Ifyakutaŋga 43
43
1Popele insala yalilemene ukwakuti mucalo. 2Popele apo, ili ŵalile amasaka ayo ŵaletele ukwafumya kucalo caIjipiti, lomba ŵawisiŵo ŵalilaŵile kuli ŵo ati: Kamuya liŵili, mukatuulile utwakulya. 3Peŋka Juda kaalaŵila kuli ŵo ati: Uyo-muntu walilaŵile kuli fweŵo nekusipula ati: Tesi mukambonepo pamenso, kani tamukalukuli nemukwanu. 4Kani mwakutuma umukwasu pamo nafweŵo, twakuyo'ko mukumuulileni ifyakulya; 5sombi kani tesi mukamutume, tesi tukaye nafweŵo; pakuti uyo-muntu walilaŵile kuli fweŵo ati: Tesi mukambone-po pamenso, kani tamukalukuli nemukwanu.
6Popele ŵaIsilaeli ati: Mbanindo mwancitile-po ukuŵifyo'ko, ukumuŵulo'muntu uyo ati tuli-po naumbi umukwasu? 7Kumfwa naŵo ati: Uyomuntu walitwipusisye makosa ifyakuli fweŵo nefyakuŵakwaŵesu, ati: Kani ŵawisinwe ŵacili nemweo? Kani mulipo naumbi umukwanu? Eli tuŋgamuŵiua koti masiwi ayo; mbatuŋgesiwa syani ati akulaŵila ati: Mukalete-ko kuno umukwanu?
8Popele Juda walilaŵile kuli ŵaIsilaeli ŵawisi ati: Mutumeni umwanice, aye naneŵo; twakwima, twakulukuya; ati tukalukwikele nemweo, twikafwa, fweŵo namweŵo netwana twesu kaŵili. 9Neŵo ŋkaŵa niŋkusi pakuti pali ye; mukamufwaye kuminwe yanji: kani neŵo tesi ŋkamubwesesye kuli mweŵo, neli kumwikalika pamenso enu, neŵo ŋkalukuli nemulandu uyo insiku syonse lukoso; 10pakuti ŋgatatwakokwele, ŋgakale tubwelele kuno liŵili ŵukumo.
11Popele ŵaIsilaeli ŵawisiŵo ŵalilaŵile kuli ŵo ati: Kani nifyefyo ŵukumo, mucite'fi: mukapinte ifisepo ifiweme ifya mucalo mufitundu fyenu, mukamutwalile umuntu uyo akawoni, utunanana utwamusamu, netuuci, nefinuncile bwino, nafimola, nefisepo fyabotini nefyasyakedi; 12kaŵili mukapinte muminwe yenu indalama isyamakweŵo aŵili; nakaŵili indalama isyo isyabwesiwe mutunwa twampafu syenu, mukaipinte liŵili muminwe yenu; cipale ŵaliluŵile-ko. 13Mukaye nemukwanu kaŵili, mukeme, mukaye liŵili kumuntu uyo; 14popele ŵaLesa aŵamakosa onse ŋgawakamucitileni iŋkumbu pamenso amuntu uyo, ati akamukakulwileni uyomukwanu umbi pamo naBenjamini. Lomba kani ŋkafwilwa aŵana ŵanji, kansi ŋkalukufwililwe.
