Ifyakutaŋga 41
41
1Popele apo, pakusile'myaka iŵili iŵuluŵulu, lomba Falo walilotele: popele kuŵona aliimakene mumbali yanika. 2Popele lomba iŋombe sisanu nasiŵili silukutuntuka ukufuma munika, isi weme isiinine; nekulukulya inteŵe. 3Popele lomba neŋombe simbi nasyo sisanu nasiŵili silukutuntuka munika ukulukulonde'siŵyaŵo, syo isiŵipile isyondele ukwakuti; nekulukwimakene pasiŵyaŵo mumbali yanika. 4Popele apo iŋombe isyo isiŵipile isyondele nekulukulye'syo sisanu nasiŵili isiweme isiinine. Peŋka Falo kaaŵuka. 5Nakaŵili kaalala, kaalota liŵili: popele lomba icipakati catiligu cimo cafyala ifikola fisanu nafiŵili, ifitali fyeŋke'fiweme. 6Popele lomba nafimbi nafyo ifikola fisanu nafiŵili ifipumbu fyeŋka ifiŵabwilwe kucipupu icakumutulesuŵa fyafyalwa ukulukwisa panuma. 7Popele ifyo ifipumbu fyeŋka kafilya ifyo ifikola fisanu nafiŵili ifitali fyeŋke'fiweme. Popele Falo kaaŵuka, popele kansi muloto.
8Popele ulucelo waliikele nensoni; popele alitumine aŵantu mukuŵeta aŵalaye ŵonse aŵamuIjipiti, neŵamano ŵonse aŵali-mo: popele Falo aliŵaŵulile umuloto wakwe; sombi tapali-po neli umo uwamano akwiwulisisya kuli Falo.
9Popele apo icilolo caŵakutaŵataŵa calilaŵile kuli Falo ati: Lelo ndukulaŋguluko'kuŵifya kwanji. 10ŴaFalo ŵalukuŵakalipila aŵapyunjisi ŵaŵo, lomba kaŵaŋkaka muli ŵukaili muŋanda yacilolo caŵakulama, fweŵilo necilolo caŵepicisi: 11peŋka katuloto'muloto uŵusiku ŵuntu wumo, fweŵilo; twalilotele fweŵilo koti kuŵulisisya kwamiloto yesu. 12Lomba emwali pamo nafweŵo umusaŋkwa, umufibeya, umupyunjisi wacilolo caŵakulama; popele katumuwula, naye kaatuŵulisisya imiloto yesu; fweŵo fweŵilo alituŵulisisye koti kulota kwesu. 13Popele apo, paliŵele koti nifyopele'fyo ifi atuŵulisisye; neŵo kaŵambwesesya pali ŵucilolo bwanji, nemuŵyanji naye kaŵamukulicila.
14Popele apo Falo walitumine aŵantu mukumwita Josefi, naŵo kawaaŋgutyo' kumwinjisya ukumufumya mwikati; nave kaaŵeya, kaafwale'fiweme kaenjila umwali Falo. 15Popele Falo walilaŵile kuli Josefi ati: Naloto'muloto, sombi tapali-po uwamano akuuŵulisisya; lomba naumfwe'fyakuli weŵo, ati weŵo, pakumfwo'muloto, uliisi ukuuŵulisisya.
16Popele Josefi walimwasucile Falo ati: Ayo-mano taali kuli neŵo: NiŵaLesa eŵakuŵapela ŵaFalo ukwasuka kwaŵutende.
