŵatata, nekuŵulo'kulukuli nemwanice? Niŋgesa kuŵono'kuŵifyo' ko ukukesa pali ŵatata.
Currently Selected:
Ifyakutaŋga 44: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