15Popele apo aŵantu aŵo ŵaliŵulile impese iyo, nekupinta nendalama isyamakweŵo aŵili muminwe yaŵo, nekumupinta naBenjamini; eli waŋgema, waŋgayo'ko kucalo caIjipiti, waŋgemaka na pamenso akwe Josefi. 16Popele Josefi, ili abwene Benjamini pamo naŵo, walilaŵile kucilolo icamuŋanda yakwe ati: Ŵenjisye aŵantu muŋanda, ukepaye inama, ukepike; pakuti aŵaŵantu ŵakulya naneŵo akasuŵa pakati keulu. 17Popele uyo-muntu walicitile koti kufunda kwakwe Josefi: naye uyomuntu nekuŵenjisya aŵantu muŋanda yakwe Josefi. 18Lomba aŵantu ŵalitinine, pakuti ŵaliletelwe muŋanda yakwe Josefi; naŵo ati: Pakuti pandalame'syo, isyabwesiwe mumpafu syesu pakutaŋga, epo twinjisiwe; ati aŵone umulandu kuli fwewo, atuŵucile, atuteke muli ŵukalume pamo nemboŋgolo syesu. 19Popele ŵalipalamine kucilolo icamuŋanda yakwe Josefi, nekulaŵila naco kumulyaŋgouwakunanda, nekulaŵilaati: 20MweŵaSikulu, icine twaliisile pakutaŋga mukuule'fyakulya: 21popele apo, ili twaficile pansila apo twalele, twalikakulwile impafu syesu, lomba indalama syesu fwense syali patunwa twampafu syesu syesu, indalama syesu isyakwesya bwino pesikelo; popele tulisiletele liŵili muminwe yesu. 22Kaŵili nasimbi indalama tulipintile muminwe yesu mukule'fyakulya: fweŵo tatumwisi uyo uwaŵicile indalama syesu mumpafu syesu. 23Kumfwa naco ati: Uŵutende bwikale nenu, mwitina: ŵaLesa ŵenu, eŵaLesa ŵaŵawisinwe, ŵalimupeleni uwuwoni mumpafu syenu; neŵo nalipokele indalama syenu. Popele calimufumisye Simyoni ukumuleta kuli ŵo.
24Popele apo uyo-muntu waliŵenjisye aŵantu muŋanda yakwe Josefi, nekuŵapela amenda, naŵo kaŵasamba kumakasa; naye kaasipele'mboŋgolo syaŵo ifyakulya. 25Popele ŵo ŵaliansicile impese iyo ati ŵamupele Josefi pakwisa ye akasuŵa pakati; pakuti ŵaliumfwile ati mwakulye'fyakulya apo.
26Popele apo ili abwelele kwakwe Josefi, ŵalimuletele iyo-mpese iyali muminwe yaŵo kunanda, nekwinamisya pansi kuli ye. 27Popele aliŵepwisye ifyakwikala kwaŵo, nekulaŵila ati: Mbawisinwe, uyo umucekulu umwalukweŵa, kani alikosele, acili nemweo? 28Naŵo ati: Alikosele umuntu wenu, wisifwe, acili nemweo. Naŵo kaŵenamisya, kaŵalamba. 29Popele Josefi waliceŵucile, nekumuŵona Benjamini umukwawo, umwana waŵanyina, nekulaŵila ati: Kani uyu emwanice wenu, umwalukumbule'fyakwe? Kaŵili Josefi ati: ŵaLesa ŵakucite uluse, wemwana wanji. 30Peŋka Josefi kaaŋgufya; pakuti umutima wakwe walimufunjile ukwakuti umukwaŵo: naye kaafwayo'mwakulilila; peŋka kaenjila muŋanda yakwe, kaalililo'mo. 31Popele apo alisambile kumenso, nekufuma-mo; naye kaalikanya, kaalaŵila ati: Tekenipo pamatebulu ifyakulya. 32Popele ŵalitekele ifyakwe pantu pakwe, nefyaŵo pantu paŵo, nefyaŵaIjipiti aŵalukulya nakwe pantu paŵo napo; pakuti aŵaIjipiti weŋgalya-po ifyakulya pamo neŵaEbeya; pakuti ico cali cipakaŵi caŵaIjipiti. 33Naŵo aŵakwaŵo ŵaliikele pamenso akwe, umukulu-ŵantu ukwikala koti ŵuŵele bwakwe, nemwanice-ŵantu naye koti bwanice bwakwe: popele aŵo-ŵantu nekukaŋkamana aŵene naŵene. 34Popele alitumine kuli ŵo ifyakulya ifyali pamenso pakwe: sombi ukwesya kwafyakulya fyakwe Benjamini kwalicilile uŵukulu napafyaŵo impindi sisanu. Naŵo kaŵalukunwa, kawalukusaŋgalala pamo nakwe.
Currently Selected:
Ifyakutaŋga 43: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
