Ifyakutaŋga 38
38
1Popele impindi iyo paliŵele ati Juda walifumine kuŵakwaŵo, waliselucile nekwinjila muŋanda yamuntu umbi umwina-Adulami, isina lyakwe niCila. 2Lomba Juda walibwene uko umwana umwanakasi uwamuKanani umbi, isina lyakwe niSyuwa; peŋka alimupokele, nekwinjila muli ye. 3Popele waliimitile, nekufyalo'mwana umwalalume, naye kaamwilike'sina lyakwe ati niElu. 4Peŋka kaemita liŵili, kaafyala nemwana umwalalume; kaamwilike' sina lyakwe ati niOnani. 5Peŋka nakaŵili kaafyala nemwana umwalalume, kaamwilike'sina lyakwe ati niSyela; lomba Juda walikuCesibi impindi yakufyalo'mukasi wakwe.
6Popele Juda walipokele umwanakasi ati kaope Elu umwana wakwe umuŵele; lombe'sina lyamwanakasi uyo niTama. 7Sombi Elu, umwana wakwe Juda umuŵele, wali muntu wakuŵifya pamenso aŵaYawe; popele ŵaYawe ŵalimwipeye. 8Popele Juda walilaŵile kuli Onani ati: Koinjila mumukasi wamukwanu, ukamucitile imilimo ielelwe umulamu, ukamufyalile umukwanu aŵana. 9Lomba Onani waliisiŵile ati tesi ŵakaŵe ŵanji aŵana awaŋgafyalwa: popele, pakwinjila mumukasi wamukwaŵo, walifiposele pansi, eŋgesa kumupelo'mukwaŵo aŵana. 10Lombe'fyo ifi acitile fyaliŵipile pamenso aŵaYawe: popele ŵaYawe ŵalimwipeye naye. 11Popele apo Juda walilaŵile kuli Tama umulokasi wakwe ati: Ulukwikele niŵumukamfwilwe muŋanda yaŵawiso, ili taaŋgakula Syela umwana wanji: pakuti alilaŵile ati: Eŋgesa kufwa naye koti nifyopele'fyo ifi ŵafwile aŵakwaŵo. Popele Tama waliile nekulukwikele muŋanda yaŵawisi.
12Popele apo, pakupite'mpindi, kwalifwile umwana umwanakasi uwakwe Syuwa, umukasi wakwe Juda; naye Juda walisaŋgalasiwe, nekuya kuŵantu ŵakwe aŵaŵeyesi ŵambelele kuTiminati, ye umwine pamo neciŵusa cakwe, Cila umwina-Adulami. 13Lomba ŵalimuŵulile Tama ati: Ŵona, ŵawiso-fyala ŵalukuya kuTiminati mukusiŵeye'mbelele syaŵo. 14Popele alifulile ifyakufwala fyakwe ifyaŵumukamfwilwe, nekulifimba akasansa kakwe pamenso, nekulifimbisya, nekwikala pamusiko uwakuEnayimi uwapansila iyakuya kuTiminati; pakuti walibwene ati Syela kale akulile, naneŵo nsiŋgapelwa kuli ye ati ŋgupwe. 15Popele Juda, pakumuŵona, walilaŋgulucile ati mucencemesi uyu; pakuti alifimbile pamenso. 16Popele alialucile ukuya kuli ye pansila, nekulaŵila ati: Weŵo, unsumine, ŋgandukwinjila muli weŵo: pakuti taaisiŵile ati mulokasi wanji. Naye umwanakasi ati: Mbawakumpele'ndo, ati winjile muli neŵo? 17Naye Juda ati: Ŋkakutumina umwana wambusi uwamwitaŋga, Kumfwa ati: Kani wakupela-po akesiŵilo, ili tauŋgamutuma? 18Naye ati: Mbakesa-kesiŵilo ŋkupele? Kumfwa ati: Akabwe koŵe akakesiŵilo nemwando woŵe nekasako koŵe akali muminwe yoŵe. Naye kaamupela, kaenjila muli ye, naye umwanakasi kaemita ipafu lyakwe. 19Popele apo umwanakasi waliimine, nekukumbuluka; walifulile akasansa kakwe, nekufwala nefyakufwala fyaŵumukamfwilwe bwakwe. 20Peŋka Juda walitumine umwana wambusi muminwe yaciŵusa cakwe, umwina-Adulami, mukupoka akesiŵilo kuminwe yamwanakasi: sombi taamubwene. 21Popele apo aliŵepwisye aŵantu aŵamomo ati: Mbaali kulipi uyo-mwanakasi umucencemesi uwali kuEnayimi uwapansila? Kumfwa naŵo ati: Tapekele-po pano umwanakasi umucencemesi. 22Popele alibweleie kuli Juda, nekulaŵila ati: Nsimubwene; nakaŵili aŵapapalya ŵalilaŵile ati: Tapekelepo pano umwanakasi umucencemesi. 23Popele Juda ati: Ŋgaalukwikala nako, twiŋgawa nensoni; ŵona, nalitumine uyu-mwana wambusi, sombi tawamubwene umwanakasi.
24Popele apo, pakupite'myensi koti itatu, ŵalimuŵulile Juda ati: Tama, umulokasi woŵe, wacito'ŵucencemesi; nakaŵili, ŵona, ali nepafu lyaŵucende. Popele Juda ati: Mufumyeni, ŋgaociwe. 25Peŋka, pakufumiwa ye, walitumine umuntu kuli ŵawisi-fyala, mukulaŵila ati: Ndiŵele nepafu lyamuntu umwine wafifi-fintu; kaŵili walilaŵile ati: Ndukumukombeteleni ati mwisiŵe ati fyakwe nani ifi-fintu, akabwe akakesiŵilo nemwando nekasako. 26Peŋka Juda kaafisuminina, kaalaŵila ati: Uyumwanakasi alincilile neŵo ukuluŋgama; pakuti nsinamupele kuli Syela umwana wanji. Lomba Juda taamwisiŵile-po liŵili.
27Popele apo, pampindi yakupotwa kwakwe, lomba mwali ŵampundu munda mwakwe. 28Popele, pakupotwa, umbi walipusisye ukuŵoko; popele icimbela calimwikete nekumukaka pakuŵoko uŵusalu uŵukasicile, nekulaŵila ati: Uyu ewataŋgo'kufuma. 29Lomba apo, ili abwesesye ukuŵoko kwakwe, umukwaŵo nekufuma. Kumfwa icimbela ati: Mbanindo walicitila ukupula uku? Pakuti pali fyefyo isina lyakwe lyaliilicilwe ati niPelesi. 30Popele pantanjile nekufuma nemukwaŵo, uyo uwali neŵusalu uŵukasicile pakuŵoko kwakwe: popele isina lyakwe lyaliilicilwe ati niSyala.
Currently Selected:
Ifyakutaŋga 38: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
