Ifyakutaŋga 39
39
1Lomba Josefi walitwitwe kucalo ca Ijipiti; popele Potifa, icilolo cakwe Falo cimbi, icilolo caŵalukumulama Falo, umuIjipiti, walimuulile kuminwe yaŵalsimeli, aŵamutwite uko. 2Lomba ŵaYawe ŵali nakwe Josefi, naye Josefi nekusyuka-syuka; kaŵili waliikele muŋanda yakwe wisikulu, uyo umuIjipiti. 3Popele wisikulu walibwene ati ŵaYawe ŵali nakwe, nakaŵili ati ŵaYawe ŵalifisyucisye muminwe yakwe fyonse'fyo ifi alukucita. 4Lomba Josefi walibwene uluse pamenso pakwe, nekulukumupyunjila; popele walimwikalicile ati cilolo icapananda yakwe, nakaŵili fyonse'fyo ifi ali nafyo alifiŵicile muminwe yakwe. 5Popele apo, uku tatika pampindi iyo amwikalicile Josefi ati cilolo icapananda yakwe napali fyo fyonse ifi ali nafyo, lomba ŵaYawe ŵalisyucisye iŋanda yamuIjipiti uyo pakuti pali Josefi; kaŵili isyuko lyaŵaYawe lyali pali fyo fyonse ifi ali nafyo, nefyamuŋanda nefyamwiŵala. 6Popele fyonse'fyo ifi ali nafyo alifisile muminwe yakwe Josefi; lomba taaisiŵile ifyakwe, sombi ifyakulya ifi alukulya efyo fyeŋka aisiŵile. Kaŵili Josefi waliweme pamenso, wali neŵulombe.
7Popele apo, panuma yafintu ifyo, lombo'mukasi wakwe wisikulu walimulolele Josefi; nekulaŵila ati: Ulale naneŵo. 8Sombi alikene, nekulaŵila kuli muka-wisikulu ati: Ŵoneni, ŵasikulu ŵanji taŵesiŵile ifili naneŵo muŋanda, kaŵili ŵaliŵicile fyonsc'fyo ifi ŵali nafyo muminwe yanji; 9munande' yi tamuli-po umuntu uncilile neŵo uŵukulu; kaŵili tawaŋkenye-po ifintu, sombi mweŵo mweŋka eŵaŋkanya, pakuti nimweŵakasi ŵaŵo: mbancite syani lomba ici-ciŵipile icikulu, mbifye syani kuli ŵaLesa? 10Popele apo, pakulukulaŵila kuli Josefi insiku nansiku uyo-mwanakasi, lomba taamumfwilisye ati ndale nakwe neli ati njikale nakwe.
11Popele apo, iyo-mpindi, Josefi waliinjile muŋanda mukucite'milimo yakwe; lombo'mo tamwali-mo aŵalalume awamuŋanda neli umo. 12Popele umwanakasi walimwikete kuŋguwo, nekulaŵila ati: Lala naneŵo! Naye kaasye'ŋguwo yakwe muminwe yamwanakasi, kaaŵutuka, kaafuma-mo. 13Popele apo, pakuŵona ati asye'ŋguwo yakwe muminwe yanji, aŵutuka-mo, 14lombo'mwanakasi waliŵetile aŵalalume awamuŋanda yakwe, nekulaŵila kuli ŵo ati: Ŵoneni, ŵalitwinjisisye umuEbeya mukutupufya; ali ainjila kuli neŵo mukulala naneŵo; lomba kandila nesiwi'likulu: 15lomba apo, pakumfwa ati naŵilicisya nalila, kaasye'ŋguwo yakwe kuli neŵo, kaaŵutuka, kaafuma. 16Popele muka-Potifa walilamine iŋguwo yakwe, ili tawaŋgabwelela kunanda wawisikulu. 17Popele umukasi waŵo walilaŵile kuli ŵo koti masiwi aya ati: Umupyunjisi uyo umuEbeya, uyu mwatuletele, wali wainjila mukumpufya; 18popele apo, pakuŵilicisya neŵo nekulila, alisile iŋguwo yakwe kuli neŵo, kaaŵutukamo. 19Popele lomba, pakumfwa amasiwi amukasi waŵo, ayo walaŵile kuli ŵo ati, koti nififi efi wancitila neŵo umuntu wenu, lomba ŵawisikulu ŵaliwele nekukalipa. 20Popele ŵawisikulu ŵalimwikete Josefi, nekumuposa namwikati, umo umwalukukakwa ŵakaili wamfumu; lomba waliikele mopele umo mwikati.
21Sombi ŵaYawe ŵali nakwe Josefi nekumulanjisya neŋkumbu, nekumusyucisya pamenso acilolo icamwikati. 22Popele icilolo icamwikati cali pele muminwe yakwe Josefi ŵakaili ŵonse aŵali mwikati umo; lomba fyonse'fyo ifi ŵacitile umo, niye ewaficitile. 23Icilolo icamwikati tacalolele-po pafintu fyonse neli cimo ifyali pali ŵucilolo bwakwe, pakuti ŵaYawe ŵali nakwe; nakaŵili ifyo ifi acitile, niŵaYawe eŵafisyucisye.
Currently Selected:
Ifyakutaŋga 39: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
