Ifyakutaŋga 42
42
1Popele apo Yakobi walibwene ati mucalo caIjipiti muli amasaka, eli aŋgalawila kuŵana ŵakwe ati: Mbanindo mulukulolansyanisisya? 2Kaŵili walilawile ati: Woneni, ndiumfwile ati muli amasaka mucalo caIjipiti: kamuyeni uko, mukatuulile uko ati tukalukwikele nemweo, tesi tukafwe. 3Popele aŵakwaŵo Josefi aŵo ikumi ŵaliile mukuula'masaka kucalo caIjipiti. 4Sombi Benjamini umukwaŵo Josefi, Yakobi taamutumine pamo neŵakwaŵo; pakuti alilaŵile ati: Eŋgesa kuŵa nefyakukatasya cipale.
5Popele aŵana ŵakwe Isilaeli aŵalalume ŵalificile muukula'masaka pakati pali ŵaŵo aŵalukufika: pakuti insala yali namucalo caKanani. 6Lomba Josefi wali cilolo icikulu icalukwikalike' calo; niye uwalukuŵolila aŵantu aŵamucalo ŵonse: peŋka kaŵesa aŵakwaŵo Josefi, kaŵenamisya pansi kuli ye, napamenso paŵo kapafika napamusili. 7Popele Josefi waliŵabwene aŵakwaŵo, nekuŵesiŵa, sombi alilisaŋgwile pamenso aŵo, nekwambala naŵo neŵuŋgwa; nekulaŵila kuli ŵo ati: Mbamulitulile-pi? Naŵo ati: Tulitulile kucalo caKanani, tuliisile mukuule'fyakulya. 8Lomba Josefi waliŵesiŵile aŵakwaŵo; sombi ŵo taŵamwisiŵile. 9Popele Josefi walilaŋgulucile imiloto iyo alotele iyakuli ŵo, nekulaŵila kuli ŵo ati: Muli ŵacetesi; muliisile mukuceto'kunaka kwacalo. 10Naŵo ŵalilaŵile kuli ye ati: Koku Sikulu, sombi fweŵantu ŵenu tuliisile mukuule'fyakulya. 11Fwense tuli ŵana ŵamuntu umo; tuli ŵantu ŵacine, fweŵantu ŵenu tatuli ŵacetesi fweŵone. 12Naye alilawile kuli ŵo ati: Tau, sombi muliisile mukuceto'kunaka kwacalo. 13Kumfwa naŵo ati: Fweŵo, fweŵantu ŵenu, tuli wana-ŵaŋkasi ikumi naŵaŵili, aŵana ŵamuntu umo mucalo caKanani; lomba ŵoneni, umwaniceŵantu ali naŵawisifwe napakasuŵa kalelo, kaŵili naumbi taa-po. 14Popele Josefi walilaŵile kuli ŵo ati: Nifyefyo ifi nalaŵila kuli mweŵo ati muli ŵacetesi! 15Mukesiwe kuli fifi: pamweo waŵaFalo, tekuti mukafume-po pano, apakuŵulo'kwisa kuno umwanice wenu. 16Mukatume umbi peŵumba lyenu, ŋgaakalete umukwanu, namweŵo kamulukukakwa, ati amasiwi enu akesiwe, kani muli mweŵo muli ŵucine: kani ifyo tefyo, kumweo wawaf'alo muli ŵacetesi. 17Popele apo aliŵaŵicile mwikati ŵonse pamo insiku sitatu. 18Popele pakasuŵa kaŵusitatu, Josefi walilaŵile kuli ŵo ati: Mucite'fi, eli mukalukwikele nemweo, pakuti neŵo ndukutonda ŵaLesa: 19kani muli ŵantu ŵacine, umbi penu ŋgaakalukukakwa mwikati lyenu; sombi mweŵo kamuya, mukapinte amasaka aku nsala iyamumananda enu: 20eli mukandetele umwanice wenu; fyopele'fyo amasiwi enu eli akaŵoneka ati acine, namweŵo nekuŵulo'kufwa. Naŵo ŵalicitile'fyo.