17Popele Falo walilaŵile kuli Josefi ati: Pakulota kwanji kuŵona kanjimakene pambali yanika. 18Popele lomba kasituntuka munika iŋombe sisanu nasiŵili isiinine isiweme; nasyo kasilukulya inteŵe; 19popele lomba nasimbi iŋombe sisanu nasiŵili kasituntuka ukusilonde'siŵyaŵo, syo isyondele isiŵipile isyakuŵiua'mafuta, isyakuŵe'fyo isiŵipile nsiŋgawona monse mucalo caIjipiti insiku syonse; 20popele iŋombe isyondele isiŵipile kasisilya iŋombe isyo sisanu nasiŵili isiinine isyatanjile; 21lomba pakusilya, takubwenekele ati syasilya; sombi kasiciŵipa koti nipakutaŋga. Peŋka kambuka. 22Popele apo kambona pakulota kwanji, lomba icipakati cimo kacifyala ifikola fisanu nafiŵili ifyampeke ifiweme; 23popele lomba fimbi nafyo ifikola ifyumine, ifyakuŵule'mpeke, ifiŵabwilwe kucipupu icakumutulesuŵa, kafifyalwa ukulukwisa panuma. 24Popele ifyo ifipumbu fyeŋka kafifilya ifyo-fikola fisanu nafiŵili ifi weme: Peŋka kambaŵula aŵalaye; sombi tapali-po neli umo uwamano akumbulisisya.
25Popele Josefi walilaŵile kuli Falo ati: Ukulota kwaŵaFalo kumo: ŴaLesa ŵaŵalanjisya ŵaFalo ifyo ifi ŵaise'li ŵacita. 26Iŋombe isyo sisanu nasiŵili isiweme myaka isanu naiŵili; kaŵili ifikola ifyo fisanu nafiŵili ifiweme nafyo myaka isanu naiŵili: ukulota kuntu kumo. 27Nakaŵili iŋombe isyo sisanu nasiŵili isyondele isiŵipile isyatuntucile ukusilonda myaka isanu naiwili, pamo nefipumbu ifyo fisanu nafiŵili ifiŵabwilwe kucipupu icakumutulesuŵa; nayo ikalukuli myaka ya nsala yakawumbo isanu naiŵili. 28Efyo nalaŵila kuli ŵaFalo: ŵaLesa ŵaŵalanjisya ŵaFalo ifyo ifi ŵaise'li ŵacita. 29Ŵoneni, ilukwisa imyaka isanu naiŵili iyafyakulya ifyakuti ubwinji monse mucalo caIjipiti; 30popele panuma yayeyo-myaka, pakesa imyaka imbi nayo isanu naiŵili iyansala iyakuti iyakawumbo; lombo'ŵo-bwinji bwafyakulya ŵonse ŵukalubwa mucalo caIjipiti; popele insala ikacilya icalo; 31kaŵili ubwinji uŵo taŵukesibwa mucalo pakuti pansale'yo iyakuti iyakuŵulonda; pakuti ikalukulemenene makosa. 32Lomba umuloto waisa kuli ŵaFalo paŵili, pakuti ifintu ifyo filiansicilwe kuli ŵaLesa, kaŵili ŵaLesa ŵakaficita bwaŋgu. 33Pakuti pali fyefyo lomba ŵaFalo ŋgaŵasalulule umuntu uwakalaŋgo uwamano, ŵamwikalike ŵucilolo ubwapacalo caIjipiti. 34Ŋgaŵacite'fyo ŵaFalo; nakaŵili ŋgawafiikalike ifilolo pacalo, wakasoŋkesye-po cimo pali fisanu pacalo caIjipiti iyo-myaka isanu naiŵili iyabwinji. 35Popele ŋgafikalukuŵuŋganye'fyakulya fyonse ifyamyake'yo iweme ikesa, nekuloŋgela'masaka mwisina lyaŵaFalo, akalukuli fyakulya mumisi; ŋgafilukwalama. 36Popele ifyakulye'fyo fikalukuli ŵutala ubwamucalo pamyake'yo iyansala iyakuti, ikalukuli mucalo caIjipiti; ciŋgesa kufwa icalo pakuti pansala.