21Peŋka ŵo ŵalukuŵulansyanya ati: Icine tuli nemulandu uwakumukwaŵesu, pakuti twalibwene ukupeŋga kwamutima wakwe, ili atukombetele, sombi twalikene ukumfwa; pakuti pali fyefyo isi-nsoni syaisa pali fweŵo. 22Popele Lubeni waliŵaasucile ati: Kansi nsinalimuŵulileni ati: Tekumucito'kuŵifya umwanice, sombi mwalikene ukumfwa? Pakuti pali fyefyo nafyo, ŵoneni, imilopa yakwe ilifwailwe. 23Lomba taŵaisiŵile ati Josefi waliŵomfwilisye; pakuti pali newakuŵaalulwila amasiwi pakwambala nakwe Josefi. 24Popele alialucile ukuŵafutatila, nekulila neminsosi; naye kaabwelela kuli ŵo, nekulawila kuli ŵo, nekumupoka Simyoni ukumufumya pali ŵo, nekumukaka pamenso aŵo.
25Popele apo Josefi waliŵaŵulile awantu ati: Isusyeni impafu syaŵo amasaka, nendalama syaŵo ŵaieta, muŵabwelesesye-mo ŵonse kumpafu syaŵo syaŵo; kaŵili muwapele nefyakulya ifyapansila. 26Popele fyalicitii we kuli ŵo fyopele'fyo. Peŋka kaŵatwike'mboŋgolo syaŵo amasaka aŵo, kaŵafuma-po napa po. 27Popele apo pansila umbi, pakukakulula kulupafu, ati mpele-ko imboŋgolo yanji ifyakulya, apo ŵalukulala, alibwene indalama syakwe; lomba kuŵona syali kukanwa kalupafu lwakwe. 28Popele alilaŵile kuŵakwaŵo ati: Indalama syanji silibwesiwe; lomba ŵoneni sili namulupafu lwanji: naŵo imitima yaŵo nekufuma, peŋka kaŵalitutumina aŵene naŵene, nekulaŵila ati: Mbacindo ici ŵatucita ŵaLesa?
29Popele apo ŵalificile kuli ŵaYakobi ŵawisiŵo kucalo caKanani, nekuŵaŵula fyonse'fyo ifyaŵele pali ŵo; ati: 30Uyo-muntu, sikulu uwamucalo, walukwambala nafweŵo newuŋgwa, nekututamuka ati tuli ŵacetesi awalukucete' calo. 31Nafwe katulaŵila kuli ye ati: Tuli ŵantu ŵacine, tatuli nifweŵacetesi. 32Fweŵo tuli wana-ŵaŋkasi, aŵana ŵaŵawisifwe; umbi taa-po, kaŵili umwanice-ŵantu ali naŵawisifwe mucalo caKanani. 33Popele uyo-muntu, sikulu uwamucalo, walilaŵile kuli fweŵo ati: Ŋkesiŵa ati muli ŵantu ŵacine kuli fifi: musyeni umukwanu umbi kuli neŵo, mulukupinta amasaka aku nsala isyamumananda enu, lomba kamuyeni; 34mukamulete umwanice wenu kuli neŵo: eli ŋkesiŵa ati tamuli nimweŵacetesi, sombi ati muli ŵantu ŵacine: fyopele'fyo ŋkamupeleni umukwanu, namweŵo eli mukalukuulansyanya mucalo.
35Popele apo lomba, pakulukwitulula amasaka mumpafu syaŵo, kuŵona nikutufunda twa ndalama twaŵo twaŵo mumpafu; popele pakuŵona utu funda twaŵo utwandalama ŵo naŵawisiŵo, ŵonse ŵalitinine. 36Popele ŵaYakobi ŵawisiŵo ŵalilaŵile kuli ŵo ati: Mwanjipaisisya aŵana ŵanji: Josefi taa-po, Simyoni naye taa-po, popele mulukufwayo'kumutwala naBenjamini: fyonseʼfyo fyakuŋkatasya. 37Peŋka Lubeni kaalaŵila kuli ŵawisi ati: Mukaŵepa ye aŵana ŵanji aŵalalume ŵoŵilo, kani tesi ŋkamubwesesye kuli mwewo; mumupele muminwe yanji, naneŵo ŋkamubwesesya kuli mweŵo. 38Kumfwa naŵo ati: Umwana wanji tamukaya-po nakwe; pakuti umukwaŵo alifwile, niye eŋka usyele-po: kani akafwe munsilo'mo mukaya, mukasifisye'mfwi syanji kuSyeoli nensoni isyaŵulanda.
Currently Selected:
Ifyakutaŋga 42: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