37Popele icintu ico caliweme pamenso akwe Falo, napamenso aŵantu ŵakwe ŵonse. 38Peŋka Falo kaalaŵila kuŵantu ŵakwe ati: Kansi tuliisi ukuŵono'muntu umbi uwakuwe'fi, umuntu uli-mo neMupasi waŵaLesa? 39Popele Falo walilaŵile kuli Josefi ati: Pakuti ŵaLesa ŵakulanjisya fyonse'fi, tapali-po umuntu uli nemano nekalaŋgo koti nififi ifi uli nafyo weŵo. 40Weŵo ukalukwikalike'nanda yanji; popele aŵantu ŵanji ŵonse ŵakekalikwa koti masiwi oŵe, sombi ifyaŵufumu bweŋka ŋkakucila weŵo uŵukulu. 41Kaŵili Falo walilaŵile kuli Josefi ati: Ŵona, nakwikalika weŵo ŵucilolo icapacalo caIjipiti conse. 42Popele Falo walifulile kumunwe insalamu yakwe iyakesiŵilo, nekwiŵika pamunwe wakwe Josefi, nekumufwike'fyakufwala ifyansalu inacile, nekumusiŋgulusya neminyololo yegolide pamukosi; 43kaŵili alimwensesye paŋgolofwana iyaŵusiŵili iyi ali nayo; lomba ŵalukumutanjilila ili ŵaŵilicisya ati: Fukameni! Popele Falo walimwikalicile ŵucilolo icapacalo caIjipiti conse. 44Popele Falo walilaŵile kuli Josefi ati: NineFalo, lomba tapali-po umuntu, monse mucalo caIjipiti, ukasuntula ukuŵoko kwakwe neli kulu kwakwe, apakuwula weŵo. 45Popele apo Falo walimwilicile Josefi isina lyakwe ati niSyafenati-paneka; naye kaamupela Asenati umwana umwanakasi uwakwe Potifela umupapatilisi uwakuOni ati ope. Popele Josefi waliendele monse mucalo caIjipiti.
46Lomba Josefi imyaka yakwe yalikumene amakumi atatu, impindi iyo aimakene pamenso akwe Falo imfumu yaŵaIjipiti. Popele Josefi walifumine pamenso akwe Falo, nekwenda monse mucalo caIjipiti.
47Popele apo pamyake'yo isanu naiŵili iyabwinji umusili nekufyasye'fyakulya mpolompompi. 48Popele aliwuŋgenye ifyakulya fyonse ifyamyake'yo isanu naiŵili iyali mucalo caIjipiti, nekuloŋgele'fyakulye'fyo mumisi: ifyakulya ifyamumaŵala asiŋgulucile kumisi yonse alifiloŋgele mumisi yopele intu imo. 49Lomba Josefi waliloŋgele amasaka koti miseŋga iyakucisiŵa, akuti ubwinji, nekuleko'kwapenda, pakuti taapendekele.
50Lomba kuli Josefi kwalifyalilwe aŵana aŵalalume ŵaŵili, ili tauŋgafiko' mwaka wa nsala, aŵo wamufyalile Asenati, umwana umwanakasi uwakwe Potifela umupapatilisi uwakuOni. 51Popele Josefi walimwilicile umukulu-ŵantu isina lyakwe ati niManase; pakuti walilaŵile ati: ŴaLesa waneŋgesyo'kuluŵa-ko ukupyuŋga kwanji konse, nekuŵaluŵa-ko ŵonse aŵakuŋanda yaŵatata. 52Kawili walimwilicile uwaŵuŵaŵili isina lyakwe ati niEfilayimi; pakuti ŵaLesa ŵamfunusya mucalo cakupeŋga kwanji.
53Popele imyake'yo isanu naiŵili iyafyakulye'finji, ifyali mucalo caIjipiti, yalisilile. 54Lomba nemyake'yo isa nu naiŵili iyansala kaitatiko'kufika, koti nifyefyo ifi alaŵile Josefi: kaŵili mufyalo fyonse mwali nensala iyakawumbo; sombi monse mucalo caIjipiti mwali ifyakulya. 55Popele apo, pakumfwe' nsala monse mucalo caIjipiti, aŵantu ŵalimulilile Falo ati mutu pele ifyakulya: peŋka Falo kaalaŵila kuwa Ijipiti ŵonse ati: Kamuyeni kuli ŵaJosefi; ifi ŵakamuŵuleni, mukaficite. 56Popele insale'yo yaliputile ponse ponse pacalo capansi: peŋka Josefi kaesula-po pamatala onse nekuule'fyakulya kuŵaIjipiti. 57Popele apo aŵamufyalo fyonse fyaliisile kucalo caIjipiti mukuula amasaka; pakuti insala yalilemenene ponse pacalo capansi.
Currently Selected:
Ifyakutaŋga 41: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
